Адыгэ къэралыгъо университетымрэ Шарда (Индиер) дэт университетымрэ зэзэгъыныгъэу зэдашIыгъэм ишIуагъэкIэ илъэсыкIэ еджэгъум къыщегъэжьагъэу программэу «Дунэе зэфыщытыкIэхэр» зыфиIорэмкIэ апэрэ сетевой магистратурэ зэхащэщт.

Программэм къызэрэдилъытэрэмкIэ, студентхэр илъэситIо рагъэджэщтых. Адыгэ къэралыгъо университетым гуманитар шIэныгъэхэмкIэ ыкIи культурэмкIэ и Институт хэушъхьафыкIыгъэ егъэджэнхэр пэIудзыгъэ шIыкIэр къызфагъэфедэзэ щызэхащэщтых. Егъэджэн сыхьатхэр зэкIэ инджылызыбзэкIэ кIощтых. Мыщ фэдэ егъэджэн Адыгэ къэралыгъо университетым апэрэу зэхещэ. Индием щыщ студентхэр илъэсыкIэ еджэгъум аштэнхэу агъэнафэ, нэужым нэмыкI къэралыгъохэм яныбжьыкIэхэри рагъэджэщтых.
— Дунэе зэфыщытыкIэхэмкIэ ыкIи IэкIыб политикэмкIэ Индием къэгъэлъэгъон дэ­гъухэр иIэх. Урысыем тарихъ зэпхыныгъэу дыриIэр нэмыкIхэм ящысэтехыпI. Дунэе зэфыщытыкIэмкIэ специалистхэр тызэ­гъусэу дгъэхьазырхэмэ тизэпхыныгъэ нахь пытэ хъущт, — къыIуагъ АКъУ-м иректорэу Мамый Даутэ.
Дунэе зэфыщытыкIэхэр, IэкIыб политикэр, Урысыем итарихъ, икультурэ, зэгурымыIоныгъэхэм ядэгъэзыжьын, дунэе ушэтынхэр, IэкIыб политикэм идипломатие ыкIи нэмыкIхэр магистрантхэм зэрагъэшIэщтых. Дунэе организациехэм Iоф ащыпшIэнымкIэ шIэныгъэу пIэкIэлъын фаер ары анахьэу егъэджэн программэр зыфэгъэхьыгъэщтыр.
Sharda University зыфиIорэр унэе университет, ар Индием иштатэу Уттар-Прадеш щыI. 2009-рэ илъэсым къызэIуахыгъ, Шарда дэт егъэджэпIэ купхэм ащыщ. Университетым икъутамэхэр Агрэ ыкIи Узбекистан адэтых.
Университетым бакалавриатым, аспирантурэм ыкIи докторантурэм илъэныкъо зэфэшъхьафхэмкIэ, зэкIэмкIи программи 135-кIэ егъэджэнхэр щызэхащэх. Ахэм ахэтых инженериер, менеджментыр, медицинэр, стоматологиер, архитектурэр, юриспруденциер ыкIи нэмыкIхэр. 2024-рэ илъэсым NIRE зэригъэунэфыгъэмкIэ, ИндиемкIэ университетым я 86-рэ чIыпIэр ыубытыгъ.
Адыгэ къэралыгъо университетым ипресс-къулыкъу.