ЦIыф шэнышIухэр зэкIэ зезыхьэу тищыIэныгъэ хэтыр макIэп. Ахэм ащыщ селоу Натырбые щыщ Светлана Касимовар. КIэлэцIыкIуихымэ янэу ыкIи пхъорэлъф-къорэлъф 12-мэ янэжъэу ар зэрэщытым имызакъоу, Хэгъэгум идзэкъулыкъушIэхэм IэпыIэгъу афэхъурэ гуфэкIо чанэу щыт.

Зэрифэшъуашэу илъфыгъэхэр зэрипIугъэхэм фэшI Дипломэу «Материнская слава» зыфиIорэр АР-м IофшIэнымкIэ ыкIи социальнэ хэхъоныгъэмкIэ и Министерствэ къыфигъэшъошагъ. Бзылъфыгъэм ищыIэныгъэ къэзэкъ шэн-хабзэу щыпхырищыхэрэр исабыйхэм ыкIи ахэм къакIэхъухьажьыгъэхэм зэралъигъэIэсыжьыщтым емызэщэу ыуж ит. Светланэ ыш хэушъхьафыкIыгъэ дзэ операцием зэкIом, гупсэфэу щысын ылъэкIыгъэп. 2023-рэ илъэсым иIоныгъо мазэ къыщегъэжьагъэу ар дзэкIолIхэм IэпыIэгъу ягъэгъотыгъэнымкIэ гуфэкIо гукъэкIхэм чанэу ахэлажьэу ыублагъ.
Анахь мэхьанэ зиIэ проектхэу ар зыхэлэжьагъэхэм ащыщ «суп гъушъэхэм» ягъэхьазырын. Мыр Кощхьэблэ район къэ­зэкъ обществэм игукъэкIэу щыт ыкIи ащ ипхырыщын зырагъажьэм, апэ ахэхьагъэхэм Светланэ Василий ыпхъур ащыщ. Шхыныгъо зэфэшъхьаф гъушъэхэр гъэхьазырыгъэнхэм ишIыкIэ мы бзылъфыгъэм ишIуагъэкIэ аIэ къырагъэхьагъ. ЗэуапIэм непэ Iутхэм тызэрафэгумэкIырэр, тызэракъотыр зэхашIэным мыхэр ятамыгъэ хъугъэх.
Ащ нэмыкIэу, гуфэкIо купэу «Добрые сердца» зыфиIоу маскировочнэ хъытыухэр зыблэхэрэм изэхэщэн Светланэ чанэу хэлажьэ. Ари зы Iофэу ипатриотизмагъэ ыкIи Хэгъэгум иухъумакIохэм сыдигъуи IэпыIэгъу афэхъуным зэрэфэхьазырыр къэзыгъэлъагъохэрэм ащыщ.
2024-рэ илъэсым Светланэ игъэхъагъэхэр хагъэунэфыкIыгъэх – УФ-м зыкъэухъумэжьынымкIэ и Министерствэ итын лъапIэу «За вклад в укрепление обороны Российской Федерации» зыфиIорэр, АР-м ибзылъфыгъэхэм я Союз ирэзэныгъэ тхылъ къыфагъэшъошагъэх. Ныбжьэу ыкIи социальнэ купэу зыхахьэхэрэм ямылъытыгъэу, зэкIэми зэдытиIофым иIахьышIу хилъхьанымкIэ мыщ ищыIэныгъэ, изекIуакIэ щысэтехыпIэу щыт.

Светланэ Василий ыпхъур обществэм хэхъоныгъэ ышIыным чанэу зэрэхэлажьэрэм ишыхьат Натырбые и Щытхъу пхъэмбгъу чIыпIэ гъэнэфагъэ зэрэщиубытыгъэм.
Мы бзылъфыгъэр патриотизмагъэм ыкIи шIушIэным ята­мыгъ. ЧIыпIэ зэжъу узифэрэм узэдеIэжьыным ыкIи шIушIэн Iофыр лъыгъэкIотэгъэным Светланэ ипсэукIэ нэмыкIхэр къыфегъэ­ущых. Сыд фэдизэу уахътэр зэхъокIми, уасэ зиIэ цIыф шэнышIухэр зэмыхъокIэу къэнэжьых.
Анастасия Нетребинар.
Мыекъопэ къэзэкъ отделым ипресс-къулыкъу.