Къуаджэу Агуе сэнаущыгъэшхо зыхэлъ цIыфхэмкIэ баи. Хы ШIуцIэ Iушъом щыпсэурэ анахь адыгэ къоджэшхом лIэуж лIэужэу щызэкIэлъэкIох лъэныкъо зэфэшъхьафхэмкIэ зыкъэзыгъэлъэгъорэ ныбжьыкIэхэу гугъапIэ къэзытыхэрэр.

Агуе щыщ Нэгъуцу Салим творческэ цIыф. Илъэс 14 зыныбжь кIалэу сэнаущыгъэшхо зыхэлъыр зэлъашIэрэ къэшъо­кIо купэу «Дышъэ кIэн» зыфиIорэм хэтыгъ, джырэкIэ ансамблэу «Шапсыгъэ инэфылъхэр» зыфиIорэм иартист. Адыгэ пщынэм, аккордеоным къарегъаIо, шъондырыпым IэхъуамбэхэмкIэ теон елъэкIы. ИскусствэхэмкIэ кIэлэцIыкIу еджапIэу Агуе дэтым икIэлэегъаджэу Наталья Семеновам икIэлэ пIугъэ Шъачэ щыкIогъэ зэнэкъокъум текIоныгъэр къы­щыдихыгъ. Салим лъэныкъоу «Аккордеон-соло» зыфиIорэмкIэ Гран-при къы­хьыгъ, «Лъэпкъ пщынэмкIэ» текIоны­гъэр къыдэзыхыгъэм идиплом къыфагъэшъошагъ.
— КIалэм сэнаущыгъэшхо хэлъ, — къыхегъэщы къэшъокIо ансамблэу «Дышъэ кIэным» ихудожественнэ пащэу Нэгъуцу Сурэ. — Лъэны­къуабэ ащ къыIэкIэхьагъ: къэшъо, Iэмэ-псымэхэм къарегъаIо, орэд къе­Iо. Салим искусствэм илъэны­къуабэхэмкIэ зызэриушэтырэм лъэшэу сегъэгушIо, сырэгушхо.
НэкIубгъор зыгъэхьазырыгъэр Ныбэ Анзор.
Сурэтхэр авторым иех.