Адыгеим и ЛIышъхьэу КъумпIыл Мурат зэIукIэгъоу зэрищагъэм гъэ­рекIо линие занкIэу щыIагъэм къырахьылIэгъэгъэ тхылъхэм къащаIэтыгъэ Iофыгъохэм язэшIохынкIэ пшъэ­рылъэу афашIыгъэхэр зэрагъэцакIэ­хэрэм щатегущыIагъэх. Къутырэу Гавердовскэм дэжь щылъ чъыгхэтэлэжьыпIэхэм гъэстыныпхъэ шхъуантIэр ящэлIэгъэным иIофыгъо ар фэгъэхьыгъагъ.

ЗэIукIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, ащ игуадзэу Хъоткъо Хъызыр, АР-м иминистрэхэм я Кабинет хэтхэр, Мыекъуапэ имэрэу Геннадий Митрофановыр, ресурсхэр аIэкIэзыгъэхьэрэ организациехэм япащэхэр, чъыгхэтэлэжьыпIэхэм ятхьаматэхэр.
ЦIыфхэм яIофыгъохэр зэшIохыгъэнхэм пае блэкIыгъэ илъэсым икIэух КъумпIыл Мурат чъыгхэтэлэжьыпIэхэм яактив IукIэгъагъ. ЦIыфхэр зыгъэгумэкIырэ Iофы­гъохэр джащыгъум зэхафыгъагъэх. Чъыг­хэтэлэжьыпIэхэм язетегъэпсыхьанкIэ пшъэрылъ гъэнэфагъэхэр хэбзэ къулыкъухэм афашIыгъагъэх. Къутырэу Гавердовскэм дэжь щылъ чъыгхэтэлэжьыпIэхэу псэупIэхэм къафэгъэзэгъэ чIыгухэм ястатус зимыIэхэм ыкIи социальнэ гази­фикациемкIэ программэм къыхимыубытэхэрэм гъэстыныпхъэ шхъуантIэр ящэлIэгъэнымкIэ пшъэрылъхэр афашIыгъагъэх.
«ЦIыфыбэмэ псэупIэ шъхьаIэу яIэр чъыгхэтэлэжьыпIэхэр ары. ПсэукIэ амал дэгъухэр ахэм ащызэхэщэгъэным, цIыфхэм яIофыгъохэр зэрищыкIагъэм лъыкIахьэу зэшIохыгъэнхэм мэхьанэшхо яI», — къыIуагъ АР-м и ЛIышъхьэ.
АР-м иминистрэхэм я Кабинет и Тхьаматэу КIэрэщэ Анзаур зэIукIэгъум зэрэщыхигъэунэфыкIыгъэмкIэ, чъыгхэтэ­лэжьыпIэхэм ащыпсэухэрэм ящыкIэгъэ амалхэр ягъэгъотыгъэнхэмкIэ АР-м и ЛIышъхьэ пшъэрылъэу къафишIыгъэхэр гъэцэкIэгъэнхэм тегъэпсыхьагъэу федеральнэ, шъолъыр хэбзэгъэуцугъэхэм адиштэу чъыгхэтэлэжьыпIэхэм газыр ящэлIэгъэнымкIэ шIыкIэ зэфэшъхьафхэм ахэплъагъэх. Ахэм ятхьаматэхэм ягъусэхэу къахалъхьэгъэ шIыкIэхэм атегущыIагъэх.
Шъугу къэтэгъэкIыжьы Мыекъуапэ ичъыгхэтэлэжьыпIэхэр социальнэ газификацие шIыгъэнхэмкIэ программэр республикэм чанэу зэрэщыпхыращырэр. ГущыIэм пае, муниципальнэ образованиеу «Къалэу Мыекъуапэ» итовариществэ 16-мэ арыт унэ мини 2-м ехъур догазификациемкIэ план-графикым хагъэ­хьагъ. Къутырэу Гавердовскэм къыпэIулъ товариществи 8-у цIыфхэм ятхылъхэр къыздикIыгъэхэр муниципальнэ образованием хахьэхэрэп, ащ епхыгъэу догазификациемкIэ программэм къыхиубытэхэрэп. Джащ пае шъолъыр программэм диштэу мыщ фэдэ чъыгхэтэлэжьыпIэхэм газрыкIуапIэхэр аращэнэу унашъо ашIыгъ. Проектым игъэцэкIэнкIэ джыдэдэм IофшIэнэу зэхащэщтхэм яграфик зэха­гъэуцо.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIорэм къызэритыгъэмкIэ, апэрэ чэзыум Iахьзэ­хэлъ обществэу «Газпром газораспределение Майкоп» зыфиIорэм газрыкIуапIэхэм яшIын ахъщэу тефэщтыр пэшIорыгъэ­шъэу къыридзагъ, чъыгхэтэлэжьыпIэхэр газрыкIуапIэхэм апышIэгъэнхэмкIэ амалэу щыIэхэр зэригъэшIагъэх. Товариществэ пэпчъ телъытэгъэ проект документациер агъэхьазырынэу къапыщылъ.
ПстэумкIи газрыкIопIэ километрэ 18 ашIын ямурад. Тарифэу щыIэхэм адиштэу цIыфхэм ыпкIэ зылъатыщт закъор газрыкIуапIэм зэрэпашIэхэрэр ары, ау яунэ пае ящыкIэгъэ оборудованиери къащэфын фаеу хъущт.
Республикэм ипащэхэм мы Iофыгъом­кIэ фэгъэкIотэныгъэ зиIэхэм IэпыIэгъу аратынэу рахъухьагъ. АР-м IофшIэнымрэ социальнэ хэхъоныгъэмрэкIэ иминистрэ игуадзэу Екатерина Леоновам зэIукIэ­гъум хэлажьэхэрэм газификациемкIэ IэпыIэгъу зэраратыщт шапхъэхэм афэгъэхьыгъэу къафиIотагъ. ПэшIорыгъэшъэу къызэрэрадзагъэмкIэ, зигугъу къэтшIыгъэ чъыг­хэтэлэжьыпIэхэм чIыгу Iахьхэр ащызиIэхэу фэгъэкIотэныгъэ зиIэ нэбгыри 150-рэ фэдизмэ ащ фэдэ IэпыIэгъур къызфагъэфедэн алъэкIыщт. Ащ пае республикэ бюджетым Iахьтедзэу сомэ миллион 15 фэдиз къыхагъэкIыщт.
Мы илъэсым IофшIэнхэр агъэцэкIэнхэу, ищыкIагъэ зыхъурэм нахь загъэпсынкIэнэу Адыгеим и ЛIышъхьэ пшъэрылъ афи­шIыгъ. Ащ епхыгъэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газпром межрегионгаз Майкоп» зыфиIорэм игъо фалъэгъугъ чъыгхэтэлэжьыпIэхэр газрыкIуапIэхэм апышIэгъэнхэмкIэ зэзэгъыныгъэхэр адишIынэу.
«Тэ къытфэгъэхьыгъэмэ, тфэлъэкIырэр зэкIэ тшIэщт, ау инфраструктурэм игъэ­псынкIэ ищыкIэгъэ Iофтхьабзэхэм чанэу цIыфхэри къахэлэжьэнхэ фае», — къы­Iуагъ КъумпIыл Мурат.
Къулыкъу гъэнэфагъэхэмрэ ресурсхэр аIэкIэзыгъэхьэрэ организациехэмрэ зэ­дэлэжьэнхэм мэхьанэшхо зэриIэр АР-м и ЛIышъхьэ хигъэунэфыкIыгъ. Джащ фэдэу республикэм ипащэ цIыфхэм закъызэрафагъэзэрэ тхылъхэм псынкIэу ахэп­лъэнхэ, Iофыгъоу къэтэджыхэрэр зэгъу­сэхэу зэдызэшIуахын зэрэфаер къыхигъэщыгъ.
«Мыщ фэдэ пшъэрылъым игъэцэ­кIэнкIэ муниципалитетми, ресурсхэр аIэкIэзыгъэхьэрэ организациеми, чъыг­хэтэлэжьыпIэхэр зиехэми акIуачIэ зэдырахьылIэн фае. Ащ фэдэ екIолIакIэм ишIуагъэкIэ цIыфхэр зыгъэгумэкIырэ Iофыгъохэр шIуагъэ къытэу зэшIуахын зэралъэкIыщтым имызакъоу, респуб­ликэм иинфраструктурэ зегъэушъомбгъугъэнми, цIыфхэм ящыIэкIэ-псэукIэ зыкъегъэIэтыгъэнми ар афэIорышIэщт», — къыIуагъ КъумпIыл Мурат.

АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.