Республикэ гъэзетэу «Адыгэ макъэм» иIофышIэхэр шIэжь Iофтхьабзэм кIэщакIо фэхъугъэх. Хэгъэгу зэошхом ТекIоныгъэр тикъэралыгъо къызщыдихыгъэр илъэс 80 зэрэхъурэм ипэгъокIэу ыкIи гъэзетым ижурналистэу ащ хэлэжьагъэхэм, зыпсэ зытыгъэхэм яшIэжь агъэлъапIэу Мыекъуапэ икъэлэ парк чъыгэе плъыжь щагъэтIысхьагъ.

Iофтхьабзэм хэлэжьагъэх АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэ­хэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, гъэтIысыжь чъыг лъэпкъыр къы­хэзыхыгъэу ыкIи гъэзетым иIофтхьабзэ изэшIохынкIэ IэпыIэгъу къытфэхъугъэу, АР-м мэзхэмкIэ и ГъэIорышIапIэ ипащэу Былымыхьэ Рэщыдэ, редакцием иIофышIэхэр.
— Мыгъэ Урысыем ТекIоныгъэм ия 80-рэ илъэс щыхагъэунэфыкIыщт. Гъэзетым ащ фэгъэхыгъэ тхыгъэхэр бэу къитэгъахьэх. Ахэм анэмыкIэу тиIофшIэгъу-журналистхэу Хэгъэгу зэошхом хэлэжьагъэхэм, ТекIоныгъэм фэбэнагъэ­хэм, зыпсэ ащ фэзытыгъэхэм яшIэжь дгъэлъапIэ тшIоигъоу чъыг афэдгъэтIысхьанэу итхъухьагъ. Чъыгаер — лIыгъэм, пытагъэм, щыIэныгъэ кIуачIэм ятамыгъ, адыгэмэ агъэлъапIэщтыгъэ чъыг лъэпкъ, — къыIуагъ «Адыгэ ма­къэм» иредактор шъхьаIэу МэщлIэкъо Саидэ. — Гъэзетэу «Социалистическэ Адыгеим» ижурналист 26-рэ фэдиз зэуа­пIэм Iухьэгъагъ, ахэр: Андырхъое Хъусен, Джэнчэтэ Мурат, Тыгъужъ ДышъэкI, Пэрэныкъо Мурат, Блэшэ Мыхьамод, Бэджэнэ Иляс, Лъэустэн Юсыф, Шэуджэн Мыхьамод, ХьакIэмызэ Рэщыд, Хъуажъ Исмахьил, Шъхьаплъэкъо Хьис, Жэнэ Къырымыз, Хъущт Хъалид, Шъоджэ Мыхьамчэрый, Цэй Аскэрбый, Нэтхъо Чэмал, Iэшъынэ Хьазрэт, Хьарэтэ Дзэгуащ, Хьатитэ Нэфсэт. Ахэм ащыщэу нэбгырэ 14-р хэкIодагъ.

Советскэ Союзым и ЛIыхъужъэу Андырхъое Хъусен Украинэм ит къуа­джэу Дьяково къагъэгъунэзэ щызэрихьэгъэ лIыхъужъныгъэр зэрэдунаеу зэлъа­шIагъ. Илъэс 80-м ехъу тешIэжьыгъэу, хэ­ушъхьа­фыкIыгъэ дзэ операцием хэлэжьэгъэ дзэкIолI ныбжьыкIэу Владислав Дорохиным Хъусен илIыгъэ зекIуакIэ фэдэ зэрихьагъ. ДзэкIолIэу игъусагъэхэр Iуи­гъэкIыхи, пыйхэр благъэу къызэригъэкIуалIэхи гранатитIукIэ зыкъыгъэо­жьыгъ. Урысыем и ЛIыхъужъыцIэ ащ къыфагъэшъошагъ. ЛIыхъужъым янэ Президентэу Владимир Путиным дыриIэгъэ зэIукIэгъум ыкъо зэрихьэгъэ лIы­хъужъ­ныгъэр къыIотагъ.
— Непэ дгъэтIысхьэрэ чъыгыр тицIыф­хэм, тиIофшIэгъухэм зэрахьэгъэ лIы­хъужъ­ныгъэм инэпэеплъэу хъущт, республикэм икъэлэ шъхьаIэ ипарк къыгъэдэхэщт. Непэ зишIэжь дгъэлъапIэ­хэрэр къыткIэхъухьэрэ лIэужхэм щысэ­техыпIэ афэрэхъух. АфэдгъэтIысхьэгъэ чъыгыр бырэбэшхо, мэфэ жъоркъым ащ ижьау зыщыбгъэпсэфын плъэкIынэу, гуIэтыпIэу орэхъу. Дунаим мамырны­гъэр ерэлъ! — къыкIигъэтхъыгъ МэщлIэкъо Саидэ.
Шъхьэлэхъо Аскэррэ Былымыхьэ Рэщыдэрэ IэпыIэгъу афэхъухэзэ «Адыгэ макъэм» иIофышIэхэм чъыгаер зэдагъэтIысхьагъ.
Мыщ фэдэ Iофтхьабзэхэм патриотическэ, пIуныгъэ мэхьэнэ ин зэряIэр, ахэм тишIэжь къызэраIэтырэр Шъхьэлэхъо Аскэр хигъэунэфыкIыгъ. «Адыгэ макъэм» иIофышIэхэм Iофтхьабзэу зэхащагъэм дыригъаштэу, журналистхэм непэ яIофшIэн пстэуми алъыIэсэу, къэ­ралыгъом, шъолъырым къащыхъурэ хъугъэ-шIагъэхэм якъэIотэкIо шъхьаIэхэу зэрэщытхэр къыIуагъ. ДгъэлъэпIэрэ шIэжьым нэмыкIэу, непэ къэралыгъом игъунапкъэхэр къэзыухъумэхэрэмкIэ мыщ фэдэ Iофыгъохэм мэхьанэ зэряIэр хигъэунэфыкIыгъ.
— Чъыгыр зыфэдгъэтIысхьэгъэ журналистхэу Хэгъэгу зэошхом илъэхъан къэралыгъор къытфэзыухъумагъэхэм ацIэ рядгъэIонэу тыфэягъ. Мамыр щыIакIэм имызакъоу, заом хэтхэу ащ фэгъэхьыгъэ къэбархэр къатхыжьы­щтыгъ. Арышъ, лIыхъужъэу тэлъытэх, ащ фэдэ цIэ лъапIэ къызэратыгъэхэри ахэтых. Чъыгэу дгъэтIысхьагъэм илъэс мин фэдиз къыгъэшIэн ылъэкIыщт. Чъыгы­шхо хъугъэу Тхьэм къытегъэлъэгъу, ащ фэдэ зао къэмыхъужьэу, журналистхэм кIэлэ­цIыкIу IыгъыпIэхэм, еджапIэхэм, щыIэныгъэм инэмыкI лъэныкъохэм ямамыр щыIакIэ къагъэлъагъоу щегъаIэх, — къы­Iуагъ АР-м имэзгъэIорышIапIэ ипащэу Былымыхьэ Рэщыдэ.
Джащ фэдэу Iофтхьабзэм хэлэжьагъэ­хэм ащыщэу, редакцием Iутыгъэ журналист нахьыжъхэм Iоф адэзышIагъэу, АР-м изаслуженнэ журналистэу Тхьар­къохъо Сафыет зэхахьэм къыщыгущы­Iагъ:
— Хэгъэгур лъэшэу шIу зылъэгъущтыгъэхэм, зыпсэ емыблэжьыгъэ журналистхэм Iоф адэсшIэнэу синасып къы­хьыгъ. Апэ зыцIэ къесIомэ сшIоигъор Андырхъое Джантэмыр, ащ игуадзэу Хъуажъ Исмахьили цIыф Iушэу щытыгъ. Классикхэр икIэсагъэх, уахътэ къызщыхэкIырэм Тютчевым иусэхэм къяджэщтыгъ. Шъоджэ Мыхьамчэрые IэпэIэсэныгъэшхо хэлъыгъ, бзэр дэгъоу ышIэщтыгъ, ежь ие шъыпкъэу тхэкIэ амал гъэшIэгъон IэкIэлъыгъ, ныбжьыкIэу редакцием Iоф щызышIэхэрэм ишIуагъэ аригъэкIыщтыгъ. Зым нахьи зыр нахь цIыфышIухэу, ныбжьыкIэхэр гъогу тэрэз зэрэтыращэщтхэм, яхэгъэгу шIу алъэгъоу зэрагъэсэщтхэм пылъыгъэх. ШIукIэ, дахэкIэ ягугъу тэшIы.
«Адыгэ макъэм» зэхищэгъэ шIэжь Iофтхьабзэм хэлэжьагъэхэр зэгъусэхэу чъыгаеу агъэтIысхьагъэм дэжь сурэт зы­щытырарагъэхыгъ. Хэгъэгур къэзыухъу­мэгъэ журналист-лIыхъужъхэм яшIэжь ыкIи къытпыщылъ мамыр щыIакIэм ятамыгъэу чъыгаер бырабэу къэкIынэу етэIуалIэ.
Тэу Замир.