Мыекъопэ къэралыгъо технологическэ университетым «пчъэ зэIухыгъэхэм» ямафэ бэмышIэу щызэхащагъ. Апшъэрэ классхэм арыс кIэлэеджакIохэр ыкIи гурыт сэнэхьат зэзыгъэгъотырэ ныбжьыкIэ 300-м ехъу ащ хэлэжьагъ.

ПрофориентациемкIэ ыкIи апшъэрэ еджапIэм джыри чIэмыхьагъэхэм ягъэ­хьазырынкIэ гупчэм ипащэу Олег Франко апшъэрэ еджапIэм амалэу къытыхэрэр къэзэрэугъоигъэхэм къафиIо­тагъ. Мыщ щеджэхэрэм шIэныгъэ зэрэзэрагъэ­гъотырэм дакIоу лъэныкъо зэфэшъхьафхэм хэшIыкI афыряIэу, ящыIэныгъэкIэ ахэр къафэфедэжьынхэм Iоф зэрэдашIэ­рэр, федеральнэ проектхэм чанэу зэрахэлажьэхэрэр къыIуагъ.
— Апшъэрэ еджапIэр федеральнэ проект зэфэшъхьафхэм чанэу зэрахэлажьэрэм ишIуагъэкIэ джырэкIэ къэралыгъом нахь ищыкIэгъэ сэнэхьатхэм ныбжьыкIэхэр афагъасэх. Непэ шъуи­щыIэныгъэ зэшъупхыщт лъэныкъор къыхэшъухын амал шъуиI, — къыIуагъ ащ.

Джырэ уахътэм нахь ящыкIэгъэ сэнэхьатхэу апшъэрэ еджапIэм зыфигъэ­хьазырхэрэм ныбжьыкIэхэр нэIуасэ нэужым афашIыгъэх. Проектэу щыIэныгъэм щыпхыращыхэрэр нахь ашIогъэшIэгъоныгъэх. Ахэм ащыщ социальнэ гумэкIыгъохэр дэгъэзыжьыгъэнхэмкIэ шIэныгъэу яIэхэр зыщагъэфедэрэ проектнэ практикумыр, экономикэм епхыгъэ ушэтынэу ашIыхэрэм къадыхэ­лъытагъэ­хэр. Анахь ашIогъэшIэгъоныгъэ­хэм ащыщ проектэу «Диплом как стартап» зыфиIорэр. Федеральнэ проектэу «Платформа университетского технологического предпринимательства» зыфиIорэм къыдыхэлъытагъэу ныбжьыкIэхэм ябизнес къызэIуахынэу сомэ миллион араты.
Апшъэрэ еджапIэм амалэу къытыхэрэр приемнэ комиссием пшъэдэкIыжь зыхьырэ исекретарэу Бэрзэдж Розэ къафиIотагъ. Университетым узэрэчIэхьащтым шапхъэу пылъхэр, стипендиеу къаратырэр, ныбжьыкIэ чанхэм фэгъэкIотэнэу яIэхэр къыхигъэщыгъэх. 2025-рэ илъэсым гъэсэныгъэ программэхэм зэхъокIыныгъэу яIэщтхэм, бюджет чIыпIэхэм япчъагъэ, тхьапэхэр зэрепхьылIэщтхэм ыкIи нэ­мыкI лъэныкъохэм ащигъэгъозагъэх.
Мыекъопэ къэралыгъо технологическэ университетым учIэхьанымкIэ мэкъуо­гъум и 20-м къыщегъэжьагъэу пэIудзыгъэ шIыкIэм тетэу тхьапэхэр агъэхьынхэ алъэкIыщт. АщкIэ къэралыгъо фэIо-фа­шIэхэмкIэ порталым унэе кабинетыр е сервисэу «ПэIудзыгъэ шIыкIэм тетэу апшъэрэ еджапIэм чIахь» зыфиIорэр къызфагъэфедэнхэ амал яI.
КIэухым ныбжьыкIэхэр факультетхэм арагъэблэгъагъэх, егъэджэн лабораториехэр къарагъэплъыхьагъэх, кIэлэегъа­джэхэм нэIуасэ афэхъугъэх, зыгъэгумэкIырэ упчIэхэм яджэуапхэр агъоты­жьыгъ.
Делэкъо Анет.