ХэушъхьафыкIыгъэ дзэ операциер къызежьагъэм къыщыублагъэу Общественнэ движениеу «Адыгэ Хасэм» ащ хэлэжьэрэ тидзэкIолIхэм шIушIэ IэпыIэгъу арегъэгъоты.

ПсэупIэу Зеленчук щыIэ дзэ подразделениеу Мыекъопэ артиллерийскэ разведчикхэр зыхахьэхэрэм ипащэ зыкIэтхэ­жьыгъэ рэзэныгъэ тхылъым къыщеIо ядзэ пшъэрылъхэр икъоу агъэцэкIэнхэмкIэ, подразделением ищыкIагъэхэр къыз­IэкIи­гъэхьанхэмкIэ мылъкукIэ ренэу IэпэIэгъу къызэрафэхъухэрэм фэшI Адыгэ Хасэм ипащэ ыкIи ащ хэтхэм лъэшэу зэрафэразэхэр, ащ гукIуачIэ къызэраритырэр.
Адыгэ Хасэм и Тхьаматэу ЛIымыщэкъо Рэмэзан къызэриIуагъэмкIэ, хэушъхьафыкIыгъэ дзэ операцием хэлэжьэрэ тидзэкIолIхэр ыпэкIэ псым, унагъом щагъэфедэрэ хьап-щыпхэм къакIэлъэIущтыгъэхэмэ, джы хьылъэ зэрэзэращэщт, ренэу агъэкощырэ техникэр, псэолъэшIын пкъыгъохэр нахь ящыкIагъэу къыхагъэщы.
— ЗэуапIэм щагъэфедэщт техникэм икъызIэкIэгъэхьан ыкIи ащ гъэцэкIэжьынхэр ешIылIэгъэнхэр ары джыдэдэм тэ пшъэрылъэу тиIэр. АщкIэ яшIогъэшхо къытагъэкIы лъэкI зиIэхэу ыкIи шIушIа­кIохэу ЛIыIэпIэ Ибрахьим, Бэгъушъэ Мурат, Жэнэ Болэт ыкIи Хъурым Хьазрэт. Гъогу зэхэкъутагъэм ыкIи псын­жъым нахь дэгъоу щызекIорэ УАЗ-у «Таблетка» зыфаIорэм фэдэхэр жъыхэу къэтэщэфых ыкIи ятэгъэшIыжьых. ГъэрекIо сомэ мин 250-рэ зыпэIухьэгъэ мыщ фэдэ автомобили 3 афэтщэфыгъ ыкIи афэдгъэцэкIэжьыгъ. Ащ нэмыкIэу гъомылапхъэ­хэр, псыр, унагъом щагъэфедэрэ хьап-щып­хэр аIэкIэдгъэхьагъэх. Батальоным икомандир ирэзэныгъэ тхылъ къытфахьыжьи, кIалэхэр бэмышIэу тадэжь къэкIуа­гъэх. Лъэшэу тагъэгушIуагъ, — еIо ЛIымыщэкъо Рэмэзан.
Адыгэ Хасэм и Тхьаматэ къызэриIуа­гъэмкIэ, тапэкIи шIушIэ IэпыIэгъур лъа­гъэкIотэщт.
КIАРЭ Фатим.