ШIэжьым фэгъэхьыгъэ зэнэкъокъухэр

ХэушъхьафыкIыгъэ дзэ операцием ядзэ пшъэрылъхэр щагъэцакIэхэзэ хэкIодагъэхэм, тичIыгогъу лIыхъужъхэм яшIэжь фэгъэхьыгъэ спорт зэнэкъокъухэр Адыгэкъалэ щыкIуагъэх.
Мы къалэм щыщхэу Хэгъэгур къаухъумэзэ зыпсэ зытыгъэ дзэкIолIхэу Гъыщ Андрей, Захар Теремец, Артем Мироненкэм ыкIи Максим Дзябко яшIэжь Iофтхьабзэм щагъэлъэпIагъ, ахэм ацIэхэр егъашIэм къэралыгъом итарихъ хэтхэгъэщтых.

Зэнэкъокъум изэхэщэн кIэщакIо фэхъугъэх Адыгэкъалэ иадминистрацие, къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ, «Движение Первых» ичIыпIэ отделение ыкIи спорткомплексэу Лъэцэр Хьазрэт ыцIэ зыхьырэр. Зэнэкъокъум икъызэIухын хэлэжьагъэх администрацием илIыкIохэр, ветеранхэр, общественнэ IофышIэхэр, къалэм икIэлэеджакIохэр.
Муниципалитетым иеджапIэхэм къарыкIыгъэ ныбжьыкIэхэу я 5 — 6-рэ ыкIи я 7 — 8-рэ классхэм арысхэр зэнэкъокъугъэх. Зэкъошныгъэр, зэдеIэжьыныгъэр, спортыр зэрякIасэр къахэщэу Iофтхьабзэр рекIокIыгъ. КIэух шъхьаIэу ащ фэхъугъэр текIоныгъэ къыдэзыхыгъэхэр къыхэгъэщыгъэнхэ закъор арэп, лIыхъужъхэм яшIэжь агъэлъапIэзэ, къалэм щыпсэухэрэм язэпхыныгъэ гъэпытэгъэныр, къыткIэхъухьэрэ лIэужхэр патриотизмэр, гушхоныгъэр ахэлъхэу пIугъэнхэр ары.