АР-м и Къэралыгъо Совет — Хасэм я XLIV-рэ зэхэсыгъоу иIагъэм ­къулыкъу зэ­фэшъхьаф­хэм яIофшIагъэ щызэфахьысыжьыгъ, респуб­ликэ хэбзэгъэуцугъэ­хэм анэмыкIэу, федераль-
нэ гупчэм фэгъэзэгъэ джэ­псалъэхэр щаштагъэх.

Зэхэсыгъом АР-м и ЛIы­шъхьэу КъумпIыл Мурат, ми­нистрэхэм я Кабинет хэт­хэр, шъолъыр ыкIи феде­ральнэ къулыкъухэм, на­роднэ депутатхэм ясоветхэм япа­щэхэр хэлэжьагъэх. Iоф­тхьабзэр зэрищагъ Парламентым и Тхьаматэу Владимир Нарожнэм.
ЗэкIэмэ апэ зытегущыIагъэхэр АР-м и Къэралыгъо Совет — Хасэм илIыкIоу Очылхэм япалатэ иквалификационнэ комиссие хагъэхьащтхэр ары. Шъолъыр Пар­ламентым и Регламент ия 150-рэ статья ар къыдэлъытагъ. Мыекъопэ къэралыгъо технологическэ университетым административнэ ыкIи уголовнэ правэмкIэ икафедрэ идоцентэу, юридическэ шIэныгъэхэмкIэ кандидатэу Джамырзэ Бэллэрэ УФ-м и Социальнэ фонд и Къутамэу АР-м щыIэм и ГъэIорышIапIэу страхованиехэмкIэ взносхэм афэгъэзагъэм ипащэу Мамырыкъо Людмилэрэ яканди­датурэхэр къагъэлъэгъуагъэх ыкIи депутатхэм ахэм адырагъэштагъ.
АР-м хэгъэгу кIоцI IофхэмкIэ и Министерствэ икIыгъэ 2024-рэ илъэсым Iофэу ышIагъэм щигъэгъозагъэх къулыкъум ипащэу, полицием иге­нерал-майорэу Олег Безсмельницыным. Ащ къызэриIуагъэмкIэ, Урысыем хэ­гъэгу кIоцI IофхэмкIэ и Министерствэ ичIыпIэ къулыкъу­хэм Iофэу ашIэрэр зызэ­рагъапшэм я 23-рэ чIыпIэр аубытыгъ. Лъэныкъо зэфэ­шъхьафхэмкIэ, гущыIэм пае, бзэджэшIэгъэ хьылъэхэр ыкIи хьылъэ дэдэхэр, къэбарлъыгъэIэс шIыкIэхэр агъэфедэзэ зэрахьэхэрэр къызэрэ­зэ­Iуа­хыхэрэмкIэ республикэр пэщэныгъэ зыIыгъ шъолъыр­хэм ащыщ. Общественнэ чIыпIэхэм ящынэгъончъагъэкIэ хэгъэгум апэрэ чIыпIэр щеу­быты.
АР-м и ЛIышъхьэ докладым еплъыкIэу фыриIэр къыриIотыкIызэ, хэушъхьафыкIыгъэ дзэ операциер зырагъэжьагъэм къыщыублагъэу хэбзэухъумэкIо къулыкъухэм атегъэуагъэр нахьыбэ зэрэхъугъэр, ау ащ пае къэмынэу, къэгъэлъэгъонэу яIэхэм къызэращамыгъакIэрэр къыхигъэщыгъ.
— Олег Безсмельницыным, АР-м хэгъэгу кIоцI IофхэмкIэ и Министерствэ зэрэщытэу Iофэу ашIэрэм шIуагъэ къызэрихьырэр тинэрылъэгъу. Полицием хэбзэ гъэцэкIэкIо къулыкъухэм, хэ­бзэихъухьэхэм, нэмыкI хэбзэухъумакIохэм адэлажьэзэ, цIыфхэм ящынэгъончъагъэ, шъолъырым рэхьатныгъэу ­илъыр къыухъумагъэх. ЦIыфхэм щы­IэкIэшIу яIэнымкIи, республикэм иэкономикэ зыпкъ итэу хэхъоныгъэхэр ышIынхэмкIи, инвесторхэр къеблэгъэнхэмкIи ащ мэхьанэшхо иI. ТапэкIи Ми­нистерствэм ищыкIагъэм тетэу тыдеIэщт, иматериальнэ-техническэ базэ гъэкIэжьыгъэнымкIэ IэпыIэгъу тыфэхъущт. Джащ фэ­дэу иIофышIэхэм къащымыкIэным фэшI ащ ихэушъхьафыкIыгъэ купхэм ахъщэ тедзэу афэдгъэнэфагъэхэм ятын лъыд­гъэкIотэщт, — къыIуагъ Къум­пIыл Мурат.
