«2025-рэ илъэсым къэралыгъо IэпыIэгъур къызIэкIагъэхьан ыкIи зыфэгъэзэгъэхэ Iофым нахь зырагъэушъомбгъун зэралъэкIыщтыр» зыцIэ форумыр Мыекъуапэ щызэхащагъ. Проектэу «Амалэу щыIэхэр» зыфиIорэм тегъэпсыхьагъэу Iофтхьабзэр кIуагъэ.

Урысыем ибзылъфыгъэхэм я Союз, фондэу «Тинеущырэ мафэ зыфэдэщтыр» зыфиIорэм ыкIи АР-м иминистрэхэм я Кабинет иIэпыIэгъу хэлъэу Iофтхьабзэр агъэхьазырыгъ.
Форумым изэхэщакIор АР-м ибзылъфыгъэхэм я Союз и Мыекъопэ къэлэ къутамэ ипредпринимательхэм я Клуб. Предпринимательствэм къэралыгъо IэпыIэгъу етыгъэнымкIэ анахь зигъо Iофыгъохэм атегущыIагъэх. Джащ фэдэу Iоф­шIэкIэшIоу аIэкIэлъымкIэ зэхъожьыгъэх, язэпхыныгъэхэр агъэпытагъэх. Республикэм предпринимательствэ цIыкIумрэ гурытымрэ IэпыIэгъу зэрафэхъу­хэрэм иIофыгъохэм афэгъэхьыгъэ зэхэсыгъоу щыIагъэм хэлэжьагъэх хэбзэ къулыкъухэм, эксперт купхэм ыкIи организацием ялIыкIохэр.
Форумым дэлэжьагъэх АР-м экономикэ хэхъоныгъэмкIэ ыкIи сатыумкIэ и Министерствэ, АР-м мэкъу-мэщымкIэ и Министерствэ, цIыфхэм IофшIэн ягъэгъо­тыгъэнымкIэ Гупчэр, АР-м предпринимательствэм IэпыIэгъу фэхъугъэнымкIэ и Гупчэ, къыдэгъэкIыжьыным хэхъоныгъэ ышIынымкIэ Фондыр ыкIи предпринимательствэмкIэ эксперт шъхьаIэхэр.
Бзылъфыгъэ чанхэм язэIукIэ къызэIуи­хыгъ общественнэ организациеу «Адыгэ Республикэм ибзылъфыгъэхэм я Союз» итхьаматэу Вэрэкъо Хьалимэт.
— АР-м ибзылъфыгъэхэм я Союз мэхьанэшхо зиIэ Iофыгъохэр зэшIуехы, Адыгеим ищыIэныгъэ чанэу хэлажьэ. Предприниматель бзылъфыгъэ 1500-м ехъу Адыгэ Республикэм щэлажьэ. Хэбзэ къулыкъухэр гумэкIыгъоу тиIэхэм къядэIунхэу, кIэщакIо тызфэхъухэрэм къадырагъэштэнэу, IэпыIэгъу къытфэхъун­хэу сыдигъокIи хьазырых, — къыIуагъ Вэрэкъо Хьалимэт.
Зэхахьэм къыщыгущыIагъэх АР-м эко­номикэ хэхъоныгъэмкIэ ыкIи сатыумкIэ иминистрэ игуадзэу Магирет Курузовар, Урысыем ибзылъфыгъэхэм я Союз итхьаматэ иупчIэжьэгъоу Галина Рокецкаяр.
Урысыем ибзылъфыгъэхэм я Союз предпринимательствэ цIыкIумрэ гурытымрэ IэпыIэгъу ятыгъэным иIофыгъохэм афэгъэзагъэу Надежда Карисаловам зэхахьэм къыщыгущыIагъэхэм упчIэ гъэшIэгъонхэр аритыгъ.
Предпринимательхэм IэпыIэгъу ятыгъэнымкIэ АР-м и Гупчэу «Мой Бизнес» зыфиIорэм ипащэу КIыкI Артур «Услуги для бизнеса от центра «Мой Бизнес» зыфиIорэ докладыр къышIыгъ, амалыкIэу щыIэхэм бзылъфыгъэ чанхэр ащигъэгъо­загъэх. Мэкъу-мэщымкIэ министрэм игуадзэу Сергей Шопиныр къоджэдэсхэу бизнесым пылъхэм IэпыIэгъу зэрафэхъу­хэрэм къытегущыIагъ.
КъекIолIэгъэ бзылъфыгъэ пэпчъ шIогъэшIэгъон лъэныкъом едэIун ылъэкIыгъ. «Бзылъфыгъэ пэрыт: теорием къыщегъэ­жьагъэу практикэм ыкIи зэфэхьысыжьхэм анэс» зыфиIорэ лъэныкъор бэмэ ашIогъэшIэгъоныгъ.
Бзылъфыгъэ чанхэм япчъагъэ республикэм щыхэхъо. Iофтхьабзэм кIэщакIо фэхъугъэхэр зыдэлэжьэщт лъэныкъохэр агъэнэфагъ. Адыгеим ис бзылъфыгъэ пэрытхэу тишъолъыр хэхъоныгъэ егъэшIыгъэным зиIахьышIу хэлъхэм мыщ фэдэ зэхахьэхэр ящыкIагъэу алъытагъ.
Лъэпшъыкъо Фатим.