Адыгэ Республикэм псауныгъэр къэухъумэгъэнымкIэ и Министерствэ иколлегие зэхэсыгъоу иIагъэм сэнэхьат IэпэIэсэныгъэмкIэ шъолъыр зэнэкъокъум икIэуххэр щызэфахьысыжьыгъэх, Адыгэ Республикэм и ЛIышъхьэ ишIухьафтынэу «Участковэ врач-терапевт анахь дэгъу» зыфиIорэм илауретхэм дипломхэр щаратыжьыгъэх.

Участковэ врач-терапевт сэнэхьатым имэхьанэ зыкъегъэIэтыгъэным, пэублэ медикэ-санитар IэпыIэгъур нахьышIоу зэхэщэгъэным афытегъэпсыхьагъэу, Адыгэ Республикэм и ЛIышъхьэу КъумпIыл Мурат ышIыгъэ унашъом диштэу мыщ фэдэ зэнэкъокъур гъэрекIо щегъэ­жьагъэу зэхащэ. Мыгъэрэр ятIонэрэ зэнэкъокъоу щытыгъ. Адыгеим итерапевти 190-рэ ащ хэлэжьагъ. Апэрэ чэзыум нэбгырэ 61-рэ къыщыхахыгъагъ, ахэм ащыщэу нэбгыри 9-р ары зэнэкъо­къум иятIонэрэ чэзыу щыпхырыкIыгъэр. Рейтингым икIэуххэм атетэу Адыгэ Республикэм и ЛIышъхьэ ишIухьафтын зыфагъэшъошэщт лауреатищыр къэнэфагъ. Ящэнэрэ чIыпIэр зыхьыгъэр Шэ­уджэн район гупчэ сымэджэщым иврач-терапевтэу Хьакъунэ Изабелл ары (балл 46-рэ). Тэхъутэмыкъое район гупчэ сымэджэщым иврач-терапевтэу Батмэн Джульеттэ ятIонэрэ чIыпIэр къыхьыгъ (балл 51-рэ). ТекIоныгъэр къыдихыгъ Ханскэ IэзапIэм иврач-терапевтэу Кристина Нелюбинам (балл 76-рэ).
АР-м и ЛIышъхьэ ишIухьафтын илауреатхэм дипломхэмрэ ахъщэ шIухьафтынрэ афагъэшъошагъэх. ТекIоныгъэ къыдэзыхыгъэхэм республикэм ипащэ ыцIэкIэ къафэгушIуагъ АР-м иминистрэхэм я Кабинет и Тхьаматэ игуадзэу Виктор Орловыр. Псауныгъэм икъэухъу­мэнкIи, пэублэ IэпыIэгъу ягъэгъотыгъэнымкIи терапевтхэм мэхьанэшхо зэряIэр, мыщ фэдэ медицинэ IофышIэхэм яшIуа­гъэкIэ диспансеризациер зэхэщагъэ зэрэхъурэр, вакцинэхэр зэрахалъхьэ­хэрэр, цIыфхэм къяутэлIэрэ узхэр нахь пасэу къызэрэхагъэщырэр ыкIи игъом ахэм зэряIазэхэрэр ащ къы- Iуагъ. Те­рапевтхэмрэ пэублэ IэпыIэгъу языгъэ­гъотырэ къулыкъумрэ нахь шIогъабэ къытэу Iоф ашIэ къэс цIыфхэм япсауныгъи нахь зэрэдэгъущтыр Виктор Орловым къыIуагъ.
АР-м и ЛIышъхьэ пшъэрылъ зэрафишIыгъэм тетэу специалистхэмрэ медицинэ IофышIэхэмрэ республикэ учреждениехэм Iоф ащашIэным кIэзыгъэгушIурэ амалхэр Адыгеим щызэрахьэх. Ахэм ахэхьэ общественнэ транспортымкIэ зэрэзекIохэрэм уасэу лъатырэм къызэрэрагъэгъэзэжьырэр, IэпыIэгъу псынкIэм имашинэхэм яводительхэм мазэ къэс ахъщэ тегъахъо къазэраIэкIахьэрэр, IэпыIэгъу псынкIэмкIэ фельдшерхэу «Къоджэ фельдшер» зыфиIорэ программэм тетэу къуаджэхэм Iоф ащызышIэнэу кIохэрэм федеральнэ ахъщэм нэмыкIэу сомэ мин 500 зэтыгъоу зэраратырэр.
Адыгэ Республикэм псауныгъэр къэу­хъумэгъэнымкIэ иминистрэу Мэрэтыкъо Рустем зэрэхигъэунэфыкIыгъэмкIэ, специалистхэм зэрафэныкъохэр дэгъэзыжьыгъэным пае хэгъэгум иапшъэрэ медицинэ еджапIэхэм целевой шIыкIэм тетэу студентхэр ащырагъаджэх. Мыгъэ щегъэжьагъэу ащ фэдэ студентхэм атегъэпсыхьэгъэ стипендиехэр республикэ бюджетым къыхагъэкIыщтых. Федеральнэ проектэу «Профессионалитет» зыфиIорэм ишIуагъэкIэ гъэрекIо иIоныгъо мазэ къыщегъэжьагъэу Мыекъопэ къэралыгъо технологическэ университетым гъэсэныгъэмкIэ медицинэ кластерэу «ПрофиМед» зыфиIорэм Iоф щишIэу ыублагъ. Джырэ шапхъэхэм адиштэрэ оборудованиер зэрагъэфедэщтым гурыт медицинэ IофышIэ хъущтхэр мыщ щыфагъасэх. Студент 2000 фэдизыр сэнэхьат 14-мкIэ мыщ щагъэхьазырых. Мыекъопэ къэралыгъо технологическэ университетым шъолъыр общественнэ организациеу «Врачхэм яхасэ» щызэхэщагъ. ШIэныгъэхэмкIэ докторхэр, профес­сорхэр, научнэ-ушэтэкIо гупчэхэм, хэгъэгум имедицинэ учреждение пэрытхэм яспециалистхэр ащ хэхьэх. Псауныгъэм икъэухъумэнкIэ Адыгеим ищыкIэгъэ специалистхэм ягъэхьазырын мы хасэм иIахьышхо хешIыхьэ. Республикэм лъэшэу щырящыкIэгъэ специалистхэр нэмыкI шъолъырхэм къарыщыгъэнхэм пае блэкIыгъэ илъэситIум къулыкъу фэтэри 6 къыхагъэкIыгъ. Мыгъэ джыри ащ фэдэ фэтэри 4 къыхагъэкIынэу рахъухьэ. Анахьэу зыфыщыкIэхэрэр реаниматолог­хэр, неонатологхэр, неврологхэр, педиатрхэр ары.
Адыгеим и ЛIышъхьэ АР-м псауныгъэр къэухъумэгъэнымкIэ и Министерствэ пшъэрылъ фишIыгъ яIофшIэнкIэ екIолIэкIакIэхэр нахь чанэу агъэфедэнхэу, медицинэ IофышIэ сэнэхьатым мэхьанэу ратырэм зыкъегъэIэтыгъэнымкIэ, цIыф сэнаущхэр, зиIоф фэшъыпкъэ­хэр яIофшIэн кIэгъэгушIугъэнхэмкIэ ищыкIэгъэ пстэури ашIэнэу.