Top.Mail.Ru

АмалыкIэхэр къызфегъэфедэх

Урысыем и Почтэ Курскэ ыкIи Белгород хэкухэм ыпкIэ хэмылъэу посылкэхэр зэрафитIупщырэм шIушIэ фондхэр къыхигъэлэжьэнхэу зэзэгъыныгъэ адишIыгъ.

Мы Iофтхьабзэр зыфэIорышIэрэр адрес гъэнэфагъэ темытхагъэу, ау IэпыIэгъур зищыкIэгъэ пстэуми аIугъэ­кIэгъэныр ары.
Гъэтхапэм и 19-м къыщегъэжьагъэу Курскэ ыкIи Бел­город хэкухэм ыпкIэ хэмылъэу афатIупщырэ ыкIи а шъолъырхэм къарыкIырэ посылкэхэр зэрагъэзекIощтхэ шIыкIакIэм Урысыем и Почтэ техьагъ. Адрес зытемытхэгъэ шIушIэ IэпыIэгъоу къаугъоигъэр къэралыгъом ипочтэ отделениехэм зэкIэми арахьылIэн алъэкIыщт, нэужым почтэм фондхэм ыкIи организациехэм ар аIэкIигъэхьащт: Народнэ фронтым, Социальнэ навигаторым, гуфакIохэу а шъо­лъырхэм Iоф ащызышIэхэрэм. Мы организациехэм цIыфэу ащ щыпсэухэрэм фэныкъуа­гъэу яIэхэр дэгъоу ашIэ, ащ тегъэпсыхьагъэу IэпыIэгъур атырагощэщт. ШIушIэ IэпыIэгъур птIупщыным фэшI адрес гъэнэфагъэ пшIэныр ищыкIагъэп, фондхэм яадрес, яиндекс операторхэм дэгъоу ашIэ.
Курскэ ыкIи Белгород шъолъырхэм ащыпсэухэрэм иIахьыл-гупсэхэу нэмыкI шъолъырхэм кIожьыгъэхэм апае ыпкIэ зыхэмылъ посылкэу афатIупщыхэрэри а фондхэм яамалкIэ агъэхьынхэ алъэкIыщт. Ащ пае ыпкIэ зыхэмылъ гъэхьыным ииндекс агъэфедэмэ хъущт. ЗыIукIэн фэе цIыфым иадрес ащ кIоцIалъхьанышъ, отделением ар къекIолIэнышъ, чIихыжьыщт.
ИкIыгъэ илъэсым къыщегъэжьагъэу Курскэ ыкIи Белгород хэкухэм ащыпсэухэрэм апае посылкэхэр ыпкIэ хэмылъэу анэтэгъэсых ыкIи ежь яехэри афызетэщэх. Урысыем щыпсэухэрэм ацIэкIэ рэзэныгъэ гущыIэу бэ къытIукIагъэр. А уахътэм къыкIоцI нэбгырабэмэ агухэр ыкIи акIуачIэ зэтпхынхэ, а шъолъырхэм ащыпсэухэрэм тызэрафэгумэкIырэр, тызэра­къотыр зэхядгъэшIэн тлъэкIыгъ. Iофтхьабзэм шIушIэ фондхэр къызэрэхэдгъэлэжьэщтхэм ишIуагъэкIэ шъхьадж нахь ищыкIэгъэ IэпыIэгъур IукIэн амал щыIэ хъугъэ, къыIуагъ Урысыем и Почтэ игенеральнэ пащэу Михаил Волковым.