Педагогикэ IофшIэным пылъхэм ясэнэхьат IэпэIэсэныгъэ хэгъэхъогъэным фытегъэпсыхьэгъэ зэнэкъокъоу 2025-рэ илъэсым республикэм щырекIокIыщтхэр мэфэкI шIыкIэм тетэу мы мафэхэм аублагъэх.

Iофтхьабзэм хэлэжьагъэх Адыгэ Рес­публикэм и Парламент и Тхьаматэу Владимир Нарожнэр, АР-м гъэсэныгъэм­рэ шIэныгъэмрэкIэ иминистрэу Евгений Лебедевыр, кIэлэегъаджэхэр, кIэлэпIу­хэр, гурыт сэнэхьат, гъэсэныгъэ тедзэ зыщызэрагъэгъотырэ еджапIэхэм яIофышIэхэр, блэкIыгъэ илъэсхэм зэнэкъо­къухэм текIоныгъэ къащыдэзыхыгъэхэр. ЗэкIэмкIи нэбгырэ 600 фэдиз Iофтхьабзэм хэлэжьагъ.
— Гъэсэныгъэм исистемэ Iоф щызышIэхэрэм ащыщэу анахь шIэныгъэ куухэр зиIэхэр къыхэгъэщыгъэнхэм мэхьанэшхо иI.
КIэлэегъаджэхэм, кIэлэпIухэм пшъэ­дэкIыжь ин ахьы. КъыткIэхъухьэрэ лIэужхэм ягъэсэныгъэ-пIуныгъэ фэгъэ­хьыгъэу IофшIэнышхо зэшIошъохы, ар зэрифэшъуашэу зэрэжъугъэцакIэрэмкIэ тышъуфэраз. ШъолъырымкIэ гъэсэны­гъэм исистемэ хэхъоныгъэхэр ышIынхэм АР-м и ЛIышъхьэ лъэшэу ынаIэ тет, Iофтхьэбзэ зэфэшъхьафхэр республикэм щызэхащэх. Хэхъоныгъэхэр щыIэх, еджапIэхэр, материальнэ базэр зэтегъэ­псыхьагъэх. Къыхэгъэщыгъэн фае, кIэлэегъаджэхэм яIофшIэнкIэ гухахъо зыхагъотэщт лъэныкъохэри бэ мэхъух. Парламентым идепутатхэм гъэсэныгъэм иIофышIэхэм сыдигъокIи анаIэ атет ыкIи атетыщт. Зэнэкъокъум дэгъоу зыкъыщыжъугъэлъэгъонэу шъуфэсэIо, — къы­Iуагъ Владимир Нарожнэм.
Къэзэрэугъоигъэхэм АР-м и ЛIышъхьэ ыцIэкIэ шIуфэс къарихыгъ Евгений Лебедевым. Мы илъэсым апэрэу респуб­ликэм щыкIощт зэнэкъокъухэр зы мафэм къызэрэзэIуахыгъэхэр ащ къыIуагъ. КIэлэегъаджэм ишIэныгъэ сыдигъокIи зэрэхигъэхъощтым ыуж зэритыр, мыщ фэдэ зэнэкъокъухэм ахэлажьэхэрэм япчъагъэ зэрэхахъорэр къыхигъэщыгъ. ТекIоныгъэ ыкIи хагъэунэфыкIырэ чIыпIэхэр къэзыхьыхэрэм АР-м и ЛIышъхьэ игукъэкIыкIэ ахъщэ шIухьафтынхэр араты. Илъэс къэс республикэ бюджетым къыхэхыгъэ сомэ миллион фэдиз ащ пэIохьэ. IэпэIэсэныгъэ ин зиIэ кIэлэ­егъаджэхэр, кIэлэпIухэр Адыгеим зэриIэр министрэм къыхигъэщыгъ, республикэ уцугъом имызакъоу, федеральнэм хагъэунэфыкIырэ чIыпIэхэр къыщыдэзыхыхэрэр бэу ахэтых.
«НыдэлъфыбзэмкIэ ыкIи литературэмкIэ анахь кIэлэегъэджэ дэгъу», «Психолог анахь дэгъу», «КIэлэпIу анахь дэгъу», «Анахь пэщэ дэгъу», «Анахь кIэлэегъэ­джэ дэгъу» ыкIи нэмыкI зэнэкъокъухэр аублагъэх.
ДЕЛЭКЪО Анет.
Сурэтыр: АР-м гъэсэныгъэмрэ шIэныгъэмрэкIэ и Министерств.