Теннис цIыкIумкIэ Къыблэ фе­деральнэ шъолъырым ипер­венствэ Адыгэ Республикэм иныбжьыкIэ командэ ящэнэрэ чIыпIэр къыщыдихыгъ. Ростов-на-Дону щыкIорэ зэнэкъокъум зыныбжь илъэс 14-м емыхъугъэ кIалэхэр ыкIи пшъашъэхэр хэлажьэх.

Адыгэ Республикэр нэбгыри 9-мэ къагъэ­лъагъо. Ахэм Мыекъопэ спорт еджапIэу С. М. Джэнчатэм ыцIэ зыхьырэм ыкIи Тэхъутэмы­къое районым испорт еджапIэу N 3-м защагъасэ.
Апэрэ мафэм команднэ зэнэкъокъухэр рагъэкIокIыгъэх. Адыгеим илIыкIохэу Артем Вариводиным, Кирилл Панькиным, Матюшинхэу Адамрэ Эльдаррэ зэIукIэгъуитIу яIагъ. Апэрэр Къалмыкъ Республикэм къышIуахьыгъ, пчъа­гъэр — 3:1. ЯтIонэрэм, финалныкъо едзыгъом, Ростов хэкум икомандэ щыIукIагъэх ыкIи 1:3-у бысымхэр нахь лъэшыгъэх.

ЗэкIэмкIи команди 6-мэ заушэтыгъ, Адыгеим испортсменхэм джэрз медальхэр къахьыгъэх. Непэ унэе зэнэкъокъухэр рагъэжьагъэх. ТикIалэхэр ыкIи пшъашъэхэр лъэгэпIэ­шIухэм анэсынхэу, республикэм ыцIэ дахэкIэ рарагъэIонэу тафэлъаIо.