Я X-рэ Кавказ хьисап олимпиадэу мы мафэхэм республикэм щыкIуагъэр мэфэкI шIыкIэм тетэу тыгъуасэ зэфашIыжьыгъ.

Урысыем ичIыпIэ зэфэшъхьафхэм ащыщ кIэлэеджэкIо нэбгыри 9-мэ дышъэ медальхэр къалэжьыгъ. Адыгеим икIэлэеджакIохэм зэрифэшъуашэу зыкъызэрагъэлъэгъуагъэр къыушыхьатыгъ хэу­шъхьафыкIыгъэ диплом осэшIхэм къазэрафагъэшъошагъэм.
Зэфэхьысыжьхэм къызэрагъэлъэгъуа­гъэмкIэ, IэкIыб къэралхэм яныбжьыкIэхэм ащыщэу Узбекистан къикIыгъэхэм дышъэ медали 4, Иран ыкIи Кыргызстан — дышъэ медаль щырыщ, Таджикистан — тIу, Армением ыкIи Сербием якупхэм зырыз къалэжьыгъ.
Олимпиадэр уцугъуитIоу гощыгъагъэ, республикэм зыщызыушэтыгъэхэм анэмыкIэу пэIудзыгъэ шIыкIэм тетэу ныбжьыкIэхэм хьисапымкIэ шIэныгъэу яIэр къагъэлъэгъуагъ.
Я X-рэ Кавказ хьисап олимпиадэм «сеньор-лига» зыфиIорэм Курган шъо­лъырым икIэлэеджакIохэу Егор Медведевым ыкIи Степан Карповым, Адыгеим щыщэу Данил Матвеевым, Ставропольскэ краим къикIыгъэ Богдан Мелешкэм, Узбекистан щыщхэу Бехрузбек Элмуродовым, Элбек Зохиджоновым, Озодбек Ахтамовым, Асадбек Бобокуловым, Кыргызстан икIэлэеджакIохэу Ян Бобрус, Султан Мусходжаевым, Нурсултан Эшперовым, Иран щыщ Борна Маджиди ыкIи Илия Солтансонджари, Таджикистан щыпсэухэрэ Машрафджон Иномовым, Олимджон Тухтаровым ыкIи Сербием щыщ Нина Шушич текIоныгъэ къыда­хыгъ.
«Юниор-лига» зыфиIорэм Темыр Осетием — Аланием щыщхэ Родион Казанскэмрэ Артур Илаевымрэ, Курган шъолъырым икIэлэеджакIохэу Андрей Шмидт ыкIи Михаил Ерофеевым, «Сириус» зыфиIорэ федеральнэ чIыпIэм къикIыгъэ Артем Назаровым, Армением щыщ Айк Манукян ыкIи Иран икIэлэеджа­кIоу Ариан Занди анахь дэгъоу зыкъыщагъэлъэгъуагъ.
Кавказ хьисап олимпиадэм ихэу­шъхьафыкIыгъэ диплом Республикэ естественнэ-хьисап еджапIэм икIэлэеджа­кIохэм афагъэшъошагъ. Ахэм зы дышъэ медаль, тыжьынэу –— 3 ыкIи джэрзэу 2 къалэжьыгъ. Апэрэ чIыпIэр къахьыгъ Данил Матвеевым, ятIонэрэ хъугъэх Мамый Ярэ, Олег Катмаковыр ыкIи Роман Кузнецовыр, ящэнэрэ чIыпIэр афагъэшъошагъ Бэджэнэ Азамат ыкIи Глеб Стеблиным.
Iофтхьабзэм къыдыхэлъытагъэу Кавказ хьисап олимпиадэм изэхэщакIохэм ыкIи осэшIхэм АР-м и ЛIышъхьэ и Щытхъу тхылъ афагъэшъошагъ.
Я X-рэ Кавказ хьисап олимпиадэм IэкIыб къэралхэм ыкIи Урысыем ишъо­лъыр зэфэшъхьафхэм къарыкIыгъэ ныбжьыкIи 158-рэ хэлэжьагъ. Мыгъэ апэрэу Кыргызстан ыкIи Приднестровскэ Молдавскэ Республикэм икIэлэеджа­кIохэм яшIэныгъэхэр къагъэлъэгъуагъ. Хьисапым епхыгъэ Iофтхьабзэр 2015-рэ илъэсым къыщегъэжьагъэу зэхащэ, мы илъэсым чIыпIэ зэфэшъхьафхэм ащыщ кIэлэеджэкIо 1339-рэ ащ хэлэжьагъ.
Адыгэ къэралыгъо университетым ипресс-къулыкъу.