Джащ фэдэу АР-м и Уплъэ­кIокIо-лъытэкIо палатэ 2024-рэ илъэсымкIэ Iофэу ышIагъэр къы­зэфихьысыжьыгъ ащ ипащэу Павел Стаценкэм. Ащ къызэриIуагъэмкIэ, уплъэкIун Iоф­тхьа­бзэу зэхащэхэрэр, специалистхэм къыхагъэщырэ хэукъоны­гъэу дагъэзыжьыхэрэр илъэс къэс нахьыбэ мэхъу. ГущыIэм пае, икIыгъэ илъэсым палатэм иинспекторхэмрэ иаудиторхэмрэ бюджетыр зыпэIухьагъэу ауплъэ­кIугъэр ахъщэкIэ къэпIон зы­хъу­кIэ сомэ миллиарди 4,4-рэ мэхъу. Джащ фэдэу сомэ миллиарди 2 фэдиз ауасэ мылъку гъэфедагъэ зэрэхъугъэми зыщагъэгъозагъ. Сыд фэдэрэ лъэныкъуи хэукъоныгъэ ин къы­хагъэщыгъэп.

Федеральнэ гупчэм фэгъэзэгъэ джэпсалъэу депутатхэр зытегущыIагъэхэм ащыщ «унэгъо ипотекэм» фэгъэхьыгъэр. ПсэупIэ квадрат метрэм ыуасэ лъэшэу зэрэхахъорэм къыхэкI­кIэ, мы ипотекэр зыгъэфедэхэ­рэм зы комнатэ нахьыбэ мы­хъурэ фэтэр е «студиекIэ» за­джэхэрэм нахь ин къащэфын алъэкIырэп. ЗэрэхъурэмкIэ, программэр зыфытегъэпсы­хьагъэхэр, унагъохэм псэупIэ хъоо-пщаохэр яIэнхэр, демографием ылъэныкъокIэ Iофхэр нахьышIу шIыгъэнхэр, сабыйхэр нахьыбэу къагъэхъунхэр гъэцэ­кIагъэхэ хъурэп. Депутатхэм ар къыхагъэщызэ, программэм узэрэхэлэжьэщт шапхъэхэм зэхъокIыныгъэхэр афэшIыгъэнхэ фаеу алъытагъ, ар къызщи­Iорэ джэпсалъэр УФ-м и Правительствэ и Тхьаматэ игуадзэу Татьяна Голиковам фагъэхьыгъ.
УФ-м и Къэралыгъо Думэ къэралыгъо гъэпсынымкIэ ыкIи хэбзэихъухьанымкIэ и Комитет ипащэу Павел Крашенинниковым фэгъэзэгъэ джэпсалъэу Адыгеим идепутатхэр кIэщакIо зыфэхъугъэхэр наркотикхэр хэбзэнчъэу зыгъэзекIохэрэм апэшIуекIогъэным епхыгъ. Мы лъэныкъомкIэ Iофтхьабзэу зэшIуахырэр мымакIэми, ар зыгъэфедэхэрэм япчъагъэ хэхъо. Анахьэу гумэкIыгъо къэзытырэр кIэлэцIыкIоу, зихэхъогъоу наркотик зыгъэфедэхэрэр нахь макIэ зэрэмыхъухэрэр ары. Депутатхэм ар къыхагъэщы.
Джащ фэдэу мэкъумэщ чIыгухэм, гъогурыкIоным изэхэщэн, къолъхьэ тын-Iыхыным пэшIуе­кIогъэным, культурэм, нэмыкI­хэм афэгъэхьыгъэ хэбзэгъэуцугъэхэм зэхъокIыныгъэхэр афэшIыгъэнхэм афэгъэхьыгъэ законопроектхэр, законхэр депутатхэм аштагъэх.
ХЪУТ Нэфсэт.