Нэгъуцу Абрек дунэезэнэкъокъухэм ащытекIуагъ
Къуаджэу Агуе щыщ спортсменэу Нэгъуцу Абрек дзюдо бэнэнымкIэ дунэе зэнэкъокъухэм ясериеу «Большой шлем» зыфиIорэм килограмм 66-рэ къэзыщэчыхэрэм якуп хэтэу апэрэу дышъэ медаль къыщихьыгъ. Ар зикIалэр ыкIи зыгъасэрэр Урысыем изаслуженнэ тренерэу Нэгъуцу Джанболэт ары.
Финалым екIурэ гъогум игъэтхэпэ едзыгъоу «World judo Tour» зыфиIорэр Грузием икъэлэ шъхьаIэу Тбилиси щыкIуагъ, ащ спортсмен 400-м ехъу хэлэжьагъ, ахэм ащыщыгъэх дунаим иапэрипшIмэ ахалъытэрэ спортсменхэри. Абрек зэкIэлъыкIоу атекIуагъ Израиль, Великобританием, Венгрием ыкIи Азербайджан къарыкIыгъэ бэнакIохэм. Къыхэгъэщыгъэн фае, плIым щыщэу зэIукIэгъуищыр къабзэу ащ къыхьыгъэх. ЗэIукIэгъу шъхьаIэм «Большой шлем» зыфиIорэр тIогъогогъо къизыхыгъэ Темур Нозадзе щытекIуагъ ыкIи дышъэ медаль къыдихыгъ. Нэгъуцу Джанболэт фэшъхьафэу, чемпионыр тренерхэу Мурат Шадовымрэ Тэо Хьасанбыйрэ агъасэ.
Абрекрэ ащ ышэу Казбекрэ зэгъусэхэу мы зэнэкъокъухэм ахэлэжьагъэх. Нэгъуцу Джанболэт ыгъасэхэрэм ащыщэу «Большой шлемым» щытекIуагъэхэмкIэ Абрек ящэнэр: Михаил Угольниковым (янэ Аллалэмэ ащыщ) дышъэ медалих къыщыдихыгъ, Тимур Арбузовыр тIогъогогъо апэрэ хъугъэ.