Адыгеим щыпсэухэу гъот зиIэхэм шIушIэным, псэпэшIэным алъэныкъокIэ Iофыгъоу зэрахьэхэрэм уарыгушхонэу щыт.

Хабзэ зэрэхъугъэу, НэкIмэзэ мазэм къыриубытэу АР-м ыкIи Пшызэ шъо­лъыр ащыпсэурэ быслъымэнхэм я ДиндэлэжьапIэ гъот макIэ зиIэ унагъохэм апае шIушIэ Iофтхьабзэхэр регъэкIокIых. Мыщ фэдэ унагъохэм гъомылапхъэхэр афащэнхэмкIэ шIоигъоныгъэ зиIэхэр Iофтхьабзэм къыхэлажьэх. Ащ пае счет къызэIуахыгъэу псапэ зышIэнэу фаехэм ахъщэ рагъахьэ. НэкIмэзэ мазэм къыкIоцI шIушIэ Iофтхьабзэр рекIокIыщт.
ШIушIэ Iофтхьабзэм изэхэщакIохэм ахэтэу ыкIи динлэжьэу Емыж Заремэ къызэрэтиIуагъэмкIэ, шIушIэ IэпыIэгъур пшъэшъэжъые куп ягукъэкIыкIэ апэ рагъэжьэгъагъ, гъот макIэ зиIэ ыкIи сабыибэ зэрыс унэгъо зытIущмэ гъомылапхъэ афащэщтыгъ, мылъкукIэ адэIэпыIэщтыгъэх. Нэужым ежьыри ахэтэу IэпыIэгъу зыфэхъунхэу зытефэрэ унэгъо пчъагъэхэм ахагъэхъуагъ.
— Муфтиим ишIэ хэлъэу шIушIэ Iоф­тхьабзэм пае ахъщэ тэугъои. Зыпари шъэф хэмылъэу, ар къэзытыгъэр ыкIи зыфэдизыр зэкIэхэмкIи нэрылъэгъоу щыт. КъэIогъэн фае, динлэжьхэм ыкIи быслъымэнхэм ямызакъоу, НэкIмазэм пае урысхэми, нэмыкI цIыф лъэпкъхэми счетым ахъщэ къытфырагъахьэ. НэкIма­зэм иапэрэ мафэ цIыфыр зэрэхэIэжьын гъомылапхъэ иIэн фае. Ащ пае мыгъэ ахъщэ угъоиныр нахь пасэу, мэзаем, езгъэжьагъ. НэкIмазэр зэрищыкIагъэм фэдэу къырагъэхьан алъэкIынэу унэгъо 46-мэ мыщ фэдэ IэпыIэгъу ядгъэгъо­тыгъ. Гъэтхапэм и 15-м, шIушIэ Iофтхьабзэм ия 2-рэ уцугъо хахьэу, унэгъо 45-мэ гъомылапхъэхэр афэтщагъэх. Ахэр мыкIодыщт гъомылапхъэхэу пынджы, шъоущыгъу, хьаджыгъ, дагъэ, фыгу, псы IэшIу, IэшIу-IушIухэр, чэтыл, нэмыкIхэри. Лъэпкъэу зыщыщхэмкIэ зэхэдз тшIырэп, зищыкIагъэу тлъытэхэрэм тадэIэпыIэ, — къыIуагъ Заремэ.
ШIушIэ IэпыIэгъум иящэнэрэ уцугъо НэкIмазэм иаужырэ мафэ, гъэтхапэм 29-м рагъэкIокIыщт.
КъэIогъэн фае, хабзэ зэрэхъугъэу, гупыкI зиIэхэм ыкIи шIушIакIохэм ягукъэ­кIыкIэ Адыгэ Республикэмрэ Пшызэ шъолъыррэ ащыпсэурэ быслъымэнхэу нэкIыр зыIыгъхэр пчыхьэ нэмазым ыуж хагъэIэжьых.
Заремэ къызэриIуагъэмкIэ, «Титаным» итучанитIоу Мыекъуапэ дэтхэм, зыр Черемушкэм щыI, адрэр урамэу Жуковскэм тет, «Куриная лавка» зыфиIорэм итучаниплIым гъучI матэхэр ачIэтхэу псапэ зышIэнэу фаехэм гъомылапхъэхэр аралъхьэ. Нэужым ахэр зищыкIагъэхэм афащэх. ШIушIэ IэпыIэгъум чанэу хэлажьэх Быркъ Бэллэ, Хъопсэрэкъо Саидэ, ЛIэхъусэжъ Замирэ, Мыгу Рузанэ, Теуцожь Джэнэт, Бырсыр Эллэ, Бэгъушъэ Альберт, Дзыбэ Альмир, Къохъужъ Асе.
Хэти псапэу ышIагъэр фэдишъэкIэ къыIукIэжьынэу Тхьэм тафелъэIу.
КIАРЭ Фатим.
Сурэтхэр: АР-м и ДиндэлэжьапI.