Адыгэ Республикэм и Апшъэрэ хьыкум и Президиум изэхэсыгъоу щыIагъэм 2024-рэ илъэсым шъолъырым ихьыкумышIхэм Iофэу ашIагъэм икIэуххэр щызэфахьысыжьыгъэх ыкIи пшъэрылъыкIэхэр щагъэнэфагъэх. Адыгеим и ЛIышъхьэу КъумпIыл Мурат Iофтхьабзэм хэлэжьагъ.

Джащ фэдэу ащ щыIагъэх АР-м и Къэралыгъо Совет – Хасэм и Тхьаматэу Владимир Нарожнэр, щынэгъончъэнымкIэ Федеральнэ къулыкъум и ГъэIорышIапIэу Адыгэ Республикэм щыIэм, АР-м хэгъэгу кIоцI IофхэмкIэ и Министерствэ, Арбитраж хьыкумым, Мыекъопэ дзэ гарнизоным, АР-м и Нотариальнэ палатэ, хьыкумышI приставхэм яфедеральнэ къулыкъу и ГъэIорышIапIэу АР-м щыIэм, ошIэ-дэмышIэ IофхэмкIэ Урысыем и Министерствэ АР-мкIэ и ГъэIорышIапIэ, юстициемкIэ Министерствэм АР-мкIэ и ГъэIорышIапIэ, АР-м и Очыл палатэ, хьыкумышI департаментым и ГъэIорышIапIэу АР-м щыIэм япащэхэр, АР-м ихьыкумышI системэ иIофышIэхэр.
Зэхэсыгъор зэрищагъ АР-м и Апшъэрэ хьыкум и Тхьаматэу Шумэн Байзэт.
Iофтхьабзэм хэлажьэхэрэм шIуфэс къарихызэ Адыгеим и ЛIышъхьэ къызэрэхигъэщыгъэмкIэ, республикэм ихьыкумышIхэм яIофшIэн хэхъо зэпыт. КъызэрэхагъэщыгъэмкIэ, хьыкумышIхэм япшъэрылъхэр нахь дэгъоу зэрагъэцэкIэщтхэм анаIэ тырагъэты, правосудием ицифровизации яIахь хашIыхьэ.

«А пстэуми къарыкIырэр хьыкумышI­хэм нахь шIуагъэ къытэу япшъэрылъхэр агъэцакIэхэ ыкIи цIыфхэм ахэм нахь цыхьэ къафашIы зэрэхъугъэр ары. Ащ къыкIичы хъущтэп. ЦIыфхэр мэгугъэх зэнэкъокъоу къэтэджыхэрэр зэфагъэ хэлъэу зэшIохыгъэ хъунхэу, хьыкумышI­хэм теубытагъэрэ IэпэIэсэныгъэрэ ахэлъэу япшъэрылъхэр зэшIуахынхэу», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, цыхьэшIэгъу правовой системэ лъэшыр щымыIэу обществэм зыпкъитыныгъэ хэлъэу хэхъоныгъэ ышIыным ыкIи экономикэм зыкъыIэтыным ягугъу пшIын плъэкIыщтэп. Республикэм и ЛIышъхьэ анахьэу къыхигъэщыгъэхэм ащыщ хьыкумхэм къаIэкIэхьэрэ Iофхэу IофшIэным, унагъохэм, социальнэ лъэныкъомкIэ зиIофхэр анахь дэй цIыфхэм яфитыныгъэхэм якъэухъумэн япхыгъэхэм анахьэу анаIэ зэратырагъэтын фаер.
ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм яфитыныгъэхэм якъэухъумэн шъхьафэу къащыуцугъ АР-м и ЛIышъхьэ. Ащ къызэриIуагъэмкIэ, зэкIэми ар зэдытипшъэрылъэу щыт, хэбзэ къулыкъу­хэр зэкIэ ащ изэшIохын къыхэгъэлэжьэгъэнхэ фае. ЦIыф куп гъэнэфагъэу зигугъу къэтшIыгъэм IэпыIэгъу етыгъэнымкIэ амалэу щыIэхэм нахь заушъомбгъу, лъэныкъо зэфэшъхьафхэр къыхегъэубытэгъэнхэми анаIэ тырагъэты. Республикэ программэу «ЛIыхъужъхэм яуахът» зыфиIорэр зыфытегъэпсыхьагъэр хэушъхьафыкIыгъэ дзэ операцием иветеранхэр къэралыгъо ыкIи муниципальнэ хэбзэ къулыкъухэм яIофшIэн нахьыбэу хэгъэлэжьэгъэнхэр ары.
«Президентэу Владимир Путиным къызэрэхигъэщыгъэмкIэ, «тидзэкъулыкъу­шIэхэм ыкIи ахэм яунагъохэм арысхэм яфитыныгъэхэр зэкIэ хабзэм къыухъу­мэнхэ фае», — къыIуагъ КъумпIыл Мурат.
Республикэм ихьыкумышI къулыкъу­хэм япшъэрылъхэм занэсым Адыгеим и ЛIышъхьэ анахьэу къызщыуцугъэр коммунальнэ фэIо-фашIэхэм, цIыфхэм зыщыпсэухэрэ унэхэмкIэ фитыныгъэу яIэхэр къэухъумэгъэнхэм алъэныкъокIэ унашъо­хэр ашIыхэ зыхъукIэ лъэныкъо пстэури къыдалъытэн зэрэфаер ары.
Республикэм социальнэ зыпкъитыныгъэу илъыр гъэпытэгъэнымкIэ зэфагъэ зыхэлъ хьыкум IофшIэным КъумпIыл Мурат анаIэ тыраригъэдзагъ. Ар уголовнэ, финанс ыкIи хэбзэIахь бзэджэшIагъэхэм, гъогузекIонымкIэ шапхъэу щыIэ­хэр укъуагъэ зэрэхъухэрэм япхыгъ. Лъэ­ныкъохэр зэгъэшIужьыгъэнхэмкIэ, хьыкумхэр къыхэмыхьэхэу зэшIопхын плъэкIыщт Iофыгъоу къэуцухэрэр лъэныкъо пстэури икъоу къыдэлъытагъэу зэшIохыгъэнхэмкIэ, къэбар технологиехэр нахь игъэкIотыгъэу гъэфедэгъэнхэмкIэ Iоф гъэнэфагъэу зэшIуахырэм мэхьанэшхо зэриIэр ащ къыхигъэщыгъ.
Республикэм и ЛIышъхьэ агу къыгъэ­кIыжьыгъ Адыгеим исоциальнэ-экономикэ хэхъоныгъэкIэ, цIыфхэм яфитыныгъэхэм­рэ яфедэхэмрэ якъэухъумэнкIэ хэбзэ къулыкъу пстэуми пшъэрылъ гъэ­нэфа­гъэхэр зэряIэхэр. Мыщ дэжьым хэбзэ къулыкъухэр икъоу анаIэ тетэу, шъхьэ­ихыгъэу Iофхэм зэрифэшъуашэм тетэу ахэплъэнхэм бэ елъытыгъэр. ХьыкумышIхэм, республикэм ихьыкум системэ иIофышIэхэм гуетыныгъэ фыряIэу, пшъэ­дэкIыжь зэрахьырэр къагурыIозэ яIоф зэрагъэцакIэрэм пае зэрафэразэр ащ къыIуагъ ыкIи гъэхъэгъакIэхэр ашIынхэу афэлъэIуагъ.
Зэхэсыгъом къыщыгущыIагъэх АР-м и Къэралыгъо Совет – Хасэм и Тхьаматэу Владимир Нарожнэр, АР-м и Апшъэрэ хьыкум и Тхьаматэу Шумэн Байзэт. ХьыкумышI системэм ипащэ къызэриIуагъэмкIэ, илъэсэу икIыгъэм Iоф мини 131-м ехъу зэхафыгъ, ащ ыпэрэ илъэсым елъытыгъэмэ, процент 29-кIэ ар нахьыб. ЗэгъэшIужь хьыкумышIхэр къаIэкIэхьэгъэ Iофхэм япроцент 90-м ехъумэ ахэплъагъэх.
Зэхэсыгъом ыуж тын лъапIэхэр зыфагъэшъошагъэхэм аратыжьыгъэх. Хэбзэ гъэуцугъэм игъэпытэнкIэ, цIыфхэм яфитыныгъэхэр ыкIи яфедэхэр къэухъу­мэгъэнхэмкIэ гъэхъагъэу иIэхэм апае щытхъуцIэу «АР-м изаслуженнэ юрист» зыфиIорэр фагъэшъошагъ АР-м и Мые­къопэ къэлэ хьыкум итхьаматэу Алексей Никандровым. АР-м и ЛIышъхьэ ирэзэныгъэ тхылъхэр афагъэшъошагъэх Тэхъу­тэмыкъое район хьыкумым ихьыкумышIэу Мария Горюновам, Красногвардейскэ район хьыкумым ихьыкумышIэу ЛIышэ Арсен. IофышIэ заулэмэ къулыкъу шIухьафтынхэр аратыгъэх.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.