Гъобэкъуае щыщэу, биологие шIэныгъэхэмкIэ докторэу Iэшъынэ Юныс икъоджэ гупсэ фэгъэхьыгъэ IофшIагъэу иIэхэм джыри зы къахэхъуагъ. «Габукай в потоке времени» зыфиIорэ тхылъыкIэр къыдигъэкIыгъ.

НэкIубгъо 600-м къехъурэ тедзэгъу­шхор Гъобэкъуае итIысыгъо къыщегъэ­жьагъэу инепэрэ мафэ къынэсыжьэу къызэлъеубыты. Илъэс пчъагъэхэм лъэныкъо зэфэшъхьафхэмкIэ чылэм щыхъу­гъэ зэхъокIыныгъэхэр къыщытыгъэх. Гъэсэныгъэм, псауныгъэм, культурэм, спортым ащылэжьагъэхэр, колхозым Iоф щызышIагъэхэр, лэжьэкIошхоу дэсыгъэ­хэр, къуаджэр Хэгъэгу зэошхом илъэ­хъан — мыхэр ыкIи нэмыкIыбэхэр игъэкIотыгъэу къыщытхыхьагъэх. Хъарзынэщхэм къахэхыгъэ тхыгъэхэр, унэе ыкIи къэралыгъо ухъумапIэхэм ачIэлъ тхьапэхэр тхылъым ылъапсэх. КIэкIэу къэпIон хъумэ, зы чылэ икъэбар зэрэщытэу зыщызэхэугъоегъэ шIэныгъэ IофшIэгъэшхоу ар хъугъэ.
УдыкIэко Адам — Теуцожь район администрацием ипащ:
— Iэшъынэ Юныс итхылъ ишIуа­гъэкIэ къуаджэм ицIыфхэм яшIэжь джыри илъэсыбэрэ уахътэм хэкIокIэжьыщтэп. ЛIэужыкIэхэр пIугъэнхэмкIэ, ягушъхьэбаиныгъэ зыкъегъэIэтыгъэнымкIэ осэшхо иIэу щыт. Ащ дэлэжьэгъэ Юныс «тхьауегъэпсэу» есIо сшIоигъу мыпшъы­жьэу тхылъым иугъоин зэрэдэлэжьагъэм­кIэ. Джащ фэдэу къоджэдэсхэм рэзэныгъэ гущыIэхэр афэзгъазэхэ сшIоигъу: ве­теранхэм, непэ чылэр нахьышIу шIы­гъэным дэлажьэхэрэм. Ахэм якъарыукIэ къуаджэм хахъо ышIыгъ, зиужьыгъ.
ПчыхьалIыкъо Аюб – Теуцожь районым инароднэ депутатхэм я Совет итхьамат:
— Тирайон, тикъуаджэхэм афэгъэхьыгъэ тхыгъэу ыпэкIэ гъэзетхэм къащыхаутыгъэхэр иныщтыгъэхэп. ЛэжьэкIо пэрытхэм, Хэгъэгу зэошхом иветеранхэм, культурнэ, общественнэ, экономическэ щыIэныгъэм афэгъэхьыгъагъэх. Ахэм яшIуагъэкIэ, тирайон ицIыф цIэрыIохэм къадэхъугъэхэр къыднэсыжьыгъэх. Ау Iэшъынэ Юныс итхылъэу «Габукай в потоке времени» зыфиIорэм Гъобэкъуае итарихъ инэкIубгъуакIэхэр къытфызэIуе­хых. Чылэми, республикэми хахъо ашIыным зиIахьышIу хэзылъхьэгъэ цIыфхэм ацIэхэмрэ ящыIэныгъэрэ нэIуасэ тафешIы.
Тхылъым игъэхьазырын Iэшъынэ Юныс илъэситфырэ дэлэжьагъ. Мыщ Iоф дишIэ зэхъум ыугъоигъэ къэбархэм ащыщхэр дэхьагъэх ыпэкIэ къыхиутыгъэ нахь тхылъ цIыкIоу «Гъобэкъуай — Теуцожьхьабл» зыфиIорэм. Мызыгъэгурэр ащ икIэлъыкIо фэд, ау нахь убгъугъэу, игъэкIотыгъэу.
— Сэ сызыфэягъэр тауж къикIырэ лIэужхэм тикъуаджэ итарихъ ашIэныр, лъэпкъым уасэ ратэу, агъэлъапIэу псэунхэр ары. НыбжьыкIэ горэ чылэм икъэбар зэригъэшIэнэу, ыушэтынэу ыуж ихьэмэ, егъэжьэпIэшIу тхылъыр фэхъун ылъэкIыщт. Сэ сытхакIоп ыкIи сытарихълэ­жьэп, ау ащ сыдэлажьэ зэхъум пшъэ­рылъэу зыфэзгъэуцужьыгъагъэр сичылэ, лъэхъан зэфэшъхьафхэм ащ дэсыгъэхэм афэгъэхьыгъэ тарихъ тхыгъэу щыIэхэр зэфэсхьысынхэр, непэ къуаджэм ишэн-хабзэхэр лъызыгъэкIуатэу псэухэрэм якъэ­бар еджэщтым ыпашъхьэ къислъхьанэу ары, — еIо авторым.
Iэшъынэ Юныс биологие шIэныгъэхэмкIэ доктор, ШIэныгъэхэмкIэ Дунэе Адыгэ академием, естественнэ шIэныгъэхэмкIэ дунэе мэхьанэ зиIэ европейскэ академием ахэт. ШIэныгъэхэмкIэ Урысые академием иакадемикэу Шэуджэн Асхьадрэ профессорэу Л.О. Карпачевскэмрэ якIэлэеджакIу. 1962-рэ илъэсым щылэ мазэм и 8-м къуаджэу Теуцожьхьаблэ (непэ Гъобэкъуае) къыщыхъугъ. Пшызэ мэкъумэщ институтыр 1990-рэ илъэсым къыухыгъ. ШIэныгъэм ылъэныкъокIэ зыдэлажьэрэр – чIыгум изэгъэшIэн, инженернэ геологиер, чIыгулэжьыныр, чIы­опсым изытет, экономикэр ыкIи социологиер. ШIэныгъэ IофшIэгъэ 350-м ехъу къыхиутыгъ.
Анцокъо Ирин.
Сурэтхэр авторым иех.