ЩынэгъончъэнымкIэ мэхьанэшхо зиIэ къулыкъу

2016-рэ илъэсым мэлылъфэгъум и 5-м УФ-м и Президент иунашъокIэ УФ-м илъэпкъ гвардие и Федеральнэ къулыкъу Урысыем щызэхащагъ.
Къэралыгъо дзэ организациеу лъэпкъ гвардиер къэралыгъо ыкIи общественнэ щынэгъончъэныр, цIыфхэм яфитыныгъэхэр ыкIи яшъхьафитыныгъэ къэухъумэгъэнхэм фэIорышIэ. Ащ хахьэх подразделениехэу ОМОН-р, СОБР-р, авиаотрядыр, вневедомственнэ ухъумэныр, нэмыкIхэри. НэмыкI къулыкъухэм ягъусэу Урысые гвардиер экстремизмэм ыкIи терроризмэм ябэныгъэным иIофыгъохэм, общественнэ рэхьатныгъэр, къэралыгъо псэолъэ шъхьаIэхэр къэухъумэгъэнхэм, хэбзэнчъэу къырагъэкIокIырэ Iашэхэм гъунэ алъыфыгъэным, экстремизмэм ыкIи терроризмэм апэшIуекIогъэным, нэмыкIхэми ахэлажьэ.
ХэушъхьафыкIыгъэ дзэ операциер къызежьагъэм щыублагъэу лъэпкъ гвардием икъулыкъушIэхэм лIыхъужъныгъэ ыкIи лIыблэнагъэ зэрахьэзэ ядзэ пшъэрылъхэр щытхъу хэлъэу агъэцакIэ. Ахэм зэхащэрэ Iофтхьабзэхэм яшIуагъэкIэ зылъыхъухэрэ пыир къычIагъэщы, ащ ыгъэфедэрэ Iашэр ыкIи щэ-гынхэр агъэкIодых, мэхьанэ зиIэ псэуалъэхэр къаухъумэх.
Росгвардием иIофышIэхэр мамыр цIыфхэм адэIэпыIэ, яшIуагъэ арагъэкIы. Гъомылапхъэхэр аIэкIагъахьэ, медицинэ IэпыIэгъур арагъэгъоты, нэмыкIэу унагъом ищыкIэгъэщтхэр афащэх.
Ащ нэмыкIэу атом электростанциехэм, ядернэ-оружейнэ ыкIи гъэстыныпхъэ-энергетическэ комплексхэм, ядернэ предприятиехэм ыкIи химическэ къыдэгъэкIыным зыпкъ итэу Iоф ашIэным лъэпкъ гвардием икъулыкъушIэхэм гъунэ лъафы.

Мы мафэм ехъулIэу ГъэIорышIапIэр къулыкъушIэхэмкIи, техникэмкIи икъоу зэтегъэпсыхьагъ. Лъэпкъ гвардием хэтхэм тиреспубликэ имызакъоу, нэмыкI шъолъырхэми щытхъу хэлъэу къулыкъур ащахьы. Терроризмэм цIыфхэр щыухъумэгъэнхэм, гъэры ашIыгъэхэр шъхьафит шIыжьыгъэнхэм ыкIи бзэджашIэхэм якъэубытын афытегъэпсыхьэгъэ Iофтхьабзэхэм ахэр ахэлажьэх. Яхэгъэгу къаухъумэзэ лIыблэнагъэ къызхэзыгъэфэгъэ къулыкъушIэхэр мымакIэу ахэтых.
ГъэIорышIапIэр хэбзэухъумэкIо къулыкъухэм зэпхыныгъэ адыриIэу адэлажьэ. Джащ фэдэу АР-м хэгъэгу кIоцI IофхэмкIэ и Министерствэ игъусэу общественнэ-политическэ ыкIи нэмыкI мэхьанэшхо зиIэ Iофтхьабзэу тишъолъыр щызэхащэхэрэм лъэпкъ гвардием икъулыкъушIэхэр ахэлажьэх.
Къэралыгъом ищынэгъончъагъэ къэухъумэгъэнымкIэ непэ Урысыем илъэпкъ гвардие анахь мэхьанэшхо зиIэ къулыкъухэм ащыщ.