Унэм игъэцэкIэжьын аухыгъ
ЗэгъэшIужь хьыкумышIхэм яIофшIэпIэ унэ игъэцэкIэжьын Красногвардейскэ районым зэрэщаухыгъэмкIэ АР-м и ЛIышъхьэу КъумпIыл Мурат макъэ къыгъэIугъ.
Джырэ шапхъэхэм адимыштэрэ унэхэу бэджэндэу аштагъэхэм ахэм тапэкIэ Iоф щашIэщтыгъ. Республикэм ипащэрэ АР-м и Апшъэрэ хьыкум итхьаматэу Шумэн Байзэтрэ агъэкIэжьыгъэ унэр къызэпаплъыхьагъ.
«Хьыкум Iофхэр икъоу щызэрахьанхэмкIэ амал пстэури мыщ иI: зэгъэшIужь хьыкумышIхэм якабинетхэр, хьыкумышIхэм зэхэсыгъохэр зыщызэхащэщт залыр, хъарзынэщхэр, аппаратым иIофышIэхэмрэ хьыкум приставхэмрэ якабинетхэр зэрищыкIагъэм лъыкIахьэу зэтырагъэпсыхьагъэх, видеокамерэхэр, мебелыр, ищыкIэгъэ техникэр ахэм ачIэт», — къыIуагъ КъумпIыл Мурат.
УнакIэм зэрэчIэхьажьыгъэхэмкIэ зэгъэшIужь хьыкумышIхэм ЛIышъхьэр афэгушIуагъ, цIыфхэм яфитыныгъэхэмрэ яфедэхэмрэ якъэухъумэнкIэ ищыкIэгъэ амалхэр зехьэгъэнхэм мэхьанэшхо зэриIэр къыхигъэщыгъ.