Мыекъопэ баскетбол командэу «Динамо-МГТУ-р» анахь командэ лъэшэу тапэкIэ зэнэ­къокъунэу щытхэм ахэфагъ.

Апшъэрэ лигэм изичэзыу ешIэгъухэм тикомандэ ахэфэщтмэ зэлъытыгъагъэр Ставрополь ­икомандэу тадэжь къэкIощт «Южный слон» зыфиIорэм зэIукIэ­гъуитIоу дыриIэщтыр зэрэкIощтхэр арыгъэ. Анахь командэ лъэ­ши 8-мэ ахэфэным фэшI «Ди­намо-МГТУ-м» МФОК-у «Ошъутенэм» щыкIощт ешIэгъуитIури къыхьын фэягъ.
Тикомандэ ешIэгъуитIури шэпхъэшIухэм атетэу ригъэкIокIыгъэх. Анахь ешIэкIо дэгъоу къа­хэщыгъэх Александр Нахимовыр (очко 22-рэ) ыкIи Владислав Ионовыр (очко 17). Апэрэ ешIэгъум тикIалэхэм 84:68-у текIоныгъэр къыдахыгъ. Командэ анахь лъэшхэм яспискэ яенэрэу ахэтыщтыр къыгъэнэфэнэу щытыгъ ятIонэрэ зэIукIэгъум.

Апэрэ такъикъхэм къащегъэ­жьагъэу тикомандэ текIоныгъэр къыдихыным фытегъэпсыхьэ-
гъагъ. Зыгъэпсэфыгъом пчъагъэр 20:15-у къекIолIагъэх. ЕшIэгъум зыпадзэжьыми «Динамо-МГТУ-м» ыпэ ригъэхъугъ. Ставрополь ­икомандэ зэIукIэгъум зэхъокIыныгъэ фишIы шIоигъоу илъы-­
щтыгъ, ау бысымхэм ащ фэдэ амал ахэм аратыгъэп. Пчъагъэр 36:26-у зичэзыу зыгъэпсэфыгъом командэхэр кIуагъэх. Ящэнэрэ такъикъи 10-м командэхэр нахь лъэшэу къызэкIэнагъэх. ХьакIэхэм яшъыпкъэ рахьылIи тикомандэ ыуж къызэринэрэр нахь макIэ ашIын алъэкIыгъ — пчъагъэр 56:50 хъугъэ. ТикIалэхэм текIоныгъэр атIупщыщтыгъэп, очко 17-кIэ апэ итхэуи хъущтыгъ. Хьа­кIэхэм ятренер таймаут ышти, икомандэ нахь зыкъыригъэшIэ­жьыгъ, лъэшэу къилъыгъэх, ау ащи зыпари къикIыгъэп. ЗэIукIэгъур «Динамо-МГТУ-м» къы­хьыгъ пчъагъэр 82:64-у.
Мы зэIукIэгъум анахь ешIэкIо дэгъоу къыщыхагъэщыгъ очко 27-рэ зикомандэ къыфэзыхьыгъэ Константин Клементьевыр.
ТапэкIэ, гъэтхапэм и 29-м «Динамо-МГТУ-м» къежэ Уфа и «Динамо», нэужым а командэр Мыекъуапэ къэкIощт, мэлылъфэгъум и 2-м ешIэгъур зэхащэщт.