Культурэм иIофышIэ и Мафэ фэгъэхьыгъэ мэфэкI зэIукIэ республикэ филармонием щыкIуагъ. Адыгеим и ЛIышъхьэу КъумпIыл Мурат культурэм иIофышIэхэм, иветеранхэм афэгушIуагъ.

Республикэм и ЛIышъхьэ зищыIэныгъэ культурэм фэзыгъэIорышIэгъэ пстэуми зэрафэразэр къыIуагъ.
«Шъо шъуиIофшIэн сэнэхьат къодыеу щытэп, ащ шъукъы­фэхъугъ. Шъоры шэн-хабзэхэр къэзыухъумэхэрэр, Iофэу шъуз­фэгъэзагъэм хэхъоныгъэ зэришIыщтым шъузышъхьамысы­жьэу шъудэлажьэ. Артистхэр, музыкантхэр, кIэлэегъаджэхэр, тхылъеджапIэхэм, музейхэм яIо­фышIэхэр, режиссерхэр ыкIи хореографхэр — ахэм ащыщ нэбгырэ пэпчъ культурэм ихэхъо­ныгъэ, Урысыем игушъхьэлэжь баиныгъэ икъэухъумэн, куль­турнэ кIэным игъэпытэн иIахь хешIыхьэ, — къыIуагъ АР-м и ЛIышъхьэ. — Президентэу Владимир Путиным къызэри­IуагъэмкIэ, «культурэр Урысыем ихэхъоныгъэкIэ лъэпсэ пытэу щыт». Арышъ, а лъэныкъом хэхъоныгъэ егъэшIыгъэныр анахь пшъэрылъ шъхьаIэхэм ащыщ. Тиреспубликэ илъэс къэс Iофышхо щызэшIуахы: Адыгеим икультурнэ щыIакIэ гъэшIэгъо­нэу, лъэныкъуабэ къызэлъиубытэу щытыным пае ищыкIэгъэ амалхэр зэкIэ тэгъэфедэх, тицIыфхэр, анахьэу етIани кIэлэцIыкIухэмрэ ныбжьыкIэхэмрэ нахьыбэу ащ хэщэгъэнхэм тынаIэ тетэгъэты. Лъэпкъ проектхэм, къэралыгъо программэхэм, партиеу «Единэ Россием» ипроектхэм яшIуагъэкIэ а пшъэрылъыр зэшIотэхы».

Мы аужырэ илъэси 7-м Адыге­им культурэм и Унэ 12 щашIыгъ, 53-рэ игъэкIотыгъэу агъэцэкIэжьыгъ. Ащ дакIоу искусствэхэмкIэ кIэлэцIыкIу еджэпIи 10 агъэкIэжьыгъ, модельнэ тхылъеджэпIэ 16 агъэпсыгъ. Культурэм и Унэ 54-рэ имузеи 8-рэ ящыкIэгъэ техникэмкIэ зэтырагъэпсыхьагъэх.
Культурэм иучреждение шъхьа­Iэхэм ащыщхэу искусст­вэхэмкIэ Адыгэ республикэ колледжэу У. Хь. Тхьабысымэм ыцIэкIэ щытыр, АР-м и Сурэт къэгъэлъэгъуапIэ, АР-м и ­Лъэпкъ музей, Пушкиным и Унэ, концерт залэу «Налмэсыр» агъэкIэжьыгъэх.
Мы илъэсым къуаджэу Нэтыхъуае культурэм и Унэу ща­шIырэр аухыщт, селоу Красно­гвардейскэм культурнэ-гъэсэныгъэ гупчэу щаублагъэм ишIын лъэкIуатэ. ПсэупIэу Еленовскэм­рэ къэлэ гъэпсыкIэ зиIэ Яблоновскэмрэ модельнэ тхылъ­еджэпIи 2 ащашIыщт, къуаджэу Кощхьаблэ Хьагъэудж Махьмудэ ыцIэкIэ щыт кIэлэцIыкIу еджапIэу дэтыр креативнэ индустриехэмкIэ еджапIэ ашIыщт.
Адыгэ республикэ кIэлэцIыкIу тхылъеджапIэм, псэупIэхэу Кужорскэмрэ Кощхьаблэрэ культурэм иунэу адэтхэм, псэупIэу Джаджэм дэт кинотеатрэу «Ро­динэми» игъэкIотыгъэ гъэцэкIэ­жьынхэр арашIылIэщтых. Советскэ Союзым и ЛIыхъу­жъэу Ан­дырхъое Хъусен имемориальнэ музееу къуаджэу Шэуджэнхьаблэ дэтри зэтырагъэпсы­хьащт. Партиеу «Единэ Россием» ипроект тетэу муниципальнэ образовании 9-мэ, культурэм иуни 10-мэ Iэмэ-псымакIэхэр аIэкIагъэхьащтых. «ТапэкIи куль­турэм иучреждениехэр дгъэ­кIэжьыщтых, зэтедгъэпсыхьащтых, псэолъакIэхэр тшIыщтых. Культурэм иучреждениехэу къуаджэхэм адэтхэм анахь дэгъухэм ыкIи ахэм ащылэжьэрэ анахь цIыф хъупхъэхэм Iэпы­Iэгъу тафэхъущт. Къэралыгъо программакIэу «Земский работник культуры» зыфиIорэр къыз­фэдгъэфедэзэ, а лъэныкъом Iоф щызышIэщтхэм ягъэхьазырынрэ а IофшIапIэхэм ахэр къящэлIэгъэнхэмрэ тадэлэжьэщт. Мы илъэсым а программэм тетэу культурэм иучреждениехэу къуа­джэхэм адэтхэм Iоф ащашIэнэу IофышIэ 21-рэ къэкIощт», — икIэухым къы­Iуагъ АР-м и ЛIышъхьэ.
Республикэм и ЛIышъхьэ культу­рэм ылъэныкъокIэ анахь Iофы­шIэ дэгъухэм рэзэныгъэ тхылъхэмрэ шIухьафтынхэмрэ аритыжьыгъэх.
ЩытхъуцIэу «Адыгэ Респуб­ли­кэм изаслуженнэ артист» зы­фиIорэр афагъэшъошагъ П. И. Чайковскэм ыцIэкIэ щыт къэра­лыгъо консерваториеу Москва дэтым апшъэрэ категорие зиIэ иконцертмейстерэу Екатерина Монисовам, къэралыгъо эстраднэ ансамблэу «Ошъутенэм» иорэдыIоу Мэкъао Маринэ, АР-м и Театральнэ зэхахьэ драмэмкIэ иартистэу Тхьакъохъо Мэр­джанэт, Концерт зэхахьэм икъэ­ралыгъо симфоническэ оркестрэ апшъэрэ категорие зиIэ иартистэу Николай Щербак.
ЩытхъуцIэу «Адыгэ Респуб­ликэм искусствэхэмкIэ изаслуженнэ IофышIэшху» зыфиIорэр фагъэшъошагъ АР-м и Камернэ музыкальнэ театрэу А. А. Хьа­нэ­хъум ыцIэкIэ щытым ибалетмейстерэу Юлия Аксеновам. «Адыгэ Респуб­ли­кэм культурэмкIэ изаслуженнэ IофышI» зыфиIорэр афагъэшъо­шагъ: псэу­пIэу Тульскэм искусствэхэмкIэ кIэлэцIыкIу еджапIэу дэтым ипащэу ГъукIэлI Батыр, муниципальнэ образованиеу «Кощ­хьэблэ районым» лъэпкъ культурэмкIэ и Гупчэ иартист-­орэ­дыIоу Къэрдэнэ Адам, культурэм икъэлэ Унэу «Гигантым» ихормейстерэу Валентина Медведевам, искусствэхэмкIэ кIэлэ­цIыкIу еджапIэу псэупIэу Тульскэм дэтым иотделениеу «Изобразительное искусство» зыцIэм икIэлэегъаджэу Татьяна Сидоренкэм, АР-м и Концерт зэхахьэ игенеральнэ пащэ игуа­дзэу Хьаджымэ Эльвирэ.
Адыгэ Республикэм и ЛIышъхьэ ирэзэныгъэ тхылъ аратыгъ АР-м и Лъэпкъ тхылъеджапIэ инаучнэ-методическэ отдел иметодист шъхьаIэу Елена Гулецкаям, культурэм и Унэу Шэуджэн районым итым иметодистэу Даур Сетхъан, АР-м и Театральнэ зэхахьэ драмэмкIэ иартистэу Оксана Светловам, адыгэ къашъохэмкIэ ансамблэу «Абдзахэхэр» зыфи­­Iо­рэм ибалетмейстерэу Сетэ До­лэтхъан, искусствэхэмкIэ кIэ­­лэ­цIыкIу еджапIэу Афыпсыпэ дэ­тым икIэлэегъаджэу Лъэп­шъы­къо Мариет, творческэ зэха-
­хьэу «Звонница» зыфиIоу Н. И. Ува­ровам ыцIэкIэ щытым иконцертмейстерэу Василий Штонда.
Джащ фэдэу ахэм афэгу­шIуагъ АР-м и Къэралыгъо
Со­вет — Хасэм и Тхьаматэу Вла­димир Нарожнэр. Депутатхэм ацIэкIэ артистхэмрэ культурэм иIофы­шIэхэмрэ аритыжьыгъэх щытхъу ыкIи рэзэныгъэ тхылъхэр.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.