Top.Mail.Ru

Зэрифэшъуашэу зэхащэщт

Image description
Iэшъынэ С.

2024-рэ илъэсым ибжы­хьэ дзэ дэщыгъо икIэ­ух­хэр зыщызэфахьысы­жьыгъэ, къихьэгъэ илъэсым игъатхэ ар зэрэзэхащэщтым фэгъэхьыгъэ зэхэсыгъо АР-м и Правительствэ зычIэт Унэм щыкIуагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, министрэхэр, муниципальнэ об­­разованиехэм япащэхэр, хэ­гъэгу кIоцI IофхэмкIэ, ошIэ-дэ­мы­шIэ IофхэмкIэ министерст­вэхэм, прокуратурэм, ДОСААФ-м ялIыкIохэр, республикэ ыкIи район дзэ комиссариатхэм якъулы­къушIэхэр.
АР-м иминистрэхэм я Кабинет и Тхьаматэу КIэрэщэ Анзаур зэхэсыгъор къызэIуихызэ, къэралыгъом и УIэшыгъэ КIуа­чIэхэр гъэпсыгъэнхэмкIэ дзэ дэщыгъо кампанием изэхэщэн мэхьанэ зэриIэр къыхигъэщыгъ.
Илъэс къэс къытфагъэ­нэфэрэ пшъэрылъыр еIолIэн­чъэу зэрэдгъэцакIэрэм фэдэу мы­гъэ­рэ гъэтхэ дзэ дэщыгъори зэ­хэтщэн фае. Дзэ къулыкъур зы­хьыщт нэбгырэ 600 фэдиз рес­публикэм икIыщт, гражданскэ пшъэдэкIыжьэу ащкIэ ныбжьыкIэхэм яIэр къагурыгъэIогъэн фае,хигъэунэфыкIыгъ министрэхэм я Кабинет и Тхьаматэу КIэрэщэ Анзаур.
2024-рэ илъэсым ибжыхьэ дзэ дэщыгъо зэрэкIуагъэм щигъэгъозагъэх АР-м идзэ комиссариат ипащэу Александр Аве­риным. Ащ къызэриIуагъэмкIэ, блэкIыгъэ бжыхьэ дзэ дэщы­гъом аныбжьыкIэ къулыкъу ахьынэу къызытефэрэ нэбгырэ мини 3 фэдиз чIыпIэ комиссариатхэм къякIолIагъ. ИкIыгъэ илъэсым ибжыхьэ нэбгырэ 400 фэдиз Урысыем и УIэшыгъэ КIуачIэхэм ащагъ. АщкIэ Адыгеим пшъэ­рылъыр ыгъэцэкIагъ.
ИкIыгъэ илъэсым ибжыхьэ дзэ дэщыгъо епхыгъэ Iофтхьабзэр комиссариатым дэгъоу зэ­хищагъ ыкIи пшъэрылъэу къытфагъэнэфагъэр икъоу зэшIотхыгъ. Къыхэзгъэщымэ сшIои­гъу зэгурымыIоныгъэ цIыф­хэмрэ военкоматымрэ азыфагу къимыхьэу, хэбзэу­къо­ны­гъэхэр хэмыхъухьэхэу ар зэ­рэ­рекIокIыгъэр, къыIуагъ дзэ комиссар шъхьаIэм.
Александр Авериным къызэриIуагъэмкIэ, дзэ-учетнэ сэнэ­хьатхэмкIэ Урысыем и ДОСААФ игъэсэныгъэ организациехэм нэбгырэ 70-рэ фэдиз къагъэ­хьазырыгъ. АщкIэ Къыблэ дзэ округым къафигъэуцугъэ пшъэ­рылъыр проценти 100-м ехъоу агъэцэкIагъ. Арэу щыт нахь мышIэми, зефэнымкIэ ушэтынхэр атыным къиныгъохэр къыпыкIыгъэх, икIэрыкIэу зыты­жьыгъэхэри къахэкIыгъэх. Ащ епхы­гъэу зэхэсыгъом хэлажьэ­хэрэм анаIэ тыраригъэдзагъ мэлылъфэгъум и 1-м къыщегъэ­жьагъэу ушэтынхэм зэхъокIыныгъэ зэрафашIыгъэр. Гъэтхэ дзэ дэщыгъоми къыдыхэлъы­тагъэу, дзэ-учетнэ сэнэхьатхэмкIэ нэбгырэ 70-рэ фэдиз къагъэ­хьазырынэу щыт.
БлэкIыгъэ бжыхьэ дзэ дэщыгъом апшъэрэ гъэсэныгъэ зиIэ нэбгырэ 40-м ехъу, спорт разряд зиIэ нэбгыри 6, спортымкIэ мастер хъуным икандидатыцIэр зиIэ нэбгыри 5 къулыкъум арагъэщагъ.
Александр Авериныр къызщыуцугъэхэм ащыщ дзэ-патриотическэ пIуныгъэр республи-
кэм зэрэщылъагъэкIуатэрэр. Мы лъэныкъом Адыгеим и ЛIышъхьэу КъумпIыл Мурат лъэшэу ынаIэ зэрэтыригъэтырэр зэхэсыгъом щыхагъэунэфыкIыгъ. НыбжьыкIэ армейцэ 8875-рэ мы уахътэм республикэм щатхыгъ. «Юнармием» игъогу картэ къыдыхэлъытагъэу, 2024-рэ илъэсым ащ исатырхэм нэбгырэ 1525-рэ аштагъ, 2025-рэ илъэсым ныбжьыкIэ 360-рэ фэдиз хагъэхьагъ.
Дзэ комиссар шъхьаIэм зэхэ­сыгъом хэлажьэхэрэм анаIэ зытыраригъэдзагъэхэм ащыщ бжыхьэ дзэ дэщыгъом илъэ­хъан макъэ зэрамыгъэIушъугъэу зы­лъыхъухэрэр нэбгыри 156-рэ зэрэхъухэрэр ыкIи ахэр зыдэтхэгъэхэ районхэр.
Гъэтхэ дзэ дэщыгъоу къэблагъэрэм дзэм къулыкъу щызы­хьынэу зыныбжьыкIэ зытефэ­хэрэр нэбгырэ минищым ехъу, ащ щыщэу 2600-рэ фэдизмэ макъэ арагъэIугъ, нэбгырэ 400 фэдизмэ ушъхьагъу зэфэшъхьафхэм апкъ къикIыкIэ джыри анэсыгъэхэп.
Нэужым къэгущыIагъэх АР-м гъэсэныгъэмрэ шIэныгъэмрэкIэ иминистрэу Евгений Лебедевыр, псауныгъэр къэухъумэгъэнымкIэ министрэу Мэрэтыкъо Рустем, АР-м общественнэ рэхьатны­гъэр къэухъумэгъэнымкIэ полицием ипащэ игуадзэу Андрей Федосеевыр, Урысыем и ДОСААФ и Адыгэ шъолъыр къутамэ итхьа­матэу Барцо Тимур.
Зэхэсыгъом кIэух зэфэхьысыжьхэр фашIызэ, гъэтхэ дзэ дэщыгъом ипшъэрылъ шъхьа­Iэхэм язэшIохынкIэ анахьэу анаIэ зытырагъэтын фаехэр КIэ­рэщэ Анзаур къыгъэнэфа­гъэх. Мэлылъфэгъум и 1-р къэ­мысызэ зыныбжьыкIэ къулыкъур зыхьынэу къызытефэхэрэм яна­хьыбэм макъэ арагъэIун, зызыгъэбылъхэрэм якъэгъотын фэгъэзагъэхэм Iофыр агъэлъэшынэу афигъэпытагъ. ЦIыфхэр дзэ къулыкъум фэгъэхьазырыгъэнхэмкIэ гъэсэныгъэ учреждениехэм ящыкIэгъэ кабинетхэр, спорт псэуалъэхэр ягъэгъотыгъэным нахь анаIэ тырагъэтын зэрэфаер къыхигъэщыгъ.
Дэщын кампаниер зэхэщэгъэ­ным муниципальнэ образованиехэм япащэхэм яIахьышIу зэрэхалъхьан фаем министрэ­хэм я Кабинет и Тхьаматэ къы­кIигъэтхъыгъ. Сыда пIомэ мыхэр чIыпIэхэм ащыIэ комиссиехэм ятхьаматэх.
Iэшъынэ Сусан.