АР-м наркотикхэм апэшIуекIо­гъэнымкIэ и Комиссие изэхэсыгъоу Адыгеим и ЛIышъхьэу КъумпIыл Мурат тхьамэтагъор зыщызэрихьагъэм хэлэжьагъэхэр зытегущыIагъэхэр наркотикхэр хэбзэн­чъэу зэрагъэзекIохэрэм ылъэныкъо­кIэ бзэджэшIагъэхэр къыхэгъэщыгъэнхэр, хэбзэ къулыкъухэм яIоф­шIэн чIыпIэхэм нахь дэгъоу ащы­зэхащэныр, республикэм наркотикхэм алъэныкъокIэ иIофхэм язытет уплъэкIугъэныр ары.

Зэхэсыгъом хэлэжьагъэх АР-м и Къэ­ралыгъо Совет — Хасэм и Тхьаматэу Владимир Нарожнэр, АР-м иминистрэхэм я Кабинет хэтхэр, хэбзэухъумэкIо къулы­къухэм яIэшъхьэтетхэр, чIыпIэхэм япащэхэр. Урысыем хэгъэгу кIоцI IофхэмкIэ и Министерствэ нароктикхэр зэрагъэзекIохэрэм иуплъэкIункIэ и ГъэIорышIапIэу АР-м щыIэм итхьаматэу Елена Аврашко къызэриIуагъэмкIэ, 2024-рэ илъэсым республикэм наркотикхэм япхыгъэ бзэджэшIэгъэ 609-рэ къыщыхагъэщыгъ, ахэм ащыщэу 127-р наркотикыбэмэ япхыгъэу щытыгъ. Нэбгыри 105-мэ уголовнэ пшъэдэкIыжь арагъэ­хьыгъ, ахэр наркотикхэм япхыгъэ бзэ­джэшIагъэхэм ахэлэжьагъэу щытыгъэх. Наркотик килограмм 11 фэдиз хэбзэнчъэу агъэзекIощтыгъэу къакъуахыгъ.
Ащ нэмыкIэу республикэм ихэбзэухъу­мэкIо къулыкъухэм административнэ хэбзэукъоныгъэ 781-рэ къыхагъэщыгъ, ахэр хэбзэнчъэу наркотикхэр зэрагъэфедагъэхэм епхыгъэх, нэбгырэ 650-мэ административнэ пшъэдэкIыжь арагъэ­хьыгъ.
Наркотикхэм ягъэфедэнрэ ягъэзе­кIонрэ апэуцужьыгъэнымкIэ къулыкъум иIофышIэхэм интернет-сайт ыкIи хъытыу адрес 222-рэ къыхагъэщыгъ, ахэм наркотикхэр ахэтIупщыхьэгъэнхэм епхыгъэ Iофыгъохэр ащызэрахьэщтыгъэх. Ащ фэдэ къэбархэу цIыфхэм япсауныгъэкIэ зэрар къэзыхьынэу щытхэм гъогур афы­зэпыбзыкIыгъэным фэгъэхьыгъэ тхылъхэр Роскомнадзорым фагъэхьыгъагъэх. БзэджэшIэ онлайн-тучан заули зэфа­шIыжьыгъагъ.
Хьапсхэм ачIэсхэм наркотикхэм япхы­гъэ бзэджэшIагъэхэр зэрамыхьанхэм ылъэныкъокIэ Iофтхьабзэхэу зэрахьэхэ­рэм къатегущыIагъ Урысыем и ФСИН и ГъэIорышIапIэу АР-м щыIэм ипащэ ипшъэрылъхэр зыгъэцэкIэрэ Юрий Садыковыр. Ащ къепхыгъэ учреждениехэм 2024-рэ илъэсым хэбзэнчъэу наркотикхэр зэрагъэфедагъэхэм пае зиIоф аIогъэ бзэджэшIэ 467-рэ ачIэсыгъ. Хьапсдэсхэм наркотикхэр аIэкIамыгъэ­хьанхэм пае пщыныжь зыщарагъэхьырэ учреждениехэм къапэIулъ чIыпIэхэр видео­лъыплъэным иамалхэмкIэ зэтырагъэпсыхьагъэх, АР-м хэгъэгу кIоцI Iоф­хэмкIэ и Министерствэ иIофышIэхэр ягъусэхэу а чIыпIэхэм уплъэкIун Iофхэр ащызэрахьэх.
Муниципальнэ образованиехэм хэ­бзэнчъэу наркотикхэр къащырамыгъэ-­
кIо­кIынымкIэ Iофэу агъэцакIэрэр къаIотагъ Адыгэкъалэ имэрэу Хьачмамыкъо Азэматрэ Кощхьэблэ районым ипащэу Хьамырзэ Зауррэ.
Хьачмамыкъо Азэмат къызэриIуа­гъэмкIэ, кIэлэеджакIохэм гурыгъэIон Iофтхьабзэхэр адызэрахьэх, культурэмрэ гъэсэныгъэмрэ япхыгъэ Iофыгъохэр къа­Iэтых, кIэлэцIыкIухэмрэ ныбжьыкIэ­хэмрэ нахьыбэу спортым хэщэгъэнхэмкIэ Iоф гъэнэфагъэ агъэцакIэ. Хэбзэухъу­мэкIо къулыкъухэмрэ комиссиехэмрэ язэдэлэжьэныгъэ нахь дэгъоу гъэпсыгъэ­ным анаIэ тырагъэты.
Хьамырзэ Заур къызэриIуагъэмкIэ, анахь шIуагъэ къэзыхьырэ Iофтхьабзэхэм зыкIэ ащыщ чIыпIэхэм ащыпсэухэрэм гурыгъэIон IофшIэныр адызехьэгъэныр.
Республикэм и ЛIышъхьэ къаIуагъэхэр зэфихьысыжьхэзэ къызэрэхигъэщыгъэм­кIэ, мы лъэныкъомкIэ анахьэу зишIуагъэ къэкIощтхэм ащыщ чIыпIэхэм яхэбзэ къулыкъухэмрэ участкэ уполномоченнэ­хэмрэ язэдэлэжьэныгъэ нахь тэрэзэу зэхэщэгъэныр.
«Наркотикхэм цIыфхэр ядгъэкIоды­лIэхэ хъущтэп. Муниципалитетхэм япащэ­хэм зафигъазэзэ ащ къыIуагъ Кощхьэблэ районым цIыфхэм Iоф адэшIэгъэнымкIэ екIолIакIэу агъэфедэрэм кIырыплъынхэу, хэгъэгу кIоцI IофхэмкIэ Министерствэм къэбархэр IэкIагъахьэхэзэ ашIынэу. Уры­­сыеми Президент лъэпкъ пшъэры­лъэу къыгъэуцугъэхэм зыкIэ ащыщ цIыф­хэр къэухъумэгъэнхэр. Ащ къикIырэр цIыфым къыгъашIэрэр нахьыбэ шIыгъэнымкIэ ищыкIэгъэ амалхэр егъэ­гъотыгъэнхэр ары. БэгъашIэ зэрэхъущтхэм дакIоу, псауныгъэ пыти яIэным тынаIэ зэкIэми тедгъэтын фае. А Iоф­шIэнышхом изы Iахьэу щыт наркоманием гъогур фызэпыбзыкIыгъэныр», — къыхигъэщыгъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.