Адыгэ Республикэмрэ Краснодар краимрэ ащыпсэурэ быслъымэнхэу нэкIыр зыIыгъхэу нэбгырэ 1500-м ехъу пчыхьэ нэмазым ыуж Адыгэ Республикэм и ЛIышъхьэ имылъкукIэ Мыекъуапэ и Гупчэ мэщыт тыгъуасэ щыха­гъэIэжьыгъэх.

Зэхахьэм цIыф бэдэдэ къе­кIолIагъ. Пчыхьэм ахэр хагъэ­Iэжьынхэм фэшI мэфэ реным пщэрыхьагъэх. ЦIыфхэр бэ зэрэхъущтыгъэм къыхэкIэу Мые­къуапэ дэт мэщытышхом къыпэIулъ пчэгум Iанэхэр щызэрагъэфагъэх. Пчыхьэ нэмазым ыуж зэкIэ ифтарым къекIолIагъэхэр агъэшхагъэх.
Мэщытым иIофышIэхэм тызэ­рэщагъэгъозагъэмкIэ, къэ­кIощт нэбгырэ пчъагъэр гъэнэфагъэу зэрамышIэрэм къыхэ­кIэу, хэти мышхэу IумыкIыжьыным фэшI, нэбгырэ мин 1,5-м ехъумэ ателъытагъэу пщэрыхьагъэх. ШIушIэ Iофтхьабзэм мэхьанэ­шхо зэрэратырэм къеу­шы­хьаты ащ къекIолIэрэ нэб­гырэ пчъагъэм илъэс къэс зэ­рэха­хъорэр.
Адыгэ Республикэм ыкIи Пшы­зэ шъолъыр ащыпсэурэ быслъы­мэнхэм я ДиндэлэжьапIэ имуфтий игуадзэу ХъокIо Заурбый:
— Хабзэ хъугъэу Къадыр чэщым тефэу КъумпIыл Мурат нэкIыр зыIыгъыгъэхэр хегъэ­Iэ­жьых. ЗэкIэ быслъымэнэу непэ мыщ къекIолIагъэхэм ацIэ­кIэ «тхьауегъэпсэу» етэIо, тыфэраз. Мыр Iоф дэгъоу щыт, шIошъхъу­ныгъэ зиIэ быслъымэнхэр зэха­хьэх, зэдыхэIэжьых, Алахьталэм елъэIух. Мы шIушIэ Iофтхьабзэм гуфэбэныгъэрэ шIулъэгъуныгъэ­рэ цIыфхэм азыфагу къырелъхьэ. Ар зыпкъ къикIыгъэхэм, хэлэжьагъэхэм шыкур фашIы­жьы. Джыри бэрэ тапэ итынэу, узынчъагъэ иIэнэу ЛIышъхьэм тыфэлъаIо. Непэ нэкIыр зыIыгъ­хэм тапэкIи ар тIыгъын амал тиIэнэу, ткIуачIэ къыхьынэу Тхьэм селъэIу. Анахь шъхьаIэр узынчъагъэр арышъ, зэкIэми ар къытет. Тикъэралыгъо мамырэу, тиунагъохэм гъэбэжъур арылъэу тыщыIэнэу хэтрэ быслъы­мэни фэсэIо.
КIАРЭ Фатим.