2025-рэ илъэсым Адыгеим щыпсэурэ унэгъо мин 28-м ехъумэ зэтыгъо ахъщэ тын аратыгъ. Ар унагъом гъотэу иIэр къыдалъытэзэ агъэнафэ.

ЦIыфыр зэрыпсэун ылъэкIыщт ахъщэ анахь макIэу шъолъырым щагъэнэфагъэм ипроценти 100-м, 75-м е 50-м фэдиз унагъом ахъщэ IэпыIэгъоу фагъэнафэрэр. Мы илъэсым кIэлэцIыкIу­хэм аратырэр сомэ 7396,5-м щегъэ­жьагъэу сомэ 14793-м, сабый ежэрэ бзылъфыгъэхэм сомэ 8311,5-м щегъэ­жьагъэу 16623-м анэсы.
Зэтыгъо ахъщэ тыныр агъэнэфэным пае унагъом исым пэпчъ лэжьэпкIэ анахь макIэм фэди 4-м къыщымыкIэу гъот иIэн фае. 2025-рэ илъэсым Урысыем щагъэнэфагъэр сомэ 22440-рэ. Ащ укъыпкъырыкIымэ, унагъом исым пэпчъ илъэсым гъотэу иIэр сомэ 89760-м нахь мэкIэн фаеп. Ушъхьагъу гъэнэфагъэ иIэу, гущыIэм пае, кIэлэцIыкIу къыфэхъунэу IофшIапIэм Iу­кIыгъ, къэхъугъэм ыныбжь илъэси 3-м нэсыгъэп, сэкъатныгъэ зиIэ кIэлэцIыкIу епIу е ипсауныгъэ изэтегъэуцожьын охътабэ текIодагъ, гъот имыIагъэми, ахъщэ тыныр фагъэнафэ.
— КIэлэцIыкIу зэрыс унагъом ахъщэ тынэу сабыйхэм апае къыфакIорэр охътэ зэфэ­шъхьафхэм ыгъэпсынэу хъугъэ­мэ, зы ышIыжьын амал 2025-рэ илъэсым иIэ хъугъэ. Ащ пае сабыйхэм ащыщ фагъэпсыгъэ ахъщэм ипIалъэ зыщикIыгъэм, зэкIэми а зы уахътэм зэхэубытагъэу къафэкIоным фэгъэхьыгъэ лъэIу тхылъ ытын фае. Аущтэу зишIыкIэ, ыпэкIэ къы­фэкIогъэ ахъщэхэр гъотэу иIэм къыхалъытэщтхэп, — къыIуагъ УФ-м и Социальнэ фонд и Къутамэу АР-м щыIэм ипащэу МэщлIэкъо Хьамидэ.
Зэтыгъо ахъщэ IэпыIэгъур къыуатыным пае лъэIу тхылъыр къэралыгъо фэIо-фашIэхэм япортал щыптын плъэ­кIыщт, Социальнэ фондым и Къутамэ икъулыкъоу цIыфхэм Iоф адэзышIэрэм е къэралыгъо ыкIи муниципальнэ фэIо-фашIэхэр зыщагъэцэкIэхэрэ Гупчэм (МФЦ) уекIуалIэми пIахыщт.
УпчIэ зиIэр телефон номерэу 8(800)100-00-01-м блыпэ мафэм къыщыублагъэу мэфэкум нэс сыхьатыр 9-м щегъэжьагъэу 6-м нэс, бэрэскэшхом пчыхьэм сыхьатыр 5-м нэс къытеон ылъэкIыщт.
Социальнэ хъытыуми тижъугъотэщт: https://vk.com/sfr.respublikaadygeya, https://ok.ru/group/7000000I89II68, https://t.me/osfrrespublikaadygeya.