Къэрэщэе-Щэрджэс Республикэм къикIыгъ къэбар гухэкI — Хэгъэгу зэошхом иветеранэу, зэлъашIэрэ журналистэу, тхакIоу, усакIоу, ичIыгу гупсэ шIу дэдэ зылъэгъущтыгъэу Даур Джахьфар идунай ыхъожьыгъ.
Джахьфар илъэс 50-м ехъурэ рес­публикэ гъэзетэу «Черкес хэкум» Iоф щишIагъ, тхылъ 30-м ехъу ыт­хыгъ урысыбзэкIэ ыкIи щэрджэсыбзэкIэ.
Хэгъэгу зэошхом илъэхъан икъо­джэ гупсэ нэмыц техакIохэр къызыдахьэхэм, илъэс 11 зыныбжь кIалэм дзэкIолIэу уIагъэхэр зытещагъэ хъугъэ­хэр къыгъэнэжьынэу пылъызэ, ежьыри щэхэр къытырагъэфагъэх. Мы хъугъэ-шIагъэм къегъэлъагъо джыри кIалэзэ лIыблэнагъэу Джахьфар хэлъыгъэр.
ИIофшIэн дэгъоу зэригъэцакIэрэм ишIуагъэкIэ тиIофшIэгъу тын зэфэшъхьафхэри къылэжьыгъэх — медалэу «Хэгъэгу зэошхоу 1941 — 1945-рэ илъэсхэм щыIагъэм илъэ­хъан лIыбланэу Iоф зэришIагъэм пае» зыфиIорэр, Жуковым имедаль, «РСФСР-м культурэмкIэ изаслуженнэ IофышI», «КъЩР-м изаслуженнэ журналист» зыфиIохэрэр, ичIыгу гупсэ ихэхъоныгъэ иIахь зэрэхэлъым пае КъЩР-м итын анахь лъапIи къыфагъэшъошагъ – орденэу «Къэрэщэе-Щэрджэс Республикэм ыпашъхьэ­кIэ гъэхъагъэхэр зэриIэхэм пай» зыфиIорэр.
Журналист зэдэлэжьэныгъэм къы­хиубытэу тиIофшIэгъухэми Джахьфар IукIэнхэу, зэдэгущыIэгъу дашIынэу янасып къыхьыгъ. Зилъэпкъ, зичIыгу, зикъэралыгъо шIу зылъэгъухэу, ахэм афэшъыпкъэ цIыфэу ащ зыкъыгъэлъэгъуагъ, тишIэжь лъэуж нэф къыхинагъ.
Даур Джахьфар иIахьыл-гупсэхэм, ткъош шъолъырым тафэтхьаусыхэ чIэнэгъэшхоу ашIыгъэм фэшI. ЩымыIэжьым Тхьэм джэнэт лъапIэр къырет.