АР-м и Театральнэ зэхахьэ театрэм и Мафэ фэгъэхьыгъэ Iоф­тхьабзэ зэхищагъ. «Адыгэ макъэр» ащ къы­рагъэблэгъагъ.

Адыгеим икультурэ титеатрэ чIыпIэ гъэнэфагъэ щиубытыгъ. Анахь цIыкIухэм къащегъэжьагъэу анахьыжъхэм анэсэу къэгъэлъэгъонхэм зэплъынхэ ахагъуатэ. ЦIыфхэм зэлъашIэх, адэжь макIох, актерхэри къяплъыхэрэм афэшъыпкъэхэу афэлажьэх. Лъэпкъ искусствэр цIыф жъугъэхэм зэдырябаиныгъэу ыкIи зэрыгушхохэу щыт.
Республикэм и Театральнэ зэхахьэ Iофтхьэбзэ гъэшIэгъонхэр регъэкIокIы. Ахэм ащыщэу театрэм и Мафэ фэгъэхьыгъэм цIыфыбэ зэфищагъ.

Я XIX-рэ лIэшIэгъум къы­щыублагъэу театральнэ капустникхэр Урысыем щызэхащэх. Мыщ фэдэ къэгъэлъэгъонхэм цIыф макIэ рагъэблагъэщтыгъ. Актерхэр ямышIыкIэу, кIэнэкIэ­лъэ тIэкIуи кIэлъэу, театрэм исценэ щыджэгухэзэ къэгъэлъэ­гъоныр зэхагъэуцощтыгъ.
Актерым шIулъэгъуныгъэу зрителым фыриIэр къыщыра­гъэлъэгъукIыщтыгъ. Непи мы амалэу къэтпчъыгъэхэр зэкIэ театрэм ыгъэфедагъ.
Тихэгъэгу икультурнэ кIэн къэухъумэгъэнымкIэ ыкIи хэ­хъоныгъэ егъэшIыгъэнымкIэ театрэм ишIогъэшхо къэкIо, цIыфхэм ящыIакIэ нахь гъэ­шIэгъон ешIы, гъэхъэгъакIэхэм афещэх, Iофэу ышIэрэм лIэужхэр зэрепхых.
АР-м и Камернэ музыкальнэ театрэу Хьанэхъу Адам ыцIэ зыхьырэр, Урыс къэралыгъо драмтеатрэу А. С. Пушкиным ыцIэ зыхьырэр, Лъэпкъ театрэу И. С. Цэим ыцIэ зыхьырэр, Адыгеим и Къэралыгъо фи­лармоние и Нысхъэпэ театрэу «Ды­шъэ къошыныр» зы сценэ къызэдытехьагъэх, ямышIыкIэ къэ­гъэлъэгъонхэр къашIыгъэх.

— Театрэр — тищыIэныгъ, сценэм тытемыхьэмэ тэсыма­джэ. Искусствэм зиIахьышIу хэзылъхьэгъэ цIыф цIэрыIоу театрэм щылажьэрэ пэпчъ театрэр къегъэпсы. Театрэм цIыф­хэр зэфещэх. Непэ актер ныб­жьыкIэу сценэм къытетщагъэхэр искусствэхэмкIэ колледжэу Тхьабысымэ Умар ыцIэ зыхьырэм щеджэх, ахэм гъогу яттын фае. Урысыем итеатральнэ еджэпIэ анахь дэгъухэм ыпкIэ хэмылъэу ащеджэнхэ амал зы­гъотыщт творческэ ныбжьыкIэ­хэм яхэшыпыкIын АР-м и Теат­ральнэ зэхахьэ щэкIо. Театрэм неущрэ мафэ иIэным фэшI сэ­наущыгъэ зыхэлъ актер ныбжьыкIэхэр тищыкIагъэх, — къы­Iуагъ АР-м и Театральнэ зэха­хьэ ипащэу Ацумыжъ Рустам.
Къяплъыхэрэм лIэужыкIэ яIэ­ным пае ежьхэми Iоф зыда­шIэжьын, ясэнаущыгъэ зыра­гъэужьын, актер ныбжьыкIэхэр апIунхэ фае. Къэралыгъом ите­атрэ пэрытхэм еджакIо зэрагъэкIощтхэр ащкIэ зы лъэ­бэкъушIу.
— Театрэм иамалхэр гъунэнчъэх. Искусствэр жьым, псым фэдэу хэти ищыкIэгъагъ. Цlыф­хэм цыхьэ къыпфашlы хъумэ, уфитэп нэмыкlэу узекlонэу, къыптефэрэр къэпшlын фае. Тарихъым, культурэм, сэнаущыгъэм, артистхэм кIуачIэу, зэхашIэу, гуетыныгъэу ахэлъым яшIуагъэкIэ театрэм тидышъэ кIэн къыухъумэщт, — къыIуагъ Урысыемрэ Адыгеимрэ янароднэ артистэу, Абхъазым, Къэбэртэе-Бэлъкъарым, Пшызэ шъолъырым язаслуженнэ артистэу Зыхьэ Заурбый.
— Театрэм цIыфыр епIу, а гупшысэр зыпхырыщыгъэ спектаклэхэр къэдгъэлъэгъонхэм тапэкIи тыдэлэжьэщт. ЦIыфхэм тызэлъашIэ, тадэжь къэкIох, къытэмызэщэу къытэплъыхэрэм тафэшъыпкъэщт. Театрэр анахь лъэгэпIэ иным илъэоянэ тетэу орэпсэу! — къыIуагъ Камернэ музыкальнэ театрэм ихудо­жественнэ пащэу, искусствове­дениемкIэ кандидатэу, Урысыем, Адыгеим искусствэхэмкIэ язаслуженнэ IофышIэшхоу Юныс Сулеймановым.
Театрэм пIуныгъэ мэхьанэу иIэм зэрэхэхъуагъэм, ар щыIэныгъэм зэрэщыщым, лIэшIэгъу­хэм ыкIи лIэужхэм язэпхыныгъэ зэрэхэлажьэрэм щэч хэлъэп.
Лъэпшъыкъо
Фатим.