Къуаджэу Кодышъхьапэ щыщ Альмет Яквашевар фестиваль-зэнэкъокъоу «Къэгъагъэмэ ялэгъупкъопс» зыфиIоу ТIопсэ районым щызэхащагъэм хэлэжьагъ ыкIи ащ илауреат хъугъэ.

Пкъыгъо зэфэшъхьафэу гъэкIэрэкIагъэхэм яискусствэкIэ мастерхэу, ди­зайнерхэу, сурэтышIхэу, флористхэу, къэгъагъэхэр къэзыгъэкIыхэу ыкIи модельерхэу муниципалитетым ипсэупIэхэм къарыкIыгъэхэр лъэныкъуиплIкIэ зэнэкъо­къугъэх. IэшIагъэмэ апылъ бзылъфыгъэ IэпэIасэу Альмет Яквашевар зэрэлажьэрэр ижъырэ техникэу канзаши — ары зэреджэхэрэр японскэ лентэ е аксессуар гъэкIэрэкIагъэу шъхьацмэ апае агъэфедэрэм, ащкIэ бзылъфыгъэмэ ашъхьацхэр афашIыщтыгъэх. Непэ канзаши зыфаIорэр техникэу Iэрамхэр зэхашIыкIырэ закъоу щытэп, ар декоративнэ панно, гъэкIэрэкIэгъэ пкъыгъу, нэмыкIыб.
Зэмышъогъу лентэхэм ахэшIыкIыгъэ Iэрамхэу «Басмэ ошъуапщэр» ыкIи «Розэ куашэр» Кодышъхьапэ щыщ IэпэIасэм зэнэкъокъум пае ыгъэхьазырыгъэх, тхьапэ-бжъэ техникэмкIэ ышIыгъэх. Ар лъэныкъоу «ГукъэкIхэм яIэрам» зыфиIорэм къыщыхагъэщыгъ, лауреат зэрэхъугъэр къэзыушыхьатрэ дипломыр къыфагъэшъошагъ.
Альмет Муратэ ыпхъур Аллалэмэ къахэкIыгъ. ПсышIопэ районым ит поселкэу Вишневкам къыщыхъугъ. Ащ Шъачэ къэралыгъо университетыр къыухыгъ, сэнэхьатэу «Къэралыгъо ыкIи муниципальнэ гъэIорышIэныр» зыфиIорэм феджагъ. Унагъо ихьагъ, къуа­джэу Кодышъхьапэ щэпсэу. Культурэм и Унэ хэт тхылъеджапIэм ипащ.