Урысыем и Уголовнэ кодекс ия 159-рэ статья ия 4-рэ Iахь зигугъу къы­шIырэ бзэджэшIагъэ зэрэзэрихьагъэм (гъэпцIагъэкIэ ахъщэ къызэрэзIэкIигъэхьагъэм) пае Мыекъуапэ щыщэу илъэс 43-рэ зыныбжь Гъунажьэкъо Дианэ къыфызэIуахыгъэгъэ уголовнэ Iофым изэхэфын Урысыем щынэгъон­чъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ыухыгъ.

Мы ГъэIорышIапIэм иIофышIэхэм зэрагъэунэфыгъэмкIэ, Гъунажьэкъо Дианэ бзылъфыгъэ горэм пцIы фиусыгъ ыш Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иотдел ипащэу щытэу, ахъщэ зыритыкIэ, щынэгъончъэнымкIэ къулыкъум икIалэ IухьанымкIэ ар IэпыIэгъу къыфэхъунэу къыгъэгугъагъ.
Къэбар нэпцIхэр зышIошъ ыгъэхъугъэ бзылъфыгъэм 2021-рэ илъэсым имэзае къыщегъэжьагъэу 2023-рэ илъэсым ишышъхьэIу нэс сомэ миллионрэ мин 700-м ехъурэ зэкъодзакIом ритыгъ.
ЫужкIэ нафэ къызэрэхъугъэмкIэ, Гъунажьэкъо Дианэ щынэгъончъэнымкIэ къулыкъум зыгорэ Iуигъэхьанэу амал иIагъэп, ащ иIахьылхэр Урысыем щынэгъон­чъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ Iутыгъэхэп, хэбзэнчъэу къыIэкIэхьэгъэ ахъщэр ежь зэрэфаеу зэригъэкIуагъ.
Уголовнэ Iофыр зэхафызэ, гъэпцIакIом иунэ къызалъыхъум, бзэджэшIагъэ зэрихьанымкIэ ащ къызфигъэфедэгъэ пкъыгъохэмрэ документхэмрэ къырагъотагъэх. ХэбзэухъумакIохэм ахэр Iахыгъэх.
Адыгэ Республикэм и Мыекъопэ къэлэ хьыкум Урысыем и Уголовнэ кодекс ия 159-рэ статья ия 4-рэ Iахь диштэу Д. Т. Гъунажьэкъом илъэси 2-рэ мэзи 6-рэ хьапс тырилъхьагъ.
Адыгэ Республикэм и Апшъэрэ хьыкум Мыекъопэ къэлэ хьыкумым унашъоу ышIыгъэм къыдыригъэштагъ ыкIи ащ хэбзэ кIуачIэ иIэ хъугъэ.
Урысыем щынэгъончъэнымкIэ и Федеральнэ къулыкъу
Адыгэ РеспубликэмкIэ и ГъэIорышIапIэ ипресс-къулыкъу.