Георгий Кузьмин Степан ыкъор Красноярскэ краим 1922-рэ илъэсым къыщыхъугъ. Илъэс 19 ыныбжьэу Хэгъэгу зэошхор къызежьэм, Дзэ Плъыжьым хэхьагъ. Майорыгъ, артиллерие полкым итопографическэ взвод икомандирыгъ.

Георгий Кузьмин Белоруссием, ТыгъэкъокIыпIэ Пруссием, Польшэм яшъхьафитыныгъэ афэбэнагъ. Жъогъо Плъыжьым иорден, Хэ­гъэгу зэошхом иорденэу я II-рэ шъуашэ зиIэр, медальхэу «За боевые заслуги», «За взятие Кенигсберга» къыфагъэшъошагъэх. Дзэм къыз­хэкIыжьым, 1946-рэ илъэсым къыщыублагъэу Мыекъуапэ дэсыгъ, заводэу «Промсвязым» инженерэу щылэжьагъ.
Кузьминхэм яунагъо идокументхэр 2008-рэ илъэсым АР-м и Лъэпкъ музей къезыхьылIэжьыгъэхэр Георгий ыпхъухэу Светланэрэ Любовьрэ.
Георгий Кузьмин игукъэкIыжьхэм къахэхыгъ.
«ЗэкIэми фронтым тыкIо­щтыгъ. НахьыбэрэмкIэ илъэс 18 — 19 тыныбжьыгъэр. ЩыIэныгъэр тэркIэ къежьэгъэ къодыягъ. ШIулъэгъуныгъэ шъыпкъэм, Хэгъэгум ихахъо фэлэжьэщт IофшIэным яуахътэу ар тэркIэ щытыгъ. Тэ Хэгъэгур къэ­тыухъумэнэу тыкIощтыгъ. Училищым сычIэсыфэ Дзэ Плъыжьым ианахь мэфэ къинхэр кIуагъэх. Ныбжь зиIэхэу тэщ нахьыжъхэр нахь щынапхэхэу сахаплъэ­щтыгъ. Ахэм янервэхэр нахь зэщыкъогъагъэх. Заом ТекIоныгъэр къыщыдэзы­хыгъэхэр япшIэнэрэ классыр къэзыухыгъэ къодые кIалэхэр арэу джынэс къысщэхъу. Младшэ офицерэу ахэр зашIыхэм, дзэм иморальнэ зытет, ыпсэ нахь зыкъы­Iэтыгъагъ. ЗэуапIэми ныбжьыкIэхэр нахь щыпытагъэх, рядовойхэм анэ­сыжьэу. Училищым апэрэ ма­фэу тызчIэфагъэм къыщыубла­гъэу взводхэм якомандирхэм якурсхэр тагъэкIугъэх. Чэщ-зымафэм сыхьат 12 — 14-рэ теджэщтыгъ. Лъэш дэдэу тызэрэпшъырэм къы­хэкIэу тащыщхэр щтыргъукIым зэрэхэтхэу, ашъхьэ шхончым рагъэкIызэ чъыещтыгъэх. ШэкIогъум и 7-м Томскэ мэфэкI парадэу щыкIуагъэм зэкIэ училищхэр хагъэлэжьагъэх: Томскэ артучилищыр, Ленинградскэ зенитно-артиллерийскэ училищыр, связым и Академие, нэмыкIхэри. ЧъыIэшхуагъ. Дзэ сатырым тызэрэхэтэу чъыIэм тыкъыгъашъощтыгъ. ЧъыIэм тигъэщтыщтыгъ. Хьэпсэдэс бушлатхэр тэры ныIэп зыщыгъыгъэхэр. ЦIыфэу парадым еплъынэу къэкIуагъэхэм къагурыIощтыгъэп дзэу тызщыщыр. СэмэркъэушIылэу къытхэтыгъэхэм шъэфыдзэхэм тащыщэу араIо­щтыгъ. ЗэкIэмэ анахь сыгу къинагъэр тиротэ щэджэгъуашхэм зэращэгъагъэр ары.
Къэбаскъэ зэрызыгъэ кузэкIэт шхапIэм Iутыгъ. Кум исыгъэр IукIыгъагъ. Нэбгырэ заулэ тисатыр­хэм къахэхъушъути, къэбас­къэхэр апхъотагъэх. НэмыкIхэми кум нэ­ужым зыкъыратэкъулIагъ. Такъикъ заулэкIэ кузэкIэтым зы къэбэскъашъхьэ къинэжьыгъэп, ашхыгъэх. Зэцэгъугъэхэ къэбэс­къэ купкIыхэр итэкъухьагъэхэу тыдэкIи щылъыгъэх. Чэщ-зымафэм училищым фэхъунэу щытыгъэ къэбаскъэр зы ротэм хэтхэм такъикъ заулэкIэ ашхыгъ. Зыпкъ къикIыгъэхэр къыхамыгъэщышъухэу мэфи­тIо зэхэфынхэм ауж итыгъэх, бырсырышхо къикIыгъ».

Джащ фэдэу гъаблэми щынэми апхырыкIыхэзэ тидзэкIолIхэр ТекIоныгъэм фэбэнагъэх. НыбжьыкIэ дэдэу зэуапIэм Iухьагъэхэри апсэ еблэжьыгъэхэп. Ащэчыгъэр ягукъэкIыжьхэм къахэнагъ ыкIи непэ тэ къыднэсыжьыгъэх…
Тэу Замир.