Зэнэкъокъу зэхащэ
Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэгъэшъошэгъэнымкIэ Комиссием изэхэсыгъо щыIагъ.
Адыгэ Республикэм и Президент 2008-рэ илъэсым мэлылъфэгъум и 30-м ышIыгъэ Указэу N 41-р зытетэу «Журналистикэм ылъэныкъокIэ Адыгэ Республикэм и ЛIышъхьэ ишIухьафтын ехьылIагъ» зыфиIорэм диштэу 2025-рэ илъэсым журналистикэм ылъэныкъокIэ Адыгэ Республикэм и ЛIышъхьэ ишIухьафтын къыдэзыхы зышIоигъохэм азыфагу шъхьэихыгъэ зэнэкъокъу зэрэщызэхащэрэмкIэ мы зэхэсыгъом унашъо щаштагъ.
ЛъэныкъуитIукIэ шIухьафтыныр афагъэшъошэщт: гъэзетхэмрэ (журналхэмрэ) къахаутыгъэхэмкIэ ыкIи теле-, радиокъэтынхэмкIэ. Журналистикэм ылъэныкъокIэ Адыгэ Республикэм и ЛIышъхьэ ишIухьафтын афэгъэшъошэгъэнымкIэ Комиссием (ыужыкIэ Комиссиер тIозэ дгъэкIощт) 2025-рэ илъэсым чъэпыогъум и 1-м къыщегъэжьагъэу шэкIогъум и 1-м нэс шIухьафтыныр зыфэгъэшъошагъэмэ хъущт IофшIагъэхэмрэ документхэмрэ ыштэщтых, 2025-рэ илъэсым шэкIогъум и 1-м къыщегъэжьагъэу шэкIогъум и 30-м нэс ахэм ахэплъэщт.
ШIухьафтыныр зыфэгъэшъошагъэмэ хъущт IофшIагъэхэм якъэгъэлъэгъонкIэ ыкIи яштэнкIэ шапхъэу щыIэхэм Адыгэ Республикэм икъэралыгъо хабзэ игъэцэкIэкIо къулыкъухэм яофициальнэ сайтэу «http://adygheya.ru» зыфиIорэм, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ираздел нэIуасэ защыфашIын алъэкIыщт. Адыгэ Республикэм и Президент 2008-рэ илъэсым мэлылъфэгъум и 30-м ышIыгъэ Указэу N 41-р зытетэу «Журналистикэм ылъэныкъокIэ Адыгэ Республикэм и ЛIышъхьэ ишIухьафтын ехьылIагъ» зыфиIорэр ащ рагъэхьэгъагъ.
Комиссием итхьаматэ игуадзэу, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жугъэм иамалхэмкIэ и Комитет итхьаматэу А. А. Шъхьэлахъом документхэр мыщ фэдэ чIыпIэм щыIэкIэжъугъэхьанхэу тышъолъэIу: къ. Мыекъуапэ, ур. Крестьянскэр, 236, я 49-рэ каб., тел.: (8772) 52-36-01, электрон адресыр: komnac01@yandex.ru.