Дэхагъэр, укIытагъор, шIугъэр: къалэу Шъачэ хэхьэрэ къуаджэу ШэхэкIэй дэт гурыт еджапIэм фестиваль-зэнэкъокъоу «Адыгэ пшъашъ-2025-рэ» зыфиIорэр ятIонэрэу щырагъэкIокIыгъ.

БлэкIыгъэ илъэсым фэдэу, хы ШIуцIэ шапсыгъэмэ я Адыгэ Хасэ мыгъи зэнэкъо­къум IэпыIэгъу фэхъугъ. ЗэхэщакIохэм къызэрэхагъэщыгъэмкIэ, адыгэ пшъашъэхэр шапхъэхэм адиштэу пIугъэнхэм, гъэсэгъэнхэм, шэн-хабзэхэр ахэлъхэу къэгъэтэджыгъэнхэм фестивалыр фэIорышIэ. ТекIоныгъэр къыдэзыхыщтыр къыхахы хъумэ осэшIхэм анахьэу анаIэ зытырадзэрэр: пшъашъэр укIытапхэу зэрэщытыр, адыгэ шэн-хабзэхэр зэрэзэрихьэхэрэр, шIур къызэребэкIырэр, IофшIэным зэрэдэмышъхьахырэр ары. Проектым ишIуагъэкIэ сэнаущыгъэ зыхэлъхэм ятворчествэ лъагъэкIотэн алъэкIы.
Мыгъэрэ фестивалым нэбгыриплI щызэнэкъокъугъ — ЛIыф Дарина, Гъыдзэ Самира, ТIэшъу Заира ыкIи Дзыбэ София. Адыгэ лъэпкъ шъуашэхэм язе­хьанкIэ, ныдэлъфыбзэр зэрашIэрэмкIэ, ялIэкъо чъыгхэм зэращыгъуазэхэмкIэ, дэнымкIэ, лъэпкъ къашъохэр къызэрашIырэмкIэ, адыгэ шхыныгъохэр зэрагъэхьазырхэрэмкIэ пшъашъэхэр зэнэкъо­къугъэх.
ОсэшIмэ зэралъытагъэмкIэ, апэрэ чIыпIэр къыдихыгъ Дзыбэ Софие. Ащ Адыгеим иIэпэIасэхэм яIэшIагъэхэр —дышъэ паIор, жьыфыр ыкIи пхъэцуакъэ­хэр ратыгъэх. Адрэхэри лъэныкъо зэфэшъхьафхэмкIэ къыхагъэщыгъэх ыкIи дипломхэр афагъэшъошагъэх. ЧIыпIэ Адыгэ Хасэм итхьаматэу КIакIыхъу Мэджыдэ рэзэныгъэ тхылъхэмкIэ зэнэ­къокъум изэхэщакIохэр ыкIи еджапIэм икIэлэегъаджэхэу ащ зиIахьышIу хэзылъхьагъэхэр къыхигъэщыгъэх — Алые Марзет, Гъуашэ Саламэт, Хъущт Фатим, ЛIыф Мир ыкIи Хъущт Марет.