АР-м и Правительствэ зычIэт унэм щыкIогъэ зэIукIэр хэбзэгъэуцугъэм икъэухъумэнкIэ дзэхэр зызэхащагъэхэр илъэс 214-рэ, Урысые Феде­рацием илъэпкъ гвардие идзэхэр зыщыIэхэр илъэси 9 зэрэхъухэрэм афэгъэхьыгъагъ.

АР-м и ЛIышъхьэу КъумпIыл Мурат ащ хэлэжьагъ. Росгвардием и ГъэIоры­шIапIэу Адыгэ Республикэм щыIэм ипащэу Даур Къэп­лъан, къулыкъум хэтхэр ыкIи иветеранхэр ащ къыщызэ­рэугъоигъэх.
Ахэм афэгушIонхэу къэ­кIуагъэх АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, АР-м и Прокуратурэ, Апшъэрэ хьыкумым, АР-м и МВД, щынэгъончъэнымкIэ Федеральнэ къулыкъум и ГъэIорышIапIэ, Урысыем ошIэ-дэмышIэ Iоф­хэмкIэ и ГъэIорышIапIэ япащэхэр, общественнэ организациехэм ялIыкIохэр.
Урысыем и Президентэу Владимир Путиным пэIудзыгъэ шIыкIэм тетэу къышIыгъэ псалъэмкIэ зэIукIэр рагъэ­жьагъ. Къэралыгъом и Пащэ росгвардейцэхэм ямэфэкIыкIэ къафэгушIуагъ, Хэгъэгум зэрэфэшъыпкъэхэм, лIы­хъужъныгъэ ахэлъэу япшъэ­рылъ зэрагъэцакIэрэм апае зэрафэразэр къыхигъэщыгъ ыкIи къулыкъу мыпсынкIэу ахьырэм гъэхъэгъакIэхэр ашIынхэу афэлъэIуагъ.
«Хэбэгъэуцугъэр ыкIи цIыфхэм ящынэгъончъэн ­къэухъумэгъэнымкIэ пшъэ­дэкIыжь зыхэлъ пшъэрылъ къинхэм, бзэ­джэ­шIагъэм пэшIуекIогъэным япхыгъэ Iо­фыгъохэм язэшIо­хын Рос­гвардием иIахьышIу хе­шIыхьэ. Хэбзэ шIагъохэу ижъыкIэ къыщегъэжьагъэу Урысые империем илъэхъан
лъа­псэ зыфашIыгъагъэхэр зэрифэшъуашэу лъышъогъэ­кIуатэх, Хэгъэгу зэошхом илъэхъан ыкIи ащ нэужым нацизмэм дезыгъаштэхэрэм апэуцужьыгъэнымкIэ бэ зэшIошъухыгъэр, дунэе терроризмэу Кавказым лъапсэ щызыдзэу езыгъэжьагъэм гъогур фызэпыбзыкIыгъэнымкIи блэ­нагъэ зешъухьагъ», — къы­щыхигъэщыгъ Владимир Путиным ишIуфэс псалъэ.
Анахьэу Президентым зы­къыз­фигъэзагъэр хэушъхьафыкIыгъэ дзэ операцием хэлэ­жьэрэ росгвардейцэхэр ары. Я Хэгъэгу ахэр лIыхъужъныгъэ ахэлъэу фэзаох, шъхьафит хъу­жьыгъэ къалэхэмрэ нэмыкI псэупIэхэмрэ мамыр щыIакIэр зыпкъ ащигъэуцожьыгъэнымкIэ IэпыIэгъу афэхъух. Джащ фэдэу пэIудзыгъэ шIыкIэм тетэу Рос­гвардием иIофышIэхэм къа­фэгушIуагъ УФ-м илъэпкъ гвар­дие идзэхэм яфедеральнэ къулыкъу ипащэу, Урысыем и ЛIы­хъужъэу, дзэм игенералэу Виктор Золотовыр.
Iофтхьабзэм хэлажьэхэрэр а I-рэ Александр и УказкIэ 1811-рэ илъэсым гъэтхапэм и 27-м зэхащэгъэгъэ къулыкъум итарихъ къытегущыIагъэх. А илъэс­хэм къакIоцI къулыкъум гъэ­псыкIэу иIэр, ыцIэ, ипшъэрылъхэр зэхъокIыгъэ хъугъэх, ау анахь пшъэрылъ шъхьаIэу иIагъэр зытетым тетэу къэнэ­жьыгъ: хэбзэгъэуцугъэмрэ цIыфхэмрэ къэухъумэгъэнхэр. Адыгеим и ЛIышъхьэ къызэрэхигъэщыгъэмкIэ, илъэси 9-кIэ узэкIэIэбэжьмэ зэхащэгъэгъэ Росгвардием анахь хэбзэшIухэр IэубытыпIэ ышIыхэзэ, шIогъэ гъэнэфагъэ къытын зэрилъэкIыщтыр къы­гъэ­шъыпкъэжьыгъ, хэгъэгум ищы­нэгъончъэн икъэухъумэн чIыпIэ ин щиубытыгъ.
«НепэкIэ ар кIочIэшхо зиIэ къулыкъу, терроризмэм пэуцу­жьы, общественнэ рэхьатны­гъэр къеухъумэ, Урысыем и Конституционнэ гъэпсыкIэ, цIыфхэм ящынэгъончъэн къеухъумэх. ТичIыпIэгъухэу хэушъхьафыкIыгъэ дзэ операцием хэлажьэхэ­рэм лIыхужъныгъэрэ блэнагъэрэ ахэлъэу шъхьафит ашIыжьыгъэ чIыпIэхэм хабзэр къащаухъумэ. ТикIалэхэм тарэгушхо хэгъэгум фэшъыпкъэхэу илъэс зэфэшъхьафхэм къулыкъур тапэкIэ зыхьыгъэгъэ пстэуми афэдэу», — къыIуагъ КъумпIыл Мурат.
Росгвардием хэтхэу хэгъэгум ифедэхэр ыкIи цIыфхэм ярэхьатныгъэ къаухъумэзэ фэхыгъэхэм зы такъикърэ афэшъыгъуагъэх.
Ащ нэужым Адыгеим и ЛIы­шъхьэ къызэрэхигъэщыгъэмкIэ, УФ-м и Президентэу Владимир Путиным ТекIоныгъэшхом ия 80-рэ илъэс Хэгъэгум иухъума­кIо и Илъэсэу зэригъэнэфагъэм къегъэлъагъо лъэхъанхэр пытэу зэрэзэпхыгъэхэр, дзэ щытхъум­рэ патриотизмагъэмрэ ренэу щысэтехыпIэ зэрафэхъухэрэр.
«Шъо къулыкъоу шъухьырэр уи Хэгъэгу уфэшъыпкъэн, ащ пае узышъхьамысыжьэу къыптефэрэр бгъэцэкIэн зэрэфаем епхыгъ. Шъо непэ цыхьэшIэ­гъоу тицIыфхэм ярэхьатныгъэрэ ящынэгъончъагъэрэ къэшъоу­хъумэ. Шъо Iофэу жъугъэца­кIэрэм ишIуагъэкIэ цIыфхэр рэхьатэу мэпсэух, Iоф ашIэ, кIэлэцIыкIу­хэр апIух», — къы­Iуагъ КъумпIыл Мурат.
АР-м и ЛIышъхьэ къызэрэхигъэщыгъэмкIэ, Адыгеир ицы­хьэ зытелъыжьэу илъэс къэс ыпэкIэ лъэкIуатэ: мэкъу-мэщым, промышленностым, зекIоным, псэолъэшIыным проектипшI пчъагъэ щапхыращы, социальнэ мэхьанэ зиIэ псэуалъэхэр на­хьыбэ мэхъух, Арышъ, шъолъы­рым зыпкъитыныгъэ илъэу хэ­бзэгъэуцугъэхэр тапэкIи къыщыухъумэгъэнхэм мэхьанэшхо иI, Росгвардиеми иIофшIэн амал зэриIэкIэ нахьыбэу шIуагъэ къы­ригъэтын фае.
Республикэм и ЛIышъхьэ Гъэ­IорышIапIэм иIофышIэхэмрэ иветеранхэмрэ хэбзэгъэуцугъоу щыIэр гъэпытэгъэным, хэгъэгум ифедэхэр къэухъумэгъэнхэм яIахь зэрахашIыхьэрэм апае зэрафэразэр къыIуагъ. Анахьэу КъумпIыл Мурат рэзэныгъэ гущыIэхэр зыфигъэзагъэр хэу­шъхьафыкIыгъэ дзэ операцием хэлажьэхэрэм яIахьылхэмрэ ягупсэхэмрэ.
Iофтхьабзэм илъэхъан рес­публикэм и ЛIышъхьэ медалэу «Общественнэ рэхьатныгъэр къэухъумэгъэным иIахьышхо зэрхишIыхьэрэм пае» зыфиIорэр афигъэшъошагъ пшъэрылъ гъэ­нэфагъэ зыгъэцэкIэрэ отрядэу «Фыщтым» хэтхэм. АР-м и ЛIы­шъхьэ ирэзэныгъэ тхылъхэр аратыжьыгъэх техникэр аIэкIэгъэхьэгъэнымкIэ отделым ипащэу, подполковникэу Сергей Рубцовым, отрядэу «Фыщтым» политическэ IофшIэнымкIэ икоман­дир игуадзэу, полицием иподполковникэу Дэхъужь Заур, Урысыем и Лъэпкъ гвардие АР-мкIэ икъутамэ иотделениеу мылъку-техникэ ыкIи хъызмэт Iофхэм афэгъэзагъэм ипащэу, полицием имайорэу Ширинэ Мыхьамэт.
Мы зэIукIэм къыщыгущыIа­гъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м и Апшъэрэ хьыкум и Тхьаматэу Шумэн Байзэт, ФСБ-м и ГъэIорышIапIэу АР-м щыIэм ипащэу Михаил Кемеровыр, АР-м хэгъэгу кIоцI IофхэмкIэ иминистрэу Олег Безсмельницыныр, Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипащэ ипшъэрылъхэр зыгъэцэкIэрэ Станислав Илющенкэр, УФ-м и ФСИН и ГъэIорышIапIэу АР-м щыIэм ипащэ ипшъэрылъхэр зыгъэцэ­кIэрэ Юрий Садыковыр, Рос­гвардием и ГъэIорышIапIэу АР-м щыIэм ипащэу Даур Къэплъан. Анахь дэгъоу къахэщыгъэхэм къулыкъу тынхэр, рэзэныгъэ ыкIи щытхъу тхылъхэр араты­жьыгъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.