Спорт гимнастикэмкIэ Ставрополь краим изэнэкъокъухэр къалэу Ессентуки щыкIуагъэх.

СССР-м спортымкIэ имастерэу В. В. Назаровым ишIэжь фэ­гъэхьыгъэ турнирым спортсмен­хэм зыщаушэтыгъ. Ахэр Ес­сенту­ки, Ставрополь, Махачкала, Мыекъуапэ, Волгоград, Налщык, нэмыкI къалэхэм къарыкIыгъэх. Адыгэ Республикэр къэзыгъэлъэ­гъуагъэхэр олимпийскэ резервым испорт еджапIэ зыщызыгъа­сэхэрэр ары.
ТикIалэхэм ыкIи типшъашъэхэм медаль 14 къахьыгъ. ТекIоныгъэр къыдахыгъ Ирина Власюковам, Иван Гладковым, Денис Тудиряковым, Алиса Сотниковам ыкIи Руслан Ермаковым. Камилла Стребковам, Юлия Шубинам, Елизавета Деркачевам, Иван Школа, Тимур Раджабовым ыкIи ХьакIмэфэ Заур тыжьын медальхэр къалэжьыгъ. Сабрина Медниченкэм, Анна Ипатовам ыкIи Мила Ходыкинам ящэнэрэ чIыпIэхэр къафагъэшъошагъэх. Мы­хэм ятренерых Вячеслав Косных, Анна Перепелица ыкIи ХьакI­мэфэ Светланэ.