Адыгеим и ЛIышъхьэу КъумпIыл Мурат АР-м и Правительствэ зычIэт унэм IофшIэгъу зэIукIэгъу щадыриIагъ Сбербанкым и Къыблэ-КъохьэпIэ банк итхьаматэу Анатолий Песенниковымрэ Сбербанкым и Адыгэ къутамэ пIэлъэ гъэнэфагъэкIэ пэщэныгъэ дызезыхьэрэ ДышъэкI Асхьадрэ.

Республикэмрэ банкымрэ азыфагу илъ зэдэлэжьэныгъэм илъэныкъохэм ахэр атегущыIагъэх: цIыфхэм ыкIи бизнесым къэралыгъо IэпыIэгъу ятыгъэнымкIэ программэхэм, АР-м исоциальнэ ыкIи иинвестиционнэ проектхэм ыкIи нэмыкIхэм.
АР-м и ЛIышъхьэ къызэрэхигъэщы­гъэмкIэ, илъэсыбэ хъугъэу Сбербан­кымрэ республикэм ихэбзэ къулыкъу­хэмрэ зэдэлэжьэныгъэ зэдыряI, лъэпкъ проектхэм, УФ-м и Президентэу Владимир Путиныр кIэщакIо зыфэхъугъэ Iофтхьабзэхэу цIыфхэм къэралыгъо IэпыIэгъу ятыгъэным, фэгъэкIотэныгъэ зыхэлъ чIыфэхэр аIэкIэгъэхьэгъэнхэм япхыгъэ­хэр пхырыщыгъэнхэм кIэухышIу­хэр фэхъух.
Сбербанкым къызэритыгъэмкIэ, 2024-рэ илъэсым фэгъэкIотэныгъэ зыхэлъ чIыфэхэр ятыгъэнхэм ипрограммэкIэ сомэ миллиарди 4,3-м ехъу аIэкIагъэ­хьагъ. IофшIэным илъэныкъо шъхьа­Iэхэм зыкIэ ащыщэу къэнэжьырэр бизнесым IэпыIэгъу етыгъэныр ыкIи фэгъэкIотэныгъэ зыхэлъ чIыфэхэр аIэкIэгъэхьэгъэнхэр ары. Ащ фэдэ шIыкIэм ишIуагъэкIэ предпринимательхэм федэу къахьырэм хэхъон ылъэкIыщт. ГущыIэм пае, 2024-рэ илъэсым Адыгеим ибизнес фэгъэкIотэныгъэ зыхэлъ лъэныкъохэм атегъэпсыхьагъэу сомэ миллиард 1,2-рэ къыIэкIэхьагъ.
«Сбербанкым Адыгеим щыпсэурэ цIыфхэм азыны­къом нахьыбэм яфэIо-фашIэхэр афегъэцакIэх, рес­публикэм иятIонэрэ предприниматель пэпчъ джащ фэдэу зэпхыныгъэ ащ дыриI. Экономикэм, социальнэ лъэныкъом хэхъоныгъэ ашIынымкIэ, цIыфхэм ящыIакIэ зыкъегъэ­IэтыгъэнымкIэ анахь мэхьанэ зиIэ Iофтхьабзэхэм тишъыпкъэу, тиамалхэм къы­зэрахьэу тахэлажьэ ыкIи ахэм адетэгъаштэ. Бизнес цIыкIумрэ гурытымрэ Сбербанкым IэпыIэгъоу аритырэм ишIуагъэкIэ IофшIэпIэ чIыпIакIэхэр щыIэ мэхъух, республикэм предприниматель IофшIэнми нахь зыщеушъомбгъу. ГущыIэм пае, илъэсэу икIыгъэм икIэуххэм нафэ къызэрашIыгъэмкIэ, Сбербанкым сомэ миллиард 12-м ехъу республикэм ибизнес IэкIигъэхьагъ», — къыхигъэщыгъ Анатолий Песенниковым.
Адыгеим и ЛIышъхьэ къызэриIуа­гъэмкIэ, республикэм финансхэмкIэ иинфраструктурэ нахьышIу шIыгъэнымкIэ, экономикэм ихэхъоныгъэкIэ, бизнес цIыкIумрэ гурытымрэ ящыкIэгъэ чIыфэхэр аIэкIэгъэхьэгъэнхэмкIэ, банкхэм цIыфхэм яфэIо-фашIэхэр икъоу зэшIуахынхэмкIэ, джырэ уахътэм диштэрэ цифрэ технологиехэр гъэфедэгъэнхэмкIэ тапэкIи язэдэлэжьэныгъэ гъэпытэгъэным мэхьанэшхо иI.
«Тихэгъэгу технологиехэмкIэ, гъэсэныгъэмкIэ, культурэмкIэ ыпашъхьэ ит Iофыгъохэу Президентым къыгъэуцугъэ пшъэрылъхэм адиштэу зэшIохыгъэн фаехэм кIэухышIухэр зэрафэхъущтымкIэ тизэдэлэжьэныгъэ гугъэпIэ инхэр къетых», — къыIуагъ АР-м и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.