АР-м лъэпкъ IофхэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет щызэхэщэгъэ Общественнэ советым зэхэсыгъо джырэблагъэ иIагъ. Iофтхьабзэм къырагъэблэгъагъэх АР-м хэ­гъэгу кIоцI IофхэмкIэ и Министерствэ экстремизмэм пэуцужьыгъэнымкIэ и Гупчэ, дин ыкIи ныбжьыкIэ организациехэм ялIыкIохэр.

2024-рэ илъэсым Комитетым иIофшIэн изэфэхьысыжьхэм, общественнэ-культурнэ ыкIи дин организациехэм зэпхыныгъэ зэдыряIэу Iоф зэрашIагъэм, Хэгъэгу зэошхом ТекIоныгъэ къызщыдахыгъэр илъэс 80 зэ­рэхъурэм изыфэгъэхьазырын зэхэсыгъом щатегущыIагъэх.
Комитетым итхьаматэу Шъхьэ­лэхъо Аскэр яIофшIэн зэфэхьысыжьхэр къыфишIызэ къызэриIуагъэмкIэ, лъэпкъ ыкIи дин зэфыщытыкIэхэр гъэпытэгъэнхэм фэIорышIэрэ Iофтхьабзэу гъэрекIо республикэм щыкIуагъэхэм чанэу ахэлэжьагъэх. БлэкIыгъэ илъэсми Комитетыр зэрэкIэлъэIугъэм тетэу федеральнэ къэралыгъо программэу «Къэралыгъо лъэпкъ политикэр пхырыщыгъэныр» зыфиIорэм хэлэжьагъ. Ежьхэми ямылъку халъхьэзэ проект инищэу адыгэ культурэм, урыс культурэм, зыкIыныгъэм яма­фэхэм якIэщакIохэу Iофтхьа­бзэхэр рагъэкIокIыгъэх. Муниципальнэ образованиехэм къы­зэрэдырагъэштагъэм тетэу Iофтхьабзэхэр район гупчэхэми ащыкIуагъэх. Ахэм зэкIэмкIи нэбгырэ мин 15 — 19 фэдиз ахэ­лэжьагъэх.
Джащ фэдэу къэралыгъо программэм игъэцэкIэн хахьэу лъэпкъ зэфыщытыкIэхэр гъэпытэгъэнхэм фэIорышIэрэ лекциехэр ныбжьыкIэхэм афы­зэ­хащагъэх. АР-м иветеранхэм я Совет илIыкIохэр къыхагъэла­жьэхэзэ Хэгъэгу зэошхоу 1941 — 1945-рэ илъэсхэм щыIагъэм итарихъ кIатхыкIыжьын гухэлъ зэряIэм пэшIуекIогъэным, мы мафэхэм геополитическэ дунаеу тызтетым, лъэпкъ зэфыщытыкIэхэм яIофыгъохэм афэгъэхьыгъэу зэIукIэ 21-рэ къа­лэхэм ыкIи районхэм ащыкIуагъ. Республикэм илъ об­щественнэ-политикэ щыIакIэм еплъыкIэу фыряIэм фэгъэхьыгъэ социологие ушэтынхэр шъо­лъырым илъэс къэс щырагъэ­кIокIых.
Къэралыгъо программэхэм ягъэцэкIэн къыдыхэлъытагъэу 2024-рэ илъэсым шIэжь ма­фэхэм афэгъэхьыгъэ Iофтхьа­бзэхэм лъэпкъ-культурнэ, дин ыкIи ныбжьыкIэ организациехэр ягъусэхэу хэлэжьагъэх.
Комитетыр зыдэлэжьэрэ программэм къыхиубытэу «Ти­лъэпкъэгъухэу IэкIыб къэралхэм ащыпсэухэрэм зэпхыны­гъэу адыряIэр гъэпытэгъэныр, псэупIэкIэ Адыгеим къэкIо­жьыгъэхэр щыIэныгъэм хэгъэгъозэжьыгъэнхэр» зыфиIорэм къыдыхэлъытагъэу Iофтхьабзэ­хэр рагъэкIокIыгъэх.
— Анахь къыхэзгъэщымэ сшIоигъу Кавказ заом хэкIо­дагъэхэм яшIэжь фэгъэхьыгъэ зэхахьэу жъоныгъуакIэм и 21-м щыIагъэр. Мы илъэсми ащ нахь игъэкIотыгъэу тынаIэ тедгъэ­тыщт. Сыда пIомэ къытпэуцурэ къэралыгъохэм лъэпкъхэм азыфагу зэгурымыIоныгъэ къы­ралъ­хьан гухэлъ яIэу къэбар нэпцI­хэр зэпымыоу къаты. Уры­сы­емрэ Адыгеимрэ азыфагу илъ зэгурыIоныгъэр зэщамыгъэкъоным фэIорышIэрэ пэшIорыгъэшъ Iофтхьабзэхэр ренэу Комитетым регъэкIокIых, ахэм къахэлажьэх лъэпкъ ыкIи дин зэфэшъхьафхэм яорганизациехэр, ныбжьыкIэ купхэр. Культурэр, бзэр, шэн-хабзэхэр къызэтегъэнэгъэнхэм ыкIи хэхъоныгъэ ягъэшIыгъэным афэгъэхьыгъэ Iофыгъохэр тапэкIи лъыдгъэкIотэщтых, — къыIуагъ Шъхьэлэхъо Аскэр.
ХэушъхьафыкIыгъэ дзэ операцием епхыгъэу 2024-рэ
илъэ­сым Комитетым Iофышхо ышIагъ. Илъэсым къыкIоцI ­Комитетыр икIэщакIоу УФ-м идзэхэм зэзэгъыныгъэ шIыкIэм тетэу къулыкъур ащызыхьы зышIоигъохэм афэгъэхьыгъэ роликхэр мафэ къэс радио­станции 6-мэ къатыгъ. Ащ нэмыкIэу зэзэгъыныгъэ шIыкIэм тетэу къулыкъур зыхьыхэрэм фэгъэкIотэныгъэу яIэхэр зэ­рытхэгъэ тхьапэ мин 55-рэ фэдиз блэкIыгъэ илъэсым къыдагъэкIыгъ.
АР-м ныбжьыкIэ IофхэмкIэ и Комитет ипащэ игуадзэу Мыгу Азамат гущыIэ зыратым къы­Iотагъ лъэпкъ ыкIи дин зэфыщытыкIэхэм алъэныкъокIэ Iофышхо зэрашIэрэр. НыбжьыкIэхэм азыфагу зэгурымыIоныгъэ къимытэджэнымкIэ общест­веннэ ныбжьыкIэ организациехэр амалышIоу щытых, ащ фэдэхэр къэмыгъэхъугъэнхэм лъэшэу анаIэ тет.
АР-м иобщественнэ движениеу «Адыгэ Хасэм» итхьаматэу ЛIымыщэкъо Рэмэзан къызэриIуагъэмкIэ, адыгэхэм ямызакъоу нэмыкI лъэпкъэу рес­публикэм щыпсэухэрэм якультурэ, абзэ къэгъэнэжьыгъэн-
хэм, ныбжьыкIэхэм яхэгъэгу шIу алъэгъоу пIугъэнхэм, лъэпкъ зэфыщытыкIэхэр гъэпытэгъэнхэм адэлажьэх. Мы Iофыгъохэм язэшIохынкIэ блэ­кIыгъэ илъэсым Адыгэ Хасэм чанэу Iоф ышIагъ, республикэм щыкIогъэ Iофтхьабзэхэм зэкIэми ахэлэжьагъ.
Р. ЛIымыщэкъом къызэрэ­хигъэщыгъэмкIэ, Урысыем ис лъэпкъхэм я Ассамблее ишъо­лъыр къутамэ Адыгеим щызэхащагъ. Ар общественнэу щытыгъ. Iофтхьабзэу зэхащэхэрэм мылъкукIэ IэпыIэгъу афэ­хъугъэным пае общественнэ-­къэралыгъо шIыкIэр агъэфе­дэнэу зэдаштагъ. Мы органи­зацием лъэпкъ зэфэшъхьафхэм ялIыкIохэр хэхьэх, ахэм адыгэхэри ахэтых. Iофтхьабзэ­хэм язэхэщэнкIэ Адыгэ Хасэм мылъку къыфатIупщыгъ, мы илъэсым ар зэрищыкIагъэу агъэфедэщт.
Къэндзалхэм яобществэу «Дуслык» зыфиIорэм итхьаматэу Алим Ильясовым гушхо­ныгъэ хэлъэу къыIуагъ илъэпкъэгъухэр Адыгеим ичIыпIэ зэфэшъхьафхэм гупсэфхэу, агурыIохэу зэрэщыпсэухэрэр. Ар шIукIэ афилъэгъугъ Адыгеим ипащэхэм ыкIи мыщ щы­псэухэрэм. БэмышIэу Респуб­ликэу Татарстан и Премьер-­министрэ игуадзэу, къэндзалхэм я Дунэе конгресс и Лъэпкъ Совет итхьаматэу Василь Шайх­разиевыр IофшIэгъу дэкIыгъокIэ Адыгеим къызэкIом, ар нэрылъэгъу фэхъугъ. Ащ ирэзэныгъэ гущыIэхэр А. Ильясовым къалъигъэIэсыжьыгъ.
ЯтIонэрэ упчIэу зэхэсыгъом зыщытегущыIагъэхэр Хэгъэгу зэошхом ТекIоныгъэр къыз­щыдахыгъэр илъэс 80 зэрэ­хъурэм изыфэгъэхьазырынкIэ пшъэрылъэу щыIэхэр ары. Хабзэ зэрэхъугъэу, мыщ фэгъэ­хьыгъэу республикэм щыкIощт Iофтхьабзэхэм Комитетым игъу­сэу лъэпкъ ыкIи дин органи­зациехэр хэлэжьэщтых.
Ащ нэмыкIэу общественнэ организациехэм ялIыкIохэм лъэпкъ зэфэшъхьафхэм ягъомылапхъэхэр зэрылъ Iалъмэ­къ­хэр Адыгеим щыпсэурэ ветеранхэм, заом хэлэжьагъэхэм афащэнхэу зэдаштагъ.
КIАРЭ Фатим.