КIэлэцIыкIухэмрэ ныбжьыкIэхэмрэ я Урысые общественнэ-къэралыгъо зэхахьэу «Движение Первых» зыфиIорэм дэлэжьэгъэнымкIэ координационнэ Советэу АР-м и ЛIышъхьэ дэжь щызэхэщагъэм изэхэсыгъо Правительствэр зычIэт Унэм щыкIуагъ.

Iофтхьабзэм хэлэжьагъэх АР-м иминистрэхэм я Кабинет и Тхьаматэ игуа­дзэу Виктор Орловыр, Правительствэм хэтхэр, Къэралыгъо Советым — Хасэм идепутатхэр, «Движение Первых» ишъо­лъыр къутамэ илIыкIохэр, муниципалитетхэм япащэхэр. Видеоконференцие шIыкIэм тетэу зэхэсыгъом къыхэлэ­жьагъ кIэлэцIыкIухэмрэ ныбжьыкIэхэмрэ я Урысые общественнэ-къэралыгъо зэхахьэу «Движение Первых» ипащэ игуадзэу Ксения Яновар.
АР-м иминистрэхэм я Кабинет ипащэ игуадзэ Адыгеим и ЛIышъхьэу КъумпIыл Мурат ыцIэкIэ «Движение Первых» зэпхыныгъэу къадыриIэм ыкIи IэпыIэгъу къызэрафэхъурэм афэшI зэрафэразэхэр къыхигъэщыгъ. Ащ фэдэ зэдэлэжьэныгъэм Урысыем и Президентэу Владимир Путиным пшъэрылъэу къыгъэуцухэрэр пхырыщыгъэнхэмкIэ шъолъырым ишIуагъэ къызэрекIырэм къыкIигъэтхъыгъ.
Виктор Орловым хабзэр, бизнесыр, дин ыкIи общественнэ организациехэр, кIэлэцIыкIу ыкIи ныбжьыкIэ зэхахьэхэр зэпхыгъэнхэм фытегъэпсыхьэгъэ Iоф­шIэнэу Адыгеим щызэшIуахыхэрэм ягугъу къышIыгъ. «Движение Первых» яшIуагъэ рагъэкIыным, ащ зиушъомб­гъун, иIофшIэн нахьыбэу шIуагъэ къыхьэу зэхищэн амал етыгъэным ылъэныкъокIэ хэбзэ къулыкъухэм пшъэрылъэу яIэхэми къащыуцугъ.
Ащ къызэриIуагъэмкIэ, зэхахьэм ишъолъыр къутамэ ичIыпIэ отделениехэм заушъомбгъунымкIэ, ахэм ахэтхэм, япа­щэхэм зэпыу фэмыхъоу Iоф зэдашIэнымкIэ, еджапIэхэм чIыпIэхэр ащагъэ­псынхэмкIэ адеIэнхэу министерствэхэмрэ муниципалитетхэмрэ япащэхэм пшъэ­рылъ яI. КIэлэцIыкIухэмрэ ныбжьыкIэхэмрэ патриотизмагъэм фэпIугъэнхэм хэушъхьафыкIыгъэ дзэ операцием хэлажьэхэрэм яIахьэу къыхалъхьэрэри къыхигъэщыгъ.
Джащ фэдэу зэхэсыгъом къыщаIуагъ, мы илъэсым шъолъыр къутамэм кIэлэцIыкIухэм ыкIи ныбжьыкIэхэм апае Iоф­тхьабзэу зэхищэщтхэм апэIуигъэхьанэу сомэ миллион 16,5-рэ республикэ бюджетым зэрэщагъэнэфагъэр.
КIэлэцIыкIухэмрэ ныб­жьыкIэхэмрэ я Урысые общественнэ-къэралыгъо зэхахьэу «Движение Первых» ипащэ игуадзэу Ксения Яновам Адыгеим и ЛIышъхьэу КъумпIыл Мурат зэрафэразэхэр къы­Iуагъ, Адыгеим и «Пер­вэхэм» лъэныкъо пстэ­умкIи IэпыIэгъу зэрагъо­тырэри къыхигъэщыгъ.
— ПсэукIэ амалэу щыIэр нахьышIу шIыгъэ­ным, обществэм, культурэм заушъомбгъуным алъэныкъокIэ зэшIуихырэмкIэ Адыгеир щысэтехыпI. Апэрэхэм ащыщэу муниципалитетхэм отделениехэр ащигъэ­псыгъэх, ар федеральнэ Гупчэм къыщыхагъэщыгъ. «Движение Первых» кIэлэцIыкIухэм апае кIэлэцIыкIухэм агъэпсыгъ. Арышъ, ахэм акIуачIэ агъэфедэнымкIэ, щыIэныгъэм чIыпIэ гъэнэфагъэ щагъотынымкIэ IэпыIэгъу тафэхъуным мэхьанэшхо иI, — къы­Iуагъ Ксения Яновам.
Джащ фэдэу зэхэсыгъом «Движение Первых» ишъолъыр къутамэ и Совет ипащэу Ованес Шекерьянц, Тэхъутэмыкъое район администрацием ипащэ игуа­дзэу Павел Беловоловыр, нэмыкIхэр къыщыгущыIагъэх. Организацием ишъо­лъыр къутамэ зэшIуихынэу ыгъэнэфагъэхэм, муниципальнэ хабзэм IэпыIэ­гъоу къаритыщтым, ащ хэтхэм чIыпIэхэм Iофэу ащашIэрэм атегущыIагъэх.
Шъугу къэдгъэкIыжьын, «Движение Первых» кIэлэцIыкIоу, ныбжьыкIэу, ны-тыхэу ыкIи гъэсакIохэу нэбгырэ мин 35-м ехъу Адыгеим щызэрепхы. Культурэм, спортым ыкIи ныбжьыкIэ политикэм япхыгъэ учреждениехэм пэублэ къутэми 175-рэ къащызэIуахыгъ. Мы илъэсым гъэсэныгъэм, наукэм, патриотическэ Iофым, нэмыкI лъэныкъохэм къадыхэлъытагъэу Iофтхьэбзэ 50-м ехъу зэхащэнэу агъэнэфагъ. Ахэм ащыщ дзэ-патриотическэ джэгукIэу «Зарница 2.0» зыфиIорэр. Ащ нэбгырэ мин 11,5-рэ хэлэжьэщт.