Лъэпкъ проектэу «НыбжьыкIэхэмрэ кIэлэцIыкIухэмрэ» ­зыфиIорэм къыдыхэлъытэгъэ шъолъыр проектэу «Урысыер — амалышхохэр зиIэ хэгъэгу» зыцIэр гъэцэкIэгъэным тегъэ­псыхьагъэу Адыгэ Республикэм икъэралыгъо программэу «Культурэм хэхъоныгъэ егъэшIыгъэныр» зыфиIорэм диштэу пианист ныбжьыкIэхэм язэнэ­къокъоу зэхащэгъагъэр зэфа­шIы­жьыгъ.

АР-м культурэмкIэ и Министерствэ IэпыIэгъу къафэхъузэ Мыекъуапэ искусствэхэмкIэ икIэлэцIыкIу еджапIэу N 1-м иметодическэ Гупчэ зэнэкъо­къур зэхищэгъагъ.
НыбжьыкIэхэм сэнаущыгъэу ахэ­лъыр къыхэгъэщыгъэныр, классическэ мэкъа­мэхэм афэщэгъэнхэр, культурнэ щы­IакIэм хэщэгъэнхэр, пшъэрылъ гъэнэфагъэхэр зыфагъэуцужьынхэр, ахэр щыIэныгъэм щыпхыращыжьынхэм фэпIугъэнхэр зэнэкъокъум гухэлъ шъхьа­Iэу иIагъэх.
ЛъэныкъуитIукIэ кIэлэцIыкIу еджапIэм зэнэкъокъур щыкIуагъ. «Сольное исполнительство» зыфиIорэм хэтыгъэхэр ныб­жьэу яIэмкIэ купитфэу зэтеутыгъагъэх.
ЯтIонэрэ лъэныкъоу «Ансамблевое музицирование» зыфиIорэмкIэ зэнэкъо­къур тIо зэтеутыгъагъ: нахьыкIэхэмрэ нахьыжъхэмрэ щызэнэкъокъугъэх. Пианист ныбжьыкIэ 31-рэ ыкIи искусствэхэмкIэ кIэлэцIыкIу еджапIэхэм яансамблэ 13 зэнэкъокъугъэх.
Зэнэкъокъум ыуж Iэнэ хъураеу щыIагъэм осэшIхэр, Iофтхьабзэм хэлэжьэгъэ кIэлэцIыкIухэм якIэлэегъаджэхэр щызэрэугъоигъэх, зэхэгущыIэжьыгъэх.
Iофтхьабзэм икIэух къызэригъэлъэгъуагъэмкIэ, изакъоу иIэпэIэсэныгъэ къэзыгъэлъэгъогъэ нэбгырэ 20-рэ ансамбли 9-рэ зэнэкъокъум къыщыхагъэщыгъэх. ТекIоныгъэ къыдэзыхыгъэхэм дипломхэр афагъэшъошагъ.
АнахьыкIэхэмкIэ текIоныгъэ къы­дэзыхыгъэхэ Кира Носенкэм, Глеб Уваровым, ятIонэрэ купымкIэ Бэрэтэрэ Заур, ящэнэрэмкIэ Ростислав Усенкэм, яплI­э­­­нэрэ купымкIэ Андрей Куваниным, ятфэнэрэ купымкIэ ЛIэхъусэжъ Динарэ апэрэ шъуашэ зиIэ дипломхэр афагъэ­шъошагъэх.
ЯтIонэрэ лъэныкъоу «Ансамблевое музицирование. Фортепианные ансамбли» зыфиIорэм нахьыкIэ купымкIэ Хъодэ Сафие, Хъодэ Дианэ, нахьыжъ купымкIэ Мамхъо Самие, Владислав Цыгановым апэрэ шъуашэ зиIэ дипломхэр афагъэшъошагъ. Лъэныкъоу «Ансамблевое музицирование. Аккомпанемент» зыфиIорэмкIэ Юлия Константиновам, Ксения Погребняк апэрэ шъуашэ зиIэ дипломхэр къалэжьыгъ.
Пианинэм къырагъэIонымкIэ сэ­наущыгъэу кIэлэцIыкIухэм ахэлъыр умыгъэ­шIэгъон плъэкIыщтыгъэп. Мэкъа­мэхэр икъоу агъэIорышIэхэзэ, музыкант ныбжьыкIэхэр шIыкIэшIухэм алъыхъугъэх, яплъыхэрэм искусствэм ыкIуачIэ алъагъэIэсыгъ. КIэлэ­еджа­кIохэм егъэжьэпIэшIоу ашIыгъэм уегъэгушIо. НыбжьыкIэхэм искусствэм щыпхыращырэ лъагъор щыIэныгъэм къащышъхьапэжьынэу зэхэщакIохэр мэгугъэх.
Лъэпшъыкъо
Фатим.