«ЩыIэныгъэм пае инфра­структурэр» зыфиIорэ лъэпкъ проектыкIэм къыдыхэлъытэгъэ IофшIэнэу Адыгеим щызэшIуахыщтхэр мыгъэ зынэсыщтхэм ащыщ Тэхъутэмыкъое районым ит къуаджэу Щынджые.

Ащ иурамэу Пушкиным ыцIэ зыхьырэм тет кIэлэцIыкIу джэгупIэр жъы ыкIи щынагъо хъугъагъэ, лъэхъаным диштэу ар зэтырагъэпсыхьажьыным къоджэдэсхэр бэшIагъэу кIэ­хъо­псыщтыгъэх. Джы мары чэзыур ащ нэсыгъ.
Лъэпкъ проектым ипхырыщын пае аштэгъэ федеральнэ проектэу «Iэрыфэгъу къэлэ щыIакIэр гъэпсыгъэныр» зыфи­Iорэм къыдыхэлъытагъэу джэгупIэр агъэкIэжьыщт. Тызхэт мазэм Щынджые псэупIэ коим иадминистрацие подрядчикым икъыхэхын пае зэнэкъокъу зэхищэгъагъ. Ащ текIоныгъэр къыщыдихыгъ пшъэдэкIыжьэу ыхьырэмкIэ гъунэпкъэ гъэнэфагъэхэр зиIэ обществэу «СП-ГРУП» зыфиIорэм.
Зэзэгъыныгъэу ащ дашIыгъэм къызэрэщыдэлъытагъэмкIэ, чIыпIэу джэгупIэм зэлъиу­бытырэр зэщиз ышIыщт, тыри­гъэчъыкIыщт, етIанэ хьашъом хэшIыкIыгъэ алырэгъу тырилъхьащт. Ащ кIэлэцIыкIухэр зы­щыджэгущтхэ пкъыгъохэр ты­ригъэуцожьыщтых. Ахэм ямызакъоу, тIысыпIэхэр, хэкIидзапIэхэр щигъэуцущтых, чэщырэ чIыпIэр къэнэфынэу ышIыщт.
АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритыгъэмкIэ, кIэлэцIыкIу джэгупIэм изэтегъэпсыхьан сомэ миллионрэ мин 984-рэ тефэщт. ЖъоныгъокIэ мазэм ыкIэм нэс IофшIэнхэр аухынхэу проектым къыщыдэлъы­тагъ.
Кощхьэблэ районым ипоселкэу Дружбэм дэт кIэлэцIыкIу джэгупIэри мыгъэ зэтырагъэпсыхьажьыщтхэм къахи­убытагъ. Дмитриевскэ псэупIэ коеу ар зыхахьэрэм иадминистрацие зэнэкъокъу джырэблагъэ зэхищи, подрядчикыр къэнэфагъ. Зэзэгъыныгъэм къызэрэдыхэлъытагъэу, ащ чIыпIэр ыгъэчъыщт, щымыцIэнлъэнхэм пае ищыкIагъэр ащ тырибзэжьыщт, джэгупIэхэр, тысыпIэхэр, хэкIидзапIэхэр щигъэуцущтых.
Министерствэм къызэрэщаIуагъэмкIэ, IофшIэнхэм сомэ миллиони 2-рэ мин 779-м ехъу апэIухьащт. Мэкъуогъу мазэм ыкIэм нэс аухынэу ары гухэлъэу яIэр.
«ЩыIэныгъэм пае инфраструктурэр» зыфиIорэ лъэпкъ проектым къыды­хэлъытагъэу мыгъэ республикэм общественнэ чIыпIэ 23-рэ щызэтырагъэ­псыхьащт. Ахэм апае тхылъхэр муниципальнэ образованиехэм агъэхьазырых.
ЧIыпIэхэм язэтегъэпсыхьан фэгъэ­хьыгъэ къэбархэр Министерствэм исоциальнэ хъытыухэм арыжъугъотэщтых (https:t.me/minstroy01).