АР-м и ЛIышъхьэу КъумпIыл Мурат пэщэныгъэ дызэрихьэзэ, Адыгеим къолъхьэ тын-Iыхыным пэуцужьыгъэнымкIэ IофшIэнэу щыкIорэм изэфэхьысыжьын фэгъэзэгъэ Комиссием изэхэсыгъо щыIагъ.

Къолъхьэ тын-Iыхыныр щыгъэзыегъэ­нымкIэ, лъэпкъ проектхэр пхыращыхэ зыхъукIэ ащ фэдэхэр къахэмыфэнхэм пае шIыкIэ-амалэу агъэфедэхэрэм, рес­публикэм къолъхьэ тын-Iыхыным епхыгъэ мыхъо-мышIагъэу щызэрахьэхэрэм уасэ ятыгъэнымкIэ социальнэ ушэтынхэм якIэуххэм зэрахаплъэхэрэм, Мыекъуапэрэ Адыгэкъалэрэ а лъэныкъомкIэ Iофхэм язытет зыфэдэм къыпкъырыкIыхэзэ, 2024-рэ илъэсым Iофэу ашIагъэм икIэуххэр ащ щызэфахьысыжьыгъэх.
Зэхэсыгъом хэлэжьагъэх АР-м и Къэралыгъо Совет – Хасэм и Тхьаматэу Владимир Нарожнэр, министрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, хэбзэухъумэкIо, уплъэкIо­кIо-лъыплъэкIо къулыкъухэм яIэшъхьэтетхэр, муниципалитетхэм япащэхэр.
Къолъхьэ тын-Iыхыныр ыкIи нэмыкI хэбзэукъоныгъэхэр къэмыгъэхъугъэнхэмкIэ АР-м и ЛIышъхьэ и ГъэIорышIапIэ ипащэу Алексей Селезневым къызэрэхигъэщыгъэмкIэ, АР-м и ЛIышъхьэ пшъэрылъ къызэрафишIыгъэм тетэу илъэсэу икIыгъэм къолъхьэ тын-Iыхыным пэшIуекIорэ хэбзэгъэуцугъэм игъэфедэн иIофыгъохэмкIэ семинар-зэIукIи 5 къулыкъум зэхищэгъагъ.
КъызэраIуагъэмкIэ, 2024-рэ илъэсымкIэ декларационнэ кампанием къыди­лъытэрэ пшъэрылъхэр икъоу ыкIи ипIа­лъэм гъэцэкIагъэ хъугъэх. Джащ фэдэу хэбзэукъоныгъэу къыхагъэщыгъэхэр игъом дагъэзыжьыгъэх. Къолъхьэ тын— Iыхыным епхыгъэ зэхэфын Iофтхьабзэу зэрахьагъэхэм яшIуагъэкIэ къыхагъэщыгъэхэм атегъэпсыхьагъэу къэралыгъо къулыкъушIи 2-мэ, муниципальнэ Iэна­тIэхэр зыIыгъ нэбгыри 9-мэ пшъэ­дэкIыжь арагъэхьыгъ.
Республикэм и ЛIышъхьэ ГъэIорышIапIэм ипащэхэм анахьэу анаIэ зытыраригъэдзагъэр игъом декларациехэм япхыгъэ Iофтхьабзэхэр зэшIуахынхэр, къолъхьхэ тын-Iыхыным епхыгъэ хэбзэгъэуцугъэр щыIэныгъэм гъэцэкIагъэ зэрэщыхъущтым иIофыгъохэмкIэ уп­чIэжьэгъу ашIынхэр ары.
«Комиссием ренэу ынаIэ зытыригъэтын фаехэм ащыщых къолъ­хьэ тын-Iыхыным епхыгъэ бзэджэшIагъэхэм гъогур афызэпыбзыкIыгъэным, къэралыгъо ыкIи муниципальнэ къулыкъу­шIэхэм яхахъохэм афэгъэхьыгъэ къэбархэм игъом уасэ ятыгъэным яIофыгъохэр. Республикэм тапэкIи хэхъоныгъэ ышIыным пае а IофшIэным икIэуххэм мэхьанэшхо яI», — къыIуагъ КъумпIыл Мурат.
Лъэпкъ проектхэр пхыращыхэ зыхъукIэ къолъхьэ тын-Iыхыным инэшанэхэр къа­хэмыфэнхэм пае шIыкIэ-амалэу агъэфедэхэрэм афэгъэхьыгъэу къыIуагъ АР-м цIыфхэм IофшIэн ягъэгъотыгъэнымкIэ икъэралыгъо къулыкъу и ГъэIорышIапIэ ипащэу Галина Цыганковам. Ащ къыхигъэщыгъэх, правовой актхэмкIэ экспертизэр, нэбгырэ пэпчъ пшъэдэкIыжь зэрихьырэр икъоу къыдэлъытэгъэныр, лъэпкъ проектхэр пхырыщыгъэнхэм мылъкоу апэIухьащтым фэгъэхьыгъэ къэбарыр зэкIэми ашIэныр, къэралыгъо щэфынхэмкIэ Iофтхьэбзэ гъэнэфагъэхэр игъом зэшIохыгъэнхэр ыкIи нэмыкIхэр. Тэхъутэмыкъое районым цIыфхэм Iоф­шIэн ягъэгъотыгъэнымкIэ икъулыкъу игъэкIэжьын зэрэкIорэми къыщыуцугъ.
Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр щигъэгъо­загъэх республикэм щыпсэурэ цIыфхэм къолъхьэ тын-Iыхыным епхыгъэ хэбзэукъоныгъэу ашIыхэрэмкIэ социологическэ ушэтыным кIэухэу фэхъугъэхэм. Ащ къызэрэхигъэщыгъэмкIэ, ушэтыным икIэуххэм уакъыпкъырыкIын хъумэ, къолъхьэ тын-Iыхыным ылъэныкъокIэ Адыгэ Республикэр зиIофхэр анахь мыдэйхэм ащыщ.
Зэхэсыгъом икIэухым къэгущыIагъэх къалэу Мыекъуапэ имэрэу Геннадий Митрофановымрэ Адыгэкъалэ имэрэу Хьачмамыкъо Азэматрэ. Ахэм къолъхьэ тын-Iыхыным епхыгъэ бзэджэшIагъэхэр зэрамыхьанхэм пае IофшIэнэу агъэцакIэрэр къаIотагъ, муниципальнэ къулыкъушIэхэм, муниципальнэ учрежениехэм япащэхэм яхахъохэм афэгъэхьыгъэ къэбарэу къаIэкIахьэрэри зэрэзэхафырэр къаIуагъ.
Iофтхьабзэм икIэуххэмкIэ республикэм и ЛIышъхьэ анахьэу къыхигъэщыгъэхэм ащыщ къолъхьэ тын-Iыхыным пэшIуекIорэ Комиссием ыштэгъэ унашъохэр щыIэныгъэм щыпхырыщыгъэнхэ зэрэфаер. Ащ дакIоу хэбзэ къулыкъухэм къолъхьэ тын-Iыхыным епхыгъэ хэбзэгъэуцугъэу щыIэр ащамыукъоным фэгъэзэгъэ Iофы­шIэхэм яIэпэIэсэныгъэ зыкъегъэIэты­гъэн зэрэфаери къыхигъэщыгъ. УплъэкIокIо-лъып­лъэкIо къулыкъухэм пшъэрылъ гъэнэфагъэхэри афишIыгъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.