Гъэтхапэм и 27-р — Урысые Федерацием илъэпкъ гвардие идзэхэм я Маф
Урысыем илъэпкъ гвардие иIофышIэхэу лъытэныгъэ зыфэтшIыхэрэр!
Шъуисэнэхьат епхыгъэ мэфэкIым – Урысыем илъэпкъ гвардие идзэхэм я Мафэ фэшI тышъуфэгушIо!
Обществэм зыпкъитыныгъэ хэлъынымкIэ, лъэпкъ щынэгъончъэныр щыIэнымкIэ Росгвардием мэхьанэшхо иI, цIыфхэм яфитыныгъэхэмрэ яшъхьафитыныгъэрэ якъэухъумэнкIэ пшъэрылъыбэ ащ зэшIуехы.
Ухьазырныгъэ дэгъу зэряIэм пае Росгвардием иподразделениехэр ошIэ-дэмышIагъэ зыхэлъ тхьамыкIагъохэмкIэ къатефэрэр ашIэным ренэу фэхьазырых, хэбзэукъоныгъэхэр щымыIэнхэм анаIэ тырагъэты.
Росгвардием иIофышIэхэм ялIыхъужъныгъэ, ясэнэхьат IэпэIэсэныгъэ, япшъэрылъхэм зэрафэшъыпкъэхэм яшIуагъэкIэ къулыкъум ыпашъхьэ ит Iофыгъохэр шIуагъэ хэлъэу тапэкIи зэрэзэшIуахыщтхэм тицыхьэ телъ.
Урысые Федерацием илъэпкъ гвардие идзэхэм я Федеральнэ къулыкъу и ГъэIорышIапIэу Адыгэ Республикэм щыIэм хэтхэм республикэм щыпсэурэ цIыфхэм ярэхьатныгъэ къаухъумэзэ, якъулыкъу пшъэрылъхэр агъэцэкIэнхэм ыкIи Урысыем ифедэхэм якъэухъумэн ренэу зэрэфэхьазырхэм апае тызэрафэразэр къэтэIо.
Анахьэу тызыфэразэхэр хэбзэгъэуцугъэр укъуагъэ мыхъуным фэгъэзэгъэ дзэхэм яветеранхэр ары. Ахэм гуетыныгъэ фыряIэу Iоф зэрашIагъэм, шIэныгъэ куоу яIэхэр яIофшIэнкIэ зэрагъэфедагъэхэм, зышъхьамысыжьхэу, блэнагъэ ахэлъэу къатефэрэр зэрэзэшIуахыгъэм апае росгвардейцэ ныбжьыкIэхэм ящысэтехыпIэу ренэу щытыщтых.
Псауныгъэ пытэ, щыIэкIэшIу шъуиIэнэу, шъуиунагъохэм тынчыгъэ-зэгурыIоныгъэ дахэ арылъынэу, Хэгъэгум ифедэ зыхэлъ къулыкъум гъэхъагъэхэр щышъушIынхэу шъуфэтэIо!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу
КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр