Тигъунэгъумэ яхьадагъ
Заор щымыIэжьми, тигъунэгъумэ
ТхьамыкIагъор непэ къафэкIуагъ:
Шъукъо щыIэжьэп аIуи, лIыжъы купмэ
Къэбар дэир ахэм къараIуагъ.

Маплъэх, зи алъэгъурэп
Заор щымыIэжьми, сшынахьыжъхэр
ДзакIом джыри зэрэщыIэх.
Сянэ фэдэу тихьэблэ нэнэжъхэр
Якъэт пэплъэх — гугъэщыIэх.

Къэбар гомыIукIэ агъэежьыгъи,
КIодыгъэр зыцIэу къэмыкIожьыгъи,
Заор заошъ, ашIошъ хъурэп,
Маплъэх шъхьакIэ, зи алъэгъурэп.

ДзэкIолIхэр заом къекIыжьых
Гугъэ къэткIэ, гушIо нэгукIэ
Заом дзэлIхэр къекIыжьых,
Гъэтхэ уцкIэ, уцы лъэгукIэ
ЧIы уIагъэр мэкIыжьы.

Жьыбгъэ макIэу къыкIэпщырэр
ГушIогъуиблкIэ къытхэрэт.
Пчэдыжь тыгъэу къытфыкъокIрэр
ТекIоныгъэм иорэд.

Аущтэу сэIо, сэIо шъхьакIэ,
ЩымыIэжьмэ сыд ябагъ?
СэшIэ, сэшIэ — чIылъэм бгъэкIэ
Фэхыгъабэр хэIубагъ.

Зэо ужым иапэрэ ос
Зэо ужым икIымафэ
Гупсэф шъабэу къесы.
Къесы осыр, осыр мафэшъ,
ЧIигъэсаеу къесы.

Мысысыхэу чъыгышъхьапэм
Тхьэпэ мытхкIэ къеплъы,
Нэгуф шэплъэу дунай пшъхьапэшъ,
Шыу щтыргъукIыр пэплъы.

Лъэпэ нэфэу къетIысэхы,
Ищхы макъи фыжьы.
Зиушъэфми зэхэсэхы,
ЫнэкIапи сфежьы.

Жьым хэсыкIми, хэмысыкIми,
Ар зылъэгур слъапэ,
Къес-къемысми, хэмыщхыкIми,
ЧIылъэр тэркIэ лъапIэ.
Псэ зыпыти, зыпымыти
Тыжьын жъгъыур фехьы,
Iахь къехьакIэу фэкIошъ хэти
Къэбарыбэу унэм фехьэ.
Зэоужэу чIы уцуагъэр
ЧIигъэсаеу къесы.
Къесы осыр, ос гушIуагъор
ДзэкIолI къашъхьэм тесэ.

Сыд джыдэдэм иIушъашъэ
Сэ сымышIэу хэлъыр?..
ДзэкIо кIалэм пэплъэ пшъашъэр,
Гъатхэм фэкIо, фэкIо чIылъэр.

Ахэр тыгу пхырэкIых
Ар зыхъугъэм бэ тешIагъэр,
ИлъэсиплIым мыгъэ блэкIы.
Сызэреплъэу зэо кIуагъэр
Бгъэр зэридзэу гум къегъэкIы.

Ащ япчъагъэ зыфэдизыр
Тхьапшми сшIэрэп, сшIэрэп, сшIэрэп.
Тыплъэ къэсми, гъуни, нэзи
ИмыIахэу цыпэм пыкIрэп.

АдаIыгъэу бгъуитIукIэ Iашэр
ЗэолI гъэрхэр чылэм блафых,
ТымышIахэу тэ нэхаши,
Хьалыгъу тэдзы — ажэхафэ.

Фыртынаем хэтых пIонэу
Нэмыц-фрицхэр мэгуIапэх.
ШъуIукI аIошъ, къытэонхэу
Якъэлатмэ алъэIабэх.

ЗэолI гъэрхэр чылэм блафых,
Блафых, блафых — зэфэшъхьафых.
Зэуж итых. Тыгу пхырэкIых,
ЧIыгур щэIоу мэгумэкIы.

Зэо кIэзыжьри тихэгъэгу
Зэоуж илъэсэу мы илъэсыр
ЦIыфхэмкIэ гъэ дэй, гъэ мыгъу.
Тшхыным тыщыкIагъэп джы нэсы,
Джы макухри тшIокIэщыгъу.

Щыгъури, сырнычри, зыщыплъэщтри
Чылэм дэлъэп — гъуи-сый.
Сыдэу пшIына, зэо кIэзыжьри
Тихэгъэгушъ, шъуемыгый.