Top.Mail.Ru

КультурэмкIэ хэхъоныгъэшху

Image description
А. Гусев

АР-м и ЛIышъхьэу ­КъумпIыл Мурат культурэм иIофышIэ и Мафэ тефэу къутырэу Гавердовскэм щыIагъ.

Ащ культурнэ хэхъоныгъэм и Гупчэ къыщызэIуахыгъ. ­Лъэпкъ проектэу «Культурэм» тегъэ­псыхьагъэу а псэуалъэр ашIыгъ, бюджет зэфэшъхьафхэм къа­рыкIыгъэ сомэ миллиони 151-м ехъу ащ пэIуагъэхьагъ.
Iофтхьабзэм хэлэжьагъэх фе­деральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу Виктор Орловыр, АР-м культурэмкIэ иминистрэу Аулъэ Юрэ, Мыекъуапэ имэрэу Геннадий Митрофановыр.

А. Балабась


Къутырым щыпсэухэрэмрэ къалэм итворческэ купхэм ялIыкIохэмрэ псэолъакIэм пае АР-м и ЛIышъхьэ зэрэфэразэхэр къаIуагъ. БэшIагъэ ащ фэдэ унэм зыфэягъэхэр. Культурэм и Унэу мыщ ыпэкIэ щытыгъэр зэхэтэкъоным нэсыгъагъ ыкIи зыпкъ ибгъэуцожьын плъэкIынэу щытыгъэп. Джы ащ ычIыпIэ культурнэ хэхъоныгъэм и Гупчэу къиуцуагъэр уахътэм диштэу щыт. ТIоу зэтет унэм квадрат метрэ мин 1,2-рэ фэдиз еубыты, творческэ IофшIэнымкIэ ящыкIэгъэщтыр зэкIэ ащ хэхьэ. Апэрэ къатым нэбгырэ 200 зычIэфэщт зал хэт. ТхылъеджапIэр, методическэ кабинетыр, сурэт зыщашIыщтыр, макъэр зыщытыратхэщтыр, шхапIэр ыкIи нэмыкIхэр ащ хэтых. ЯтIонэрэ къатым къызщышъощтхэ, орэд къызщаIощт, операторым Iоф зыщишIэщт унэхэр щыгъэпсыгъэх.
Едыдж Викторие пэщэныгъэ дызэрихьэзэ культурнэ хэхъоныгъэм и Гупчэу «Ошъадэм» Iоф ышIэщт. Мыщ IофшIэныр щаублэгъах. Творческэ зэхэхьэ зэфэшъхьафхэм якупхэм Гупчэр къызфагъэфедэщт: ­адыгэ лъэпкъ къашъомкIэ ансамблэу «Синдикэм», лъэпкъ Iэмэ-псы­мэхэмкIэ ансамблэу «Бэгъэу­джым», фольклор-этнографи­ческэ ансамблэу «Ащэмэзым», кIэлэцIыкIу къэшъокIо ансамблэу «Ошъадэм». Ащ нэмыкIэу кIэлэцIыкIу орэдыIо студиеу «Ви-за-ви», «Шанс», кIэлэцIыкIу къэшъокIо ансамблэу «Непоседы» зыфиIохэрэм мыщ зыщагъэсэн алъэкIыщт.

А. Гусев
А. Гусев


Адыгеим и ЛIышъхьэ гущыIэгъу афэхъугъ Гупчэм щеджэ­хэрэмрэ иIофышIэхэмрэ. Ахэм КъумпIыл Мурат афэлъэIуагъ творческэ IофшIэнымкIэ гъэ­хъагъэхэр ашIынхэу ыкIи мэфэкIитIумкIэ афэгушIуагъ: культурэм иIофышIэ и МафэкIэ ыкIи культурнэ хэхъоныгъэм и Гупчэ къызэрэзэIуахыгъэмкIэ.
«Культурнэ хэхъоныгъэм и Гупчэу «Ошъадэр» ясэнэхьат мэфэкI ехъулIэу шIухьафтын дэгъоу плъытэн плъэкIыщт. Тэр­кIэ мэхьанэшхо иI дгъэпсы­хэрэр шIуагъэ хэлъэу агъэфедэнхэм. ГупчакIэр сэнаущыгъэ зыхэлъ ныбжьыкIэхэм хэхъоныгъэ ашIынымкIэ мэхьэнэ гъэнэфагъэ зиIэ чIыпIэу щытыщт ыкIи псэупIэм щыпсэухэрэри ащ къызфищэщтых. Джырэ уахътэм диштэрэ унэр кIэлэцIыкIухэр лъэпкъ творчествэм хэщэгъэнхэмкIэ, тапэкIэ сэнэхьат IофшIэнэу хахыщтымкIи ублэпIэшIу зэрэ­хъущтым уицыхьэ тебгъэлъын плъэкIыщт», къыIуагъ Къум­пIыл Мурат.
Адыгеим и ЛIышъхьэ къызэ­рэхигъэщыгъэмкIэ, лъэпкъ проектэу «Культурэм» ишIуагъэкIэ республикэм IофшIэнышхо щы­зэшIуахыгъ УФ-м и Президентэу Владимир Путиным культурэм ихэхъоныгъэкIэ пшъэрылъэу къыгъэуцугъэхэр гъэцэкIагъэ хъунхэм пае. Лъэпкъ проектыкIэу «Унагъом» тегъэпсыхьа­гъэу культурэм ылъэныкъокIэ Iоф­тхьа­бзэхэр нахь лъыгъэкIотэ­гъэнхэ зэрэфаер КъумпIыл Му­рат къыхигъэщыгъ.

А. Гусев


ПсэупIэу Родниковым дэсхэми культурэм ипсэолъэ гъэкIэ­жьыгъэ яIэ хъугъэ. ИгъэкIотыгъэ гъэцэкIэжьынхэм ауж къоджэ клубыр мыщ къыщызэIуахыгъ. Культурэм и Унэу псэупIэу Хан­скэм дэтым икъутамэу ар щыт. ТапэкIэ ащ щыпсэухэрэм АР-м и ЛIышъхьэ зыкъыфагъэзэгъагъ чIыпIэ клубыр зычIэт унэу жъы дэдэ хъугъэр агъэцэкIэжьыным епхыгъэ лъэIумкIэ. КъумпIыл Мурат пшъэрылъэу афишIыгъагъэхэр гъэцэкIагъэ зэрэхъугъэхэр ыуплъэкIугъ. АР-м культурэмкIэ и Министерствэ къызэритыгъэмкIэ, респуб­ликэ ыкIи къэлэ бюджетхэм якъэкIуапIэхэмкIэ игъэкIотыгъэ IофшIэнхэр клубым рашIылIа­гъэх. ПсэупIэм дэсхэм языгъэ­псэфыгъо уахътэ щагъэкIоным пае ящыкIэгъэ амалхэр зэкIэ ащ щарагъэгъотыщтых. ЦIыфэу къекIуалIэхэрэр зэрысыщтхэ унэр, тхылъеджапIэр, нэмыкI унэхэу клубым хахьэхэрэр зэкIэ агъэцэкIэжьыгъэх, ящыкIэгъэ мебелыр видео Iэмэ-псымэхэр, нэфынэр ыкIи макъэр къэзытыщтхэр къызIэкIагъэхьагъэх.

А. Гусев


АР-м и ЛIышъхьэ псэупIэм дэсхэм гущыIэгъу зафэхъум Родниковым изэтегъэпсыхьан ичэзыухэм атегущыIагъэх. Тапэ­кIэ КъумпIыл Мурат пшъэрылъ зэрафишIыгъэм тетэу клубым дэжь кIэлэцIыкIу джэгупIэ щагъэпсыгъагъ, шъхьафитныгъэр къыдэзыхыгъэ зэолIхэм ясау­гъэт агъэцэкIэжьыгъ, гъо­гур асфальт­кIэ агъэпкIагъ, еджа­пIэм испорт гупчи зэтырагъэ­псы­хьагъ. АР-м и ЛIышъхьэ Мыекъуапэ имэр пшъэрылъ фи­­шIыгъ мемориальнэ комплексым къыпэIулъ чIыпIэм изэтегъэпсыхьан мы охъ­тэ благъэхэм аригъэухынэу. Ащ нэмыкIэу социальнэ псэолъэ заулэмэ якIурэ гъогухэри агъэ­цэкIэжьыщтых.
Адыгеим и ЛIышъхьэ къыхигъэщыгъ псэупIэу Родниковым клубыр зэрэщагъэцэкIэжьыгъэр цIыф псэупIэ пэпчъ адэсхэм ящыIакIэ нахьышIу шIыгъэным фытегъэпсыхьэгъэ Iофэу хэбзэ къулыкъухэм агъэцакIэрэм изы лъэбэкъоу зэрэщытыр.
«Тэ тызыфаер къуаджэ, псэу­пIэ е къутыр пэпчъ джырэ уахъ­тэм диштэрэ еджапIэхэр, фельдшер-мамыку IэзапIэхэр, спортымрэ культурэмрэ япхыгъэ псэуалъэхэр адэтынхэр ары. ТапэкIэ зэшIотхынэу пшъэры­лъыбэ къытпыщылъ. Федеральнэ гупчэм иIэпыIэгъу хэлъэу ахэр зэшIотхыщтых. Ау ежь чIыпIэхэм ащыпсэурэ цIыфхэми чаныгъэ къызхагъэфэным мэхьанэшхо иI. Шэмбэт шIыхьафхэм ахэлэжьэнхэ, къэбзэныгъэм лъыплъэнхэ, культурэмрэ гъэсэ­ныгъэмрэ япхыгъэ Iофтхьэбзэ зэфэшъхьафхэм ахэлэжьэнхэ фае. Тызэгъусэмэ ары шIуагъэ хэлъэу итхъухьагъэр зэкIэ дгъэ­цэкIэн зытлъыкIыщтыр», къы­Iуагъ КъумпIыл Мурат.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.