Хабзэр Адыгеим щамыукъоным лъыплъэрэ координационнэ зэIукIэм изэхэсыгъо республикэм и Правительствэ зы­чIэт унэм щыкIуагъ. АР-м и ЛIышъхьэу Къум­пIыл Мурат ар ­зэрищагъ.

Зэхэсыгъом хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, ми­нист­рэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, АР-м ипрокуратурэ, хэгъэгу кIоцI IофхэмкIэ и Министерствэ, щынэгъончъэнымкIэ Федеральнэ къулы­къум АР-мкIэ и ГъэIорышIапIэ, пщыныжь ягъэхьыгъэнымкIэ Федеральнэ къулы­къум АР-мкIэ и ГъэIорышIапIэ, уплъэкIунхэр зэхэзыщэрэ къулыкъухэм, муниципалитетхэм япащэхэр.
ТекIоныгъэр къызыдахы­гъэр илъэс 80 зыщыхъурэм ехъулIэу мэфэкI Iофтхьабзэ­хэр зэхащэхэ зыхъукIэ общественнэ щынэгъончъагъэр гъэлъэшыгъэн зэрэфаем, хьапсхэм къадэкIыжьыгъэхэр щыIэныгъэм хэщэжьы­гъэнхэм, ахэм бзэджэшIагъэ зэрамыхьаным лъыплъэгъэным, Интернетым бзэджэ­шIагъэхэр щызезыхьэхэрэм ягъогупэ пыбзыкIыгъэным япхыгъэ Iофыгъохэм мыщ щатегущыIагъэх.
АР-м хэгъэгу кIоцI Iоф­хэмкIэ и Министерствэ къызэритыгъэмкIэ, жъоныгъуа­кIэм и 7-м къыщегъэжьагъэу и 9-м нэс нэбгырэ мин 60-м нэс зыхэлэжьэщт мэфэкI Iофтхьэбзи 100 зэрэреспуб­ликэу щызэхащэнэу рахъухьэ. АР-м хэгъэгу кIоцI Iоф­хэмкIэ и Министерствэрэ Госгвардием АР-мкIэ и Гъэ­IорышIапIэрэ яIофышIэ миным ехъур, унэе ухъумэкIо организациехэм яIофышIэхэр, народнэ дружинэхэм ахэтхэр хабзэр укъуагъэ мыхъуным лъыплъэщтых. Iашэ зиIэхэри ауплъэкIущтых. Хэбзэухъума­кIохэм металлодетекторхэр къызфагъэфедэщтых.

«Анахь шъхьаIэр мэфэкI Iофтхьа­бзэхэр къызэIэзыгъэхьан зылъэкIыщт хъугъэ-шIагъэхэр къэмыгъэхъугъэнхэр ары. Общественнэ щынэгъончъагъэр зэщызыгъэкъон зылъэкIыщт цIыфхэм якъыхэгъэщынкIэ интернет хъытыухэм къарыхьэхэрэм яуплъэкIун лъэшэу гъунэ лъыфыгъэн, хэгъэгум иухъумакIохэм афагъэуцугъэ саугъэтхэм, мыжъобгъу­хэм якъэухъумэнкIэ ищыкIэгъэ амалхэр зэрахьанхэ фае», — къыIуагъ Къум­пIыл Мурат.
АР-м хэгъэгу кIоцI IофхэмкIэ и Министерствэ, IофшIэнымкIэ ыкIи социальнэ хэхъоныгъэмкIэ и Министерствэ, пщыныжь ягъэхьыгъэнымкIэ Федеральнэ къулыкъум АР-мкIэ и ГъэIорышIапIэ япащэхэм ащыщхэр хьапсхэм къадэ­кIыжьыгъэхэр щыIэныгъэм хэгъэгъозэ­жьыгъэнхэ, ахэм бзэджэшIагъэ нахьыбэрэ зэрамыхьанымкIэ алъыплъэгъэн зэрэфаем къытегущыIагъэх.
Хьапсхэм къадэкIыжьыгъэхэм бзэджэшIагъэхэр нахьыбэрэ амышIэнхэмкIэ амалхэр зэрэзэрахьэрэм, социальнэ IэпыIэгъу ахэм зэрарагъэгъотырэм яшIуагъэкIэ мы аужырэ илъэситIум ащ фэдэ бзэджэшIагъэхэм процент 18-кIэ Адыгеим къызэращыкIичыгъэр зэхэсыгъом щыхагъэунэфыкIыгъ. Хьапсхэм къадэкIыжьыгъэхэм япаспортхэм якъыдэхыжьынкIэ, зыщыпсэухэрэ чIыпIэм щатхынхэмкIэ, пенсиехэр къаратынхэмкIэ ыкIи нэмыкI лъэныкъохэмкIэ Iэпы­Iэгъу зэрэрагъэгъотырэр къаIуагъ. Федеральнэ хэбзэгъэуцугъэу «Пробациер Урысые Федерацием зэрэщыкIорэм ехьылIагъ» зыфиIоу гъэрекIо кIуачIэ зиIэ хъугъэм диштэу хьапсхэм къадэкIыжьыгъэхэу Адыгеим щыпсэухэрэр гъогу тэрэз тыращэжьых, яфэшъошэ чIыпIэ щыIэныгъэм щаубыты.
«Хьапсхэм къадэкIыжьыгъэхэм социальнэ-психологическэ, правовой Iэпы­Iэгъу къязытырэ, IофшIэн къафэзыгъотырэ къулыкъухэм язэдэлэжьэныгъэ гъэ­лъэшыгъэным мэхьанэшхо иI», — хигъэунэфыкIыгъ КъумпIыл Мурат.
Зэхэсыгъом икIэух къэбар-телекоммуникационнэ технологиехэр къызфэзыгъэфедэхэзэ бзэджэшIагъэ зезы­хьэхэрэм ягъогупэ зэрэпабзыкIыщт шIыкIэм тегущыIагъэх. АР-м хэгъэгу кIоцI IофхэмкIэ и Министерствэ уголовнэ лъыхъонымкIэ и ГъэIорышIапIэ къызэритыгъэмкIэ, гъэрекIо нэбгырэ мин 64-м ехъумэ бзэджэшIагъэ зэрахьэ зэрэмыхъущтымкIэ адэгущыIэгъагъэх, цIыфхэр жъугъэу зыщызэIукIэрэ чIыпIэхэм тхьапэхэр ащапалъэгъагъэх, материал минищым ехъу къэбарлъы­гъэIэс амалхэм къарагъэхьэгъагъ. Къэбар-телекоммуникационнэ технологиехэр къызфагъэфедэхэзэ бзэджэшIагъэ зезыхьэхэрэм зэрапэуцужьыщтхэ шIыкIэм ехьылIэгъэ къэбархэр хэгъэгу
кIоцI Iоф­хэмкIэ Министерствэми, хэ­гъэгу кIоцI IофхэмкIэ чIыпIэ къулыкъухэми ясайтхэм ренэу къарэхьэх. Адыгеим
и ЛIышъхьэ къулыкъу гъэнэфагъэхэм пшъэрылъ афишIыгъ интернет-гъэпцIакIохэм яхъытыу цIыфхэр имыфэнхэмкIэ къэбарлъыгъэIэс амалхэми, социаль­нэ хъытыухэми информационнэ Iоф­шIэныр нахь ащагъэлъэшынэу.