Апэрэ чIыпIэр къыдахыгъ
Адыгэ Республикэм илъэпкъ гвардие ихэшыпыкIыгъэ командэ дзюдомкIэ Къыблэ федеральнэ шъолъырым изэнэкъокъухэм текIоныгъэр къащыдихыгъ.
Урысыем и ЛIыхъужъэу Геннадий Трошиным ыцIэ зыхьырэ бэнэпIэ гупчэу Ермэлхьаблэ дэтым Iофтхьабзэр щыкIуагъ.
Краснодар краим, Астрахань, Волгоград, Ростов хэкухэм, Адыгэ Республикэм, Къалмыкъым ыкIи Къырым ячIыпIэ гъэIорышIапIэхэм ядзэ частьхэр къэзыгъэлъэгъогъэ нэбгыри 140-м ехъумэ заушэтыгъ, ахэр командэ 28-рэ хъущтыгъэх. Спортсменхэр яонтэгъугъэ елъытыгъэу купи 7-у гощыгъэхэу зэнэкъокъугъэх.
Апэрэ купым хэтхэмкIэ командэхэм язэнэкъокъу дышъэ медаль къыщихьыгъ Адыгэ Республикэм щыIэ ГъэIорышIапIэм икомандэ. ЯтIонэрэ чIыпIэр Ростов хэкум, ящэнэрэр Къырым къарыкIыгъэ командэхэм къыдахыгъ.
Полицием истаршэ лейтенантэу Мэрэтыкъо Адам килограм 81-м нэс къэзыщэчыхэрэмкIэ апэрэ чIыпIэр, полицием икапитанэу Шъхьафыжь Аскэр килограмми 100-м ехъу къэзыщэчыхэрэмкIэ ятIонэрэ чIыпIэр къыдахыгъэх. Полицием имладшэ сержантэу Бэгъ Тимур ыкIи прапорщикэу Ахътао Ерстэм джэрз медальхэр къахьыгъэх.
ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм кубкэхэр, медальхэр ыкIи щытхъу тхылъхэр аратыжьыгъэх.
Къэзыгъэхьазырыгъэр КIАРЭ Фатим.