Адыгеим игъэсэныгъэ учреждениехэм яя 9 — 11-рэ классхэм арысхэм дзэ сэнэхьатхэр къыхахынхэм фэIорышIэрэ зэIукIэгъухэр Мыекъуапэ идзэ комиссариат илIыкIохэм ащызэхащагъэх. Апшъэрэ дзэ еджапIэхэу Урысыем итхэр ыкIи ахэм уазэрачIэхьащт шапхъэхэр ныбжьыкIэхэм къафаIотагъ.

Тхьамафэм къыкIоцI Мыекъуапэ илицееу N34-м, гъэсэныгъэ гупчэу N 18-м, Ханскэм игурыт еджапIэу N 23-м ыкIи ащ дэт Мыекъопэ политехническэ техникумым дзэкъулыкъушIэхэр ащыIагъэх.
Дзэ еджапIэхэм афэгъэхьыгъэу къэгущыIагъэх Мыекъуапэ идзэ комиссарэу Алексей Санташовыр ыкIи ащ игуадзэу Сергей Сергеевыр. Я 11-рэ классыр къэзыухыхэрэм анаIэ зытырара­гъэдза­гъэхэм ащыщ материальнэ-техническэ IофхэмкIэ Дзэ академиер, дзэ-ошъогу академиер, джащ фэдэу мэшIокугъогу дзэхэм, инженернэ-артиллерийскэ ыкIи инженернэ-техническэ институтхэм. Зигугъу къэтшIыгъэ еджапIэхэр зэкIэри ачIэсыщтхэм ащэкIэх.
— Аужырэ уахътэм УФ-м и УIэшыгъэ КIуачIэхэм ясатырэ хэтыщтхэм япчъагъэ хагъахъо. Ащ пае гъэсэныгъэ зиIэ IофышIэхэр, офицерхэр, прапорщикхэр тищыкIагъэхэ хъугъэ. Iофыгъоу къэуцугъэм епхыгъэу еджа­пIэр къэзыухыхэрэм ты­къяджэ дзэ сэнэхьатхэр къыхахынхэу. АщкIэ мыщ фэдэ зэIукIэгъухэр регъэкIокIыгъэнхэм мэхьанэ иI, — хигъэунэфыкIыгъ Алексей Санташовым.
ЗэрэчIэхьащтхэ шапхъэхэм къатегущыIагъ къалэм идзэ икомиссар игуадзэу Сергей Сергеевыр.
— Апшъэрэ дзэ еджапIэхэм уачIэхьаныр нахь IэшIэх адрэхэм анахьи. ЗыкI къэралыгъо ушэтыныр умытыгъэми, ежь еджапIэхэм ащыгъэнэфэгъэ ушэтынхэмкIэ учIэхьан плъэкIыщт. Ахэр ежь еджакIор зыфэе сэнэхьатым елъытыгъэу къыхехых, — къыIуагъ Сергей Сергеевым.
Комиссариатым къикIыгъэхэм къаIотагъэхэр ныбжьыкIэхэм ашIогъэшIэгъонэу едэIугъэх, кIэлэеджакIохэм ащыщхэр апшъэрэ дзэ еджапIэхэм ачIахьэхэмэ ашIоигъоу зафэзыгъэзагъэхэри къахэкIыгъэх.
Iэшъынэ Сусан.
Сурэтыр: Тыкъо Аскэрбый.