Ижъырэ мэфэкIэу гъэмрэ кIымрэ зыщызэхэкIырэ мафэр лъэпкъ джэгукIэхэмкIэ, орэдхэмкIэ ыкIи къашъохэмкIэ кIэлэцIыкIу IыгъыпIэхэм, еджапIэхэм, культурэм иунэхэм, джащ фэдэу унагъохэм ащыхагъэунэфыкIы.

Адыгэ шэн-хабзэмэ атетэу ИлъэсыкIэ мэфэкIым епхыгъэ Iофтхьабзэхэр къуаджэу Псыбэ икIэлэцIыкIу учреждениеу «Хьалыжъый» зыфиIорэмрэ культурэм и Унэрэ ащыкIуагъэх. КIэлэцIыкIухэми нахьыжъхэми, ижъыкIэ зэрашIыщтыгъэм фэдэу, хьамшхунтIэ чъыгэу гъэбэжъулъэкIэ алъытэрэр агъэкIэрэкIагъ, хьакIэхэм шхыныгъо IэшIухэр апагъохыгъэх.
ГъэшIэгъонэу, чэфыгъо хэлъэу, кIымэфэ пкIыхьапIэм къызщыхэкIыжьхэрэ мафэр Агуе икIэлэцIыкIу IыгъыпIи щыхагъэунэфыкIыгъ.

— Ижъырэ мэфэкIым ихэбзэ шIагъохэм кIэлэцIыкIухэр хилъэсагъэх, — къыщаIотагъ учреждением. — Сабыймэ лъэшэу агу рихьыгъ джэгукIэу «Адыгэ паIор зыщылъ» зыфиIорэр. КIэлэпIухэм ягъусэхэу кIэлэцIыкIумэ хьамшхунтIэ чъыгым шэкI такъыр зэмышъогъухэр пашIагъэх, гугъэпIэшIухэм зэряжэхэрэр къырагъэкIэу. Ижъырэ лъэхъаным фэдэу зэIукIэгъу шIагъор адыгэ джэгукIэ аухыгъ.
Лъэпкъ культурэхэм я Гупчэу ПсышIуапэ дэтым щызэхащэгъэ мэфэкI зэхахьэм цIыфыбэ къекIолIэ­гъагъ. Творческэ купхэр, лъэпкъ орэдыIохэр ыкIи джэгуа­кIохэр ащ хэлэжьагъэх. Къэзэрэугъоигъэхэм хьам­шхунтIэ чъыгым шэкI кIэракIэхэр, адыгэ къое гъугъэхэр пашIагъэх, къапагъохыгъэ лъэпкъ гъомылапхъэмэ ахэIагъэх.
Къуаджэу Къэлэжъ культурэм и Унэу дэтым иIофышIэхэмрэ лъэпкъ культурнэ гупчэу «Аше» зыцIэмрэ зэгъусэхэу поселкэу Шъхьафитым кIэлэцIыкIухэм апае мэфэкI зэхахьэ щызэхащагъ. Адыгэ лъэпкъ хабзэм тетэу ИлъэсыкIэ мэфэкIыр зэрэхагъэунэфыкIырэр, ар зыфэдэр кIэлэцIыкIумэ алъэгъугъ, ежьхэри чанэу ащ хэлэжьагъэх.