АР-м и Лъэпкъ тхылъ­еджапIэ Iэнэ хъурае «Зыпкъ ит щыIакIэм зафэу фэкIогъэныр» зыфиIорэ темэмкIэ щы­Iагъ. Iофтхьабзэр щэфа­кIохэм яфитыныгъэхэр къэухъумэгъэнхэм и Дунэе мафэу 1989-рэ илъэсым щегъэжьагъэу гъэтхапэм и 15-м хагъэунэфыкIырэм фэгъэхьы­гъагъ.

Iэнэ хъураер Роспотребнадзорым АР-мкIэ и ГъэIорышIапIэрэ Лъэпкъ тхылъеджапIэмрэ зэдызэхащагъ.
Гухэлъэу Iэнэ хъураем хэлэ­жьагъэхэм яIагъэр хэтрэ цIы­фи ифитныгъэхэр икъоу ышIэхэу, а зэкIэмкIэ шIэныгъэ егъэгъотыгъэныр ары. «Зыпкъ ит щы­IакIэр» зыпIокIэ, бэ къыубытырэр: пстэуми апэу тыкъэзыуцухьэрэ чIыопсым икъэбзагъ, цIыфымкIэ зэрар мыхъоу сыдрэ IофшIэни гъэпсыгъэныр, Iофыбэ зэфэшъхьафхэр цIыфымкIэ федэ къатэу шIыгъэнхэр.
Iофтхьабзэм къырагъэблэ­гъагъэх МКъТУ-м ифакультет зэфэшъхьафхэм ястудентхэр ыкIи кIэлэегъаджэхэр, тхылъеджэхэр.
ТхылъеджапIэм техническэ ыкIи экономическэ литерату­рэмкIэ иотдел ипащэу Гайсумо­ва Нуриет Iофтхьабзэр къызэ­Iуихыгъ, мэфэкIымкIэ пстэуми къа­фэгушIуагъ, Iэнэ хъураем хэ­­лажьэхэрэм гъэхъагъэхэмкIэ къафэлъэIуагъ. Роспотребнадзорым АР-мкIэ и ГъэIорышIапIэ иIофышIэхэм Iэнэ хъураер лъа­гъэкIотагъ.
ЩэфакIохэм яфитыныгъэхэр къэухъумэгъэнхэмкIэ Дунэе ма­фэм итарихъ кIэкI къыIотагъ ГъэIорышIапIэм цIыфхэм яфитыныгъэхэмкIэ иотдел ипащэ игуадзэу Теуцожь Даринэ.
Юристэу ЛIэхъусэжъ Анзаур къытэшIэкIыгъэ чIыопсым икъы­зэтегъэнэн ухэлэжьэн зэрэ­фаем, пшъэдэкIыжьэу хэти иIэр зэхишIэным, ишIуагъэ къыгъэ­кIон зэрилъэкIыщтым, пыдза­фэхэр гъэкIодыгъэнхэм имызакъоу, федэ къатэу шIыгъэнхэм, хэти фэлъэкIырэр ышIэн зэрэфаем къатегущыIагъ.
АР-м къытэшIэкIыгъэ дунаим икъэухъумэнкIэ ыкIи чIыопс баи­ныгъэхэмкIэ и ГъэIорышIа-
пIэ испециалист-ушэтакIоу Кислицына Светланэ чIыопсым иухъу­мэн-къызэтегъэнэнкIэ Iоф шъхьа­Iэу зэшIуахыхэрэр зыфэ­дэхэр къыIотагъ. 2025-рэ илъэ­сым щегъэжьагъэу Адыгеир фе­деральнэ проектэу «Экономика замкнутого цикла» къыхэщыгъэу лъэпкъ проектэу «Экологическое благополучие» зыфиIорэм зэрэхэлажьэрэр кIи­гъэтхъыгъ.

Лъэпкъ тхылъеджапIэм тех­ни­ческэ ыкIи экономическэ литературэмкIэ иотдел иIофышIэ шъхьаIэу Н. П. Плотнерчук экологическэ информациемкIэ Гупчэу «ХьакIэщ шхъуантI» зыфиIорэм Iофэу ышIэрэмкIэ къадэгощагъ, къыткIэхъухьэрэ кIэлэцIыкIухэр, еджакIохэр, ныб­жьыкIэхэр чIыопсым икъэбзэныгъэ фэсакъхэу пIугъэнхэмкIэ амалэу щыIэхэм ягугъу къы­шIыгъ.
Iэнэ хъураер шIыкIэшIукIэ къыуатэу щытыгъ, чIыгумкIэ ыкIи цIыфымкIэ ртутым зэрар къызэрихьырэр, зэрыт пкъы­гъохэр узыщыфаем щычIэбдзы­хэмэ хъунэу зэрэщымытыр, цIы­фым жьэу, псэу, нэмыкIэу ыгъэфедэрэр а зэкIэмэ зэраушIоирэр, ахэр уфэсакъызэ бгъэкIодынхэ зэрэфаер кIагъэтхъыгъ.
Iэнэ хъураем итемэ шъхьаIэ къызэIуихэу гъэпсыгъагъэ тхылъ экспозициеу «Справедливый переход к устойчивому образу жизни» зыфиIорэр, джащ фэдэу электроннэ лъэтегъэуцуи ­ашIыгъ.
ЩыIэныгъэр цIыфхэмкIэ гу­псэфэу, тынчэу шIыгъэным къи­кIырэр тичIыгу хэкIитэкъу­пIэ-­шIоилъэ тымышIэу, ты­фэ­сакъэу, къабзэу тыухъумэныр ары.
Дзэукъожь Нуриет